Làngré lvpat taq mvdø̀ng wárà we dangrì

Làngré lvpat taq mvdø̀ng wárà we dangrì
Mòngzø̀l we cv̀mré lvpat nvng nøt vhwámwe shòlaq lvpat rì vle rawe nvng chvpdvp lvpat svng pv́ngshì
ràwe íe. Àngmvril nø 20 nøng vle rawe mvril taq ílonge.
We mvril wawe nø cv̀mré gø mǿívm nø shaqré mvril svng gø shi mvgòng we mvril íe. We mvril taq
mvdø̀ng mvdaq wá vdu we dangrì vlwe gø íe.
Wedang rì svng mèwà bǿò we tiqgǿ dvpvt nø vdè lvpat terawe rvtø̀ taq lvpat tvrà taq yak lv́m shìwvt rì
àngpv̀n pv̀n vhǿm sháshì long we gø íe.
Lvpat vsvk 20 sv̀ng nàle bǿò we tiqgǿ dvpvt nø Career wawe bv̀nlì tiq dang dang svng nø zǿmshì vduvme.
Vdè ò cv̀m lvpat kèní nøt lúm we tiq tvrà rà taq mǿí ni dvgá bv̀nlì tiqdang dang svng wápv́ngshì rà we
rvtø̀ gø íe.
Wedø tiq tvrà rà taq nø lashì nø wápv́ng shì vdu we mvril svng íá:mì. Vdè nøt lúmwe tvrà, bv̀nlì taqkèní
vdè kaq svng jø̀ng jǿng ni vjú zílúne má? Vdè dvpat kapà dang nø vjú zí lúne walong svng rvcang shìnø
cvnshì mvbat wá dvzaqshì mvbat wáshì ràwe rvtø̀ gø íe.
Wedø vsvk lvpat 20 nǿng dvgvp kèní bv̀nlì tvrà rì taqkèní dvcøp dvgǿshì dvrwe tiqgǿ dvpvt nø vsvk
terawe rvtø̀ taq vdèò lvpat tvrà dvpat vlǿmvm vrvm we shvrà tiq shvrà svng tuqlún lv́m gø ílonge. Vsv̀ng
tiqgǿò lvpat vsvk 20 nǿng rvzé mvril wawe nø bv̀nlì mvkrǿm mvdøp shvlárì lashì shvlá vtang íwe mvril gø
íe.
Dèni bat ò bv̀nlì go kàru rì taq bv̀nlì mvkrǿm mvdøp wawe tvrà rì taq vdǿn kéò nø bv̀nlì vko vkángrì
vtoshì mvlúnò we làngré rì gø gvzà vpvng we svng yv́ng lún shìe.
Wervtnø̀ vdè ò bv̀nlì wàng svng shi mègòng we rvtø̀ mònggv̀n paqzí cvnshì we mvril taqkèní dvzaqshì nø̀
bv̀nlì tvrà rì svng cvnshì vdu wegø íe.
Wedø dvgǿshì dvrwe tiqgǿ dvpvt nø vdè bv̀nlì wàngrì svng ègòngvm we rvtø̀ rì taq yùl yùlcè taqkèní
wálún lv́mgø ílonge. Vsv̀ng tiqgǿ ò lvpat vsvk 20 rezé mvril wawe nø làngré lvpat ò mvdø̀ng vchvk we
mvril gø íe.
We mvril taq mvdø̀ng wáshì vdu wenø pø̀ zaqshøprì nvngshì lv́m vhú vhwaq lvpat rvtø̀ rì svng mà dvzø
lv́m vchvk vtang ni íe.
Lvpat tvrà svng vwadø vhú vhwaq èvl dvr we tiqgǿ dvpat nø jø̀ng jǿngni vdè ò lvpat terawe rvtø̀ tuqrawe
kvt yvklv́m shìwvtrì àngpv̀n pv̀n vkǿn rawe gø vhǿm sháshì we íe. Pø̀ zaqshøprì wawe gø vdè ò lvpat tvrà
taq vchvk vtang we tiqpv̀n ínø̀ we dangrì svng gø tvlú dvgǿ shì lv́m vchvk longe.
Làngré rì mvlúng ka taq shagóng shiqshàn tvrà svng pàti mvlvn nø vlwe vsv̀ngrì gø gvzàni yv́nglún shìe.
Jø̀ng jǿng lvpat tvrà wawe nø àng mvril nvng mvril lvpat tvrà yvnggúng vle ràwe ínø̀ shagóng shiqshàn
lv́m gø mvdø̀ng vchvk we tiq tvrà ni íe.
Làngré lvpat taq shagóng shiqshàn tvrà svng mècv̀n dvrwe tiqgǿ vsvk terawe rvtø̀ taq yógø dvjáng
àngpv̀n pv̀n vkǿn rawe svng vhǿm sháshì we svng gø shvdǿm we íe.
Làngré lvpat taq shagóng shiqshàn tvrà wa mvtaq nøt mvsø̀n nvrø̀m shiqshàn tvrà svng gø cv̀nlv́m gvzà
vchvk we íe. Shagóng mvnshì we tvrà rì, rvtø̀ vlwe rvtø̀ rì taq kàru shøprì røshìwe taqkèní paqzí lashìwe
nvng nøt mvsø̀n nvrø̀m shiqshàn tvrà svng cvn ràwe gø íe.

Làngré lvpat taq rvtø̀ svng vpǿ shvring shálv́m gø laqni vchvk longe. Rvtø̀ svng màpǿò we tiqgǿ dvpvt
kratcǿm lv́m tvràrì gø wedø ni tvpní shìrawe svng síngshá shì ràlonge. Vdè ò lvpat tvrà taq tuqrawe vko
vkángrì svng gø tvp shì shárà longe.
Làngré lvpat taq vlíng vpo lv́m tvrà svng svre mvdaq vto shì ràlonge. Vdè ò làngré lvpat kèní shvrán lushì
we jàng laqyà mvwá shìlv́m gø vchvk we íe. La vdè taqkèní shvrán lushì vdu longwe ínìgø vrá cvn cvn waq
shìwe laqyà gv́lshì ràlonge.
Wedø íwe laqyà rì nø vdè ò lvpat tvrà dvpvt laqyà shvlá tiqlòng gø bø̀n longe. Wervtnø làngré lvpat
taqkèní shvran màjø dø vl lúnwe gø lvpat tvrà dvpat shvla dø tubùmā lúnwe tiq tvrà ílong we svng
shvdǿm nø nònggwòn ziwe íe.