Krvtsømwe taq mènvrni

Krvtsømwe taq mènvrni

Vsvngrìò lvpvt taq èwaòwe bvnlì vrvmnø èwaòweó zangwa jórlúnshìwe mø:í. Vdè taq kèní gvzà shvladø dèzaqshì vrvm gø joŕ mvlúnìwe gø gvzà vlwe íe. Dèdamòwe mànggá nvng èwaòwe bvnlìrì shvngbe jór lúnlvmnø nøngmaq gøvrvm shóngshàì we ínigø bøndaq lvm gvzà yak we íe. Gø vrvmò lvpvt taq dèdamò dø mvbøn long, shøngjungnø vtølwe bvnlì rìtaq krat sømwe gø gvzà vhømì we íe. Cvmré lvpvt taq ripnø tvrà díshá lvm dvpvt àngpaq paq vdvpshàìe, zàlvm vhømìe, àngkvt kvt ngøì weíe.

We dø íwe vdòng taq kèní dvzaq shàì we rvt wa tvrà dísháì we mvtaq kvlàng lúnì we íe. We sø tiq dvchá paqzí cvnshàì we dang taq gø cvmpóy krvtnø zùng envròwe ínìnø paqzí shawe vsvng luqpøn lvm nø mvllong. Nøtsun paqzí vdè Alfred deller íshønò we taq vsvng gøvrvmò nøt vdòng taq nøtcvmwe nøtí mèkupkéìe wae. Ngàí mvshá:ngò, ngàí wá mvlúnò wawe nøt taq kèní vsvng nøtsvng cvm dvzvŕ we íe. Wedø íwe vdòng taq kèní dvzaqshìrì rvt wa mòngàn yachang vnvpnø mòngzøl we íe wanø shøn we kà vl weíe.

Mòngàn taq bønte we shvrepè Napolian nø lìka vruò we dang taq bøng mvlún yàngònø Shakespeare nø vyàng roqvmwe bvnlì taq krvtsøm yàngìwe íe. American móngøpshú íyàngpè Abraham Lincoln gø gvtnvm:vmwe bvnlì taq sømwe vhøm yàngà wa shálúnahìe. Mvdàm laq tálúnbø shàwe shvrepèla nø àngmaq dvzaqshìwe bvnlì tiqlòng taq mvbønø sømwe ínigø nøt mvdatnø dvzaqshì weí Napolian nø Europe móngdànrì svng øpkáng lúnò we shvre bønyàngì we dø Shakespeare nø mòngàn taq lìka vruò we kàru svra gvbà tiqpè bøn bøìnø Abraham Lincoln nø American mvshøl mvtaq mòngàn taq gvzà bøngte we móngøpshú bønyàngìwe íe. Vsvng tiqgøò lvpvt taq lvpvt yàngùng mòngzøl we taq wa vl lúnlvm nø mvl.

Tiqgø nvng tiq gøò lvpvt zìdang màbóngwe íni gø cúnshìwe lvpvt taq vhømshìwe yaklvm bvnchvt rìnø vbóng longe. Zìlàngré tiqgøò lvpvt taq krvtsøm sháòwe rìsvng yànglúngì dvgvp vdèí shvlae wanø elánòwe bvnlìrì shvla dø mvbønlong dvgvp, dvsháza nøt shiqshànwe nøt taq kèní èwaòwe bvnlìrì taq vsvng dvgárìí shvladø mvyánga ranø mvrà shvriwe vhømshìlong dvgvp, rømnvngrì dvhø síngrvlnøt màbóngnø vrám vráwe dang vnønlong dvgvp, bvnlì taq kèní dvjáwe vhømshìlong dvgvp, cvnpóy krvtwe vhømshìlong dvgvp, bvnlì mvziwe vhømshìlong dvgvp, tiqgø gøí enyùm:vmwe vhømshìlong dvgvp nvng bvnlì tiqpvn pvn taq vléshìwe vhøshìlong dvgvp nøt vtang weí krvtsøm sháòwe íe. Nøngmaq gøvrvm taq krvtsømìwe taq kèní mvkung shàì dángte nø dvtut krvtsøm lvmwa ílonge.

Vle ámìwe rvtørì taq lúnshìbøìwe krvtsømwe damárì yaq kèní cvnshìnø vdèò lvpvt taq téwa shvladø dvzaqshì lúnlvm gvzà vchyak we svnggø shádvzvŕ we íe. Kàdø íwe rvtø taq ínìgø Gvray taq kámnøt kèní dvzaqshì ràwe svnggø vná mvdaq. 2

Korintu 12:20 ciq taq Kadø íe wa nìnø ngà dø̄ng rang dvgvp, namaq nø ngà shòng dø mèínøng nø, ngà gø namaq èshòngnøng dø mvǿng long we svng góng gønge. Vrá vzi vrùng wa we, vne dàzàke we, shv̀mná høp we, vshvt gv̀ng we, dvsíkà shø̀n we, bvlè gvzv̀mkà shø̀n we, dvshvng shvringshì we nvng màrv́m màrá vjángshi we gø dv́ng màvl da, wvng, góng gønge. Wanø shvdøm we svng yánglún shìe.

Vdèí dèdamòwe manggárì mvbønlong dvgvp ínigø nøt mènatangnø ngà krvtsømwe vsvng tiqgø ímvdaq wawe nøt taq kèní dvzaq dvkángshì ràe. Kadvgvp ínìgø krvtsømwe rvtø taq mènvrni wanø nvngòn ziwe dvtit tvle svngkà yayáng naròe.