Kadø íwe shìwvtrì vkǿn we ínìgø nøt mà dvcv́m shìlv́m Monica kèní dvkám we

Kadø íwe shìwvtrì vkǿn we ínìgø nøt mà dvcv́m shìlv́m Monica kèní dvkám we

Vsv̀ng wawe nø yvklv́m shìwvtrì vkǿn rawe dvgvp nøtdat, nøt vtang lv́m rì vhǿm shì rawe wa ílonge. Welòng taq tiqgǿ nv̀ng tiqgǿ ò tøng zánlú:nò we dang rì taq vsháy longwe íe.

Wedø íwe shìwvtrì vhǿm lú:ngì dvgvp St. Monica ò lvpat tvrà sv̀ng dvdam shàì nø kù:ngà lushì lv́m vlwe gø íe.

St. Monica svng AD 322 nǿng Africa dan tibo lvp taq shøq yv̀:ngà. Àngnø gvray kaq gvzà kámwe kám vsv̀ng tiqgø gø íyv̀:ngi. St. Monica nø Patricius wa tǿò pè nvng dø̀ngku shvzøngshì yv̀:ngì nø àngcè 3 gø sv̀ng gø shvzat yv̀:ngà. We àngní ò àngcè 3 gø svng chø̀m dø̀ngku pè íwe Patricius í tìløp kámā lv́m dang taq vgám yv̀:ngà wegø íe. St. Monica í wedø íwe nøt dat nøt vtang lv́m tvrà, àng døngkupè ò vmíng sv̀ng vtiqwe mvwà yv̀:ngò.

St. Monica nø vtang shaq nøt høpwe àngni mè, àng chø̀m døngkupè nv̀ng vshuqrì dvhø̀ taq mà dvrá dø shvniq shvnvr we vhǿ:mò we ínìgø we àngò døngku svng shvlá vtang vcù:ng yv̀:ngà wegø íe.

Wedø àngò nøt shvyvngshì we nv̀ng nøt tǿng nøt døng we nøt laqyàrì ratnø làngdø̀m taqnø àngnìmè gø kám vsv̀ng tiqgø vlíng vpo yv̀:ngì nø àngní ò vzø̀m vzvp, vtoq vtip we tvrà taq gø gvzà mòngzø̀l we tvrà sv̀ng vtoshì lún yv̀:ngà.

We mèpv̀ng taqnø St. Monica ò døngkupè gø kám vsv̀ng tiqgø bø̀n ráì we mvtaq we dø̀ngku ò vshuqrì shvngbe gø kám vsv̀ngrì bø̀n yv̀:ngì wegø íe.

St. Augustine

St. Augustine nø gvzà kà mvta we tiqgǿ í yv̀:ngì. Àng nø àngmè í shvngøt dvtú we kámnøt tvrà kèní vsvr shì we vsv̀ng tiqgǿ gø íyv̀:ngì. St. Augustine nø ngànshà pèí dvløt gvzàmwe tvrà mèpvng taqwa vlín we tiqgǿ gø íyv̀:ngì. St. Augustine nø mònggv̀n byo lv́m tvrà taqwa vlín nø̀ cv̀mré tiqgǿ gø gv̀l yv̀:ngà we íe.

Àngmè nø gvray kámnøt tvrà taq vtangshaq dvzaq shìwe ínìgø àngcè pè íwe St. Augustine nø we tvrà sv̀ng mvcv̀n nø̀ kà mvtá wáshì yv̀:ngì we íratnø àngmè nø vtamg kèní nøt dvshà wegø vhǿm yv̀ngà we íe. Ínìgø àngcèpè nøt vwángshì lún lv́m dvpvt ni vrvm vjúrøt dvzaq shì yv̀:ngì wegø íe.

St. Augustine àngmè nø àngcèpè nøt vwángshì lv́m tvrà dvpvt Roma myuq sv̀ng dinø̀ àngcèpè vlwe Milan myuq høqshaq tùng dìyv̀:ngì wegø íe.

Àngmè nø àngcè pè nøt língshì lv́m dvpvt 17 nǿng høqshaq vjúrøt dvzaq shìyv̀:ngì we íe. Làngdø̀m taqnø St. Augustine tiqgø Milan myuq taq jàng laqyà vlíng vpo shìráì nø tìløp kámshì yv̀:ngì we íe.

St. Augutine nø àngò àngcèpè nv̀ng tiqdø St. Ambrouce wur taq tìløp kámshì yv̀:ngì we íe. Weratnø àngmè sv̀ng vtang kènì dvbù dvzv́r ráà wegø íe. Pàwálv́m wani St. Augustine í àngmè sv̀ng kadø íwe shìwvtrì zí ráà we ínìgø àngmè taqkèní nøt mà dvcv́mshì shaqí àng nøt língshì lúnlv́m tvrà dvpvt vjúrøtā dvzaqshì yv̀:ngì werat íe. Wadángte høqshaq àngcè tiqgø dvpvt lvpat zíshì nø vjúrøtā dvzaqshì yv̀:ngì we St. Augustine ò àngmè nø Monica ni íwe íe. St. Monica nø àngcèpè Augustine ò jàng laqyà rì vlíng vpo lúnlv́m dvpvt kadvgvp gø àngcèpè nv̀ng tvpníshì nø vjúrøt dvzaq shì yv̀:ngì wegø íe.

St. Monica nv̀ng àngcèpè St. Augustine ò lvpat mvshǿl sv̀ng yv̀:ngì dvgvp àngmè Monica nø kadø íwe lvpvt shìwvt, mvhøt lv́m tvrà rì vhǿ:mò we ínìgø nøt mà dvcv́mshì shaqí gvray kaqsv̀ng vjúrøt dvzaqshì werat làngdø̀m taqnø gvray àngò jejú kèní mòngzøl we nøt shø̀mlv́m tvrà sv̀ng vtoshì lún yv̀:ngà we íe.

We dangrì sv̀ng yv̀:ngì nø vdèò lvpvt tvrà taqgø kadø íwe shìwvtrì vkǿn rawe ínìgø gvray àngkaq zǿm shvngáng shàì taq só:rí dvzaq dvkáng shàì we ínìnø tiqni rvtø̀ taqnø àng jejú rat vdè ò dvdam shìwe tvnù manggá sv̀ng vtoshì lúmlv́m íwe sv̀ng ya mvshǿl taqkèní nònggwòn ziwe íe.