Làngré bat taq shvla we tvrà svng cvnnø cúnshì lúnlvm dvpat Yøpnvng shøngran gvlshì ràwe

Làngré bat taq shvla we tvrà svng cvnnø cúnshì lúnlvm dvpat Yøpnvng shøngran gvlshì ràwe

Làngré tiqgøò lvpat taq yøpnvng shøngran wawe nø gvlshì ràwe íe. Wedø àngdèò lvpat yøpnvng shøngran, tvnù mangárì gvlshì weí chvpdap bvnlì taq gø welòng svng cvndøng dvzaqshì ràe. Wedø íratnø àngdè tiqgøò dvpat gø tiqdá vsvngrì dvpat gø yøpnvng shøngran tiqlòng ègvl nøò we ínìnø we tvnù manggá taq zømshì nø mèpvng lvp svng mà vwángshì weí tuqlún høq dvzaq dvkángshì lvm vchyak longe.

Dvgø shì ràwe dang Vsvng tiqgø nø àngdèò bat vsvk nø nvrshì we mø:í, tiqni mvdàm tiqni témvn shìwe íe. Wedøni àngdèò nvngòn kùngàrì gø vsvk tera mvbat yúmmvn shìwe írat nø tvlú dvgø shì we svng wáshì ràwe íe. Àngdè góng nøt mvsønrì wa mvtaq pø gvmsùngrì dang taqgø lánø dvgø shì ràwe svng shvdøm we íe.

Àngdè tiqgø dvpat wa mvtaq àngdè nvng sing we chøm døngkurì shvngbe dvpat gø àngdèò làngré lvpat taq kèní ràwe dang vrvm taq dvgø shì lún ràwe svng shøn mvyø we íe. Tvnù mangárì ègvl shì Àngdè bøn mvyø we tvnù manggárì gvlshì we taq kèní cúnshì ràwe íe. We àngdèò tvnù manggárì svng dvdam shì we í àngdènø kadø íwe tvrà taqkèní dvzaq dvkáng shì ràwe svng dvtøp shì ràlonge. Làngré lvpat taq wa pàgø wádángshì we rvtø íratnø we rvtø taq ni vjú vl dø, lvjøm vl dø cúnshì ràwe svng dømshá ràwe íe.

Tiqdá vsvng í dvbang lvm svng WA mèca ni Kagø taqgø àngdè svng wa dvbang shìlvm døngjá mv vl we svng síngshá ràe. Àngdè nàloq bøwe kvt àngdè wa kungshì ràlonge. Kagøò dvbang rawe svng wagø cashì we mvwáshìnø dvzaq shì ràwe íe. Àngdè svng tiqdá vsvngrì taqkèní tubùm dvbang we vto shì èlún bøò we ínìnø àngmaq svng vrá àngdèí we jèjú svng vtàng lvm døngjá vl longe.

Wedø íratnø bøn daqwe ínìnø àngdè hí mvdàm àngdè ripnø dèzaq shìwe nø shvlá vtang íwe svng síngshá dvzvŕ we íe. Àngdèò mvyø we nøtrì svng tønshì lún ràwe Cvm lvpat taq àngdè vm-aq mvyø we rì mvlún shì ralong dvgvp nøt yòlwe í ngø ìe. Wedø ni telong dvgvp gø àngdè lún mvyø we bøn mvyø dangrì mvlúnshì ralong dvgvp nøt yòl nøt taq vzing shìnø nøt mvgør we bøn dvzvŕ we íe.

Wedøni àngdè lún mvyø we dangrì lúnshì vtoshì ráì dvgvp gø dvbù nøt í àngdè lvpat svng ngán vná shìwe høq bøn sháò we mvtaq àngdè tiqgóng svng gvzàni ídøm shì we gø bøn sháò we íe. Weratnø kadø íwe dang taq ínìgø àngdèò shvrúng we nøt mvsønrì svng vdu vbóng dø tønshì we taq cúnshì ràwe svng síngshá dvzvŕ we íe.

Shvrúng we nøt mvtaq wá vdu we dang svng rvcvng shìnø wá shá ràwe Làngré lvpat nø wá ràwe bvnlìrì gvzà vpang rawe døni wá mvyøwe shvrúng nøtrì gø gvzà luq rae. Wedø íwe dvhø làngré tigø taq nøt vtiq lvmrì bøn sháòe. Bøn mvyø we shvrúng nøt nø vchyak we íe má? Jøng jøng ni wá vdue walòng nø jòwe íemá? Walòng svng cun dvtøp shìwe í àngdè lvpat taq døngjøng ni vjú zílún we, wá vdu we bvnlì dang rìsvng rvcvng shàì nø làngré lvpat taq shvla dø vpø ringdø cúnshì laqlúnì wang dvtit tvle svngkà yayáng naròe.