Làngré lvpat taq rvtø svng vpø shvring nø lángshì shárà we

Làngré lvpat taq rvtø svng vpø shvring nø lángshì shárà we

Ya 21 angyá mvzuq nøng bàn taq vsvng lvpat zìdangrì gvzà lvwandø vhángnø vlíng vpo mvnshì ráì we svng nøngmaq làngrérì taqkèní yàngì wedø tiqdvchá we mònggvn zìdang svng yer mvzíshì lvm høqshaq vlíng mvnshì ráìwe íe. Yadø vlíng vpo ráì we vdòng taq vlù vlàngrì taq angdèò lvpat zìdang, angdè móng angdè rvgaq zìdang dvhàng lvm vrangshì we nø mvdøng vchyak we svng síngrál shàì we wa íe.

Wedø bønlún lvm dvpat làngrérì nà, ngà shvngbe nø angdè nøt lømwe paqzí dang taq rvtø svng vpø dø lángshàì we taqkèní vlíng vpo shìlvm dvzaq dvkáng shì ràwe svng síng vrá ràlonge. Ni vrvm lvpat taq nøngmaq shvngbe nø rvtø nari 24 dàm vl we taq cúnshàì we wa ínìgø we rvtø lòng svngvjú vl dø lángshàì we nø tiqgø nvng tiqgø màbóng we taqkèní jór lúnwe dangrì taqgø màbóng we svng síngshá ìwe íe.

Wedø írat nøngmaq taq vl we rvtø angdongcè yalòng svng ringdø lángshàì nø angdè tuq mvyø we mvnggá høqshaq dìlvm nø nà, ngà shvngbeò bvnlì døngjá tiqlòng ni íe. Dènila bat taq nøng maq dvhø taq Internet wawe bat í ègøm ke ráshà we ínø cvmré cvmtangrì høq shaq lángshì ráì. We dø íwe dang vrvm rìtaq shvla we nvng mà shvlawe rì tiqrá vl we íe.

Vdè Myanmar móngdànò làngrérì mvlúngka taq ya Internet lòng svng paqzí cvnshì we dang dvpat lángshì we svng mvwáshì we svng yánglún shìe. Ringwe rvtø rìsvng vwa wa dø shvleò dø dvcømò we vsvngrì gvzà yánglún shìe. Yadø wáshì we nø angdè lvpat pvngkrat we mvtaq àngdèò dvcìrì dvpat gø zá dvzvŕ we íe.

Téwa làngrérì mvlúngka taq Internet game gvzøp we taq wa vlínnø lèga paqzí cvnshì lvm rvtø rìsvng vwadø dvcøm sháòe. Dèni bat vlù vlàngrì gø vrvm dángte nø phone langwe vsvngrì wa ímvnshì ráì we ínø we lòng taqkèní gø angdèò lvpat rvtø rìsvng ringdø lángshì shvla we gø íe. Shøn mvyø we taq angdèò bvnlì dvpat lángshì we mø:í ni angdè nvng vdu we paqzí tiqpvn pvn cvnshì we ku lángshì shvla we svng shøn mvyø we íe.

Vránø shóng shøngwe zìlàngré vnvmchvngrì vlevm we rvtø rìsvng vrá vtáng mvlún shìwe dvrá svng shvngbeí síngsháì wedø tiqdvchá rvtø mv vl rat wanø shønlvm tvle angdèò lvpat rvtø rìsvng kadø wa lángshàìe walòng svng sun dvtøp shì lúnlvm dvpat dvshat mvyø we taq 1. Angdèò tiqni rvtø vdòng angdè lvpatò vjú vl dø kadángte langshàìe má?

2. Angdèò bvnlì dvpat rvtø kadángte zíshàìe má? 3. Angdè gùr gùr taqkèní cvnshì we dang svng rvtø kadángte zí shàìe má? Walòng svng sun dvtøp shì ràe. Làngdøm ku kèní móngdàn tiq móngdàn vháng lúnlvm dvpvt nø we móngdàn taq vl we làngrérìò wur taq wa ílonge.

We dø íratnø làngré lvpat wawe rvtø angdong taq móng lvmang, paqzí dang rìtaq shvla dø jòdø dvzaqshì nø angdèò móngdàn svngvjú zílún we vsvng ílvm dvpat gø vrvm ò nøt mvsøn vdòng taq vshøp shàì nø dvzaq shàì wang dvtit tvle we yayáng naròe.

Add new comment

2 + 0 =