Kù:nga vnøn rawe rvtø taq

 Kù:nga vnøn rawe rvtø taq

Vsvng wawe nø rvtø vrvm taq kù:nga vnøn we, cøm vnøn we tvrà rì nvng vhøm shìwe vsvngrì wa ílonge. We taq wedø cøm vnøn we tvrà rì svng síngsháì we ínìgø welòng nvng vhøm lú:ngì we rvtø taq tiqgø nvng tiqgø í vto shàì we dang màbóng we svng yadø yánglún shìe.

1.  Àngdè lvpvt taq tiqboq cøm vnøn we vhøm shì bø kvt we tvra svng svre vmnø téwa vnøn lvm tvra svng rvcvngshì vmwe íe. Yalòng nø lvpvt tvrà svng yùl yùlcèí vcømzíshì we vsvng tiqgø íe wanø shøn lúnshìe. Wedø íwe vsvngrì taq dang àngpvn pvn taqø kù:nga vnønwe, cøm vnøn we tvrà í wekvt kvt vhømshì sháò we íe. Weyvng kèní svre nøt svng gø vpo dvzvŕ sháò we íe.
2. Cøm vnøn we tvra svng vhøm bøò nø we tvrà svng svre nøt zángshì vmwe ínìgø we tvra kèní vrá chvpdap pvran lvm kámshì we nøt gvlshì vsvng íe. Wedø kámshì lú:nò vsvng tiqgø taq nø we tvrà svng svre nøt zangwe ínìgø we lòng svng dáng lún ràe wawe nøt mvsøn gø zángshì weí chvpdvp kèní gø dvzaq shì we írat jór nvngòn lú:nò we vsvng tiqgø bøn dvzvŕ sháò we íe.
3. Cøm vnøn we, kù:nga vnøn we dangrì svng kadvgvp gø vhø:mò nø síngsháò weí we tvràrì kèní shvlawa vtoshì, cvnshì nø chvpdvp kèní gvsat lú:nò we vsvngrì íe. Wedø íwe vsvng tiqgø nø kadvgvp ínìgø kù:nga vnønwe tuqranø vhømò vrvm taq we lòng taqkèní cvnshì, mvcøngshì nø vdu vbóng dø wáshì weí mvkrøm nvdøprì lushì lú:nò we íe. Weratnø àng taqkèní kadvgvp gø cøm vnøn longwe tvra svng vcøm mvzíshì we íe. Yadø nøngmaq shvnvng gùr gùr taq wedø íwe vsvng pvn 3 pvn vlwe svng yvnglún shìwe íe.

 1 taq yvng lúnshìwe vsvng pvnrì nø nøngmaq shvnvng gùr gùr taq gvzàni yvnglún shìwe ínø cøm vnøn lvm tvrà svng svre shaqí cúnshàì we vsvngrì tiqpvn taq vbáì we íe. Tiqkvt kvt wedø kù:ngà vnøn we tvrà vdòng kèní vko vkángrì tuqrawe ínìgø we vko vkángrì svng tvpshì mvlú:nì we íe.

2 dang wawe taq vsvng mvme nø mvvl we svng yvngshì we ínìgø àngmaq taqgø cøm vnøn lvm tvrà svng svre we ínìgø wedø cøm vnøn lvm tvrà svng yùl yùlcèí mvwáshì, vcøm mvzíshì vsvngrì íe. Àngmaq taqkèní we tvrà svng dánglún dángte dvkángshì nø gvsat dvzaqshì we vsvngrì íe. Ínìgø tiqkvt kvt jór nvngòn mvlúnò we mvtaq we cøm vnøn lòng ò mvtú svng gø mvsíng sháò we bøn sháò vsvngrì ni íe.

3 wawe pvn taqnø nøng maq shvnvng gùr gùr taq gvzà mvyvngshì we vsvngrì ínø àngmaqnø júr nvnggùn téwa vtoshì lú:nò vsvngrì wanø shønlúnshì longe. Àngmaq nø mvdàm kaq yvnglún shìwe vsvng pvn 2 pvn mvdàm téwa cøm vnøn lvm tvràrì svng vhø:mò we ínìgø dvzaqshì we nøt mvsøn kùngà taqkèní nøt ma dvcvmshì shaqí dvzaq dvkángshì we vsvngrì íe. Àngmaqnø wedø shìwvtrì dvhø taq kèní cvnshìnø chvpdap taq dvzaq dvkángshì we vsvngrì wanø shønlún shìwe íe.

Døng jøng lvpvt tvrà tiqlòng taqnø cøm vnøn lvm tvrarì nø wedø ni vhømshì we ínø . Weratnø vzàng kaq cøm vnø we tvra màhøm shaq vsvng tiqgø nø mèpvng lvp jór nvnggùn lúnshì lvm mvvl wanø gø shøn lúnshì we íe. Kù:nga vnøn we tvrà rì taqkèní cvnshì lúnwe vsvng tiqgø taqwa welòng kèní cvnshìnø tèwa shvla we jór nvnggùn svng tvpshì lú:nò we íe.

Weratnø cøm vnøn we, kù:ngà vnøn we rvtø vrvm taq welòng taqkèní paqzí mvkrøm nvdøprì lushì cvnshì nø dvzaqshì lvm vchyak we íe. Lvpvt tvrà tiqlòng svng mvjàn tøm tiqlòng ku dvdut shìwe dø møí nø rvtø vrvm shìwvtrì tuqrawe yvngkèní dvzaq dvkángshì shaqí júrlún lvm tvrà svng tongshì lúnlvm nvnggùn ziwe dvtit tvle svngkà yayáng naròe.