Làngré nvng shølshú

Làngré nvng shølshú

Shølshú wawe dang èshønvtò dvgvp shvngbè nø angdè nvng mvsing wanø lánshì sháìe. Døng jøng taq shølshú wawe nø vsvng shvngbe gø vrvm nvng singwe ínø angdè tiqgøò lvpat taq yadang nvng singnø døngjá ríràwe wa íe. Chapdap bvnlì rìtaq gø shølshú tiqgøò døngjá nø téwa rvzaq we íe. Téwa yadang nvng singnø làngré rìtaq cvnshì lvm gvzà ni vchyak we íe.

Cvmré lvpat taq kèní mvnshì nø gvcøp we dang vrvm rìtaq shølshú vgo wáshì dø tiqdvchá lvpat vsak tiqni mvdàm tiqni témvn shì rawe taq gø wedø ni bvnlì døngjá lòngnø angdè tiqgø taq rí vdu we wa íe. Shølshú shvlá vl we bvnlì taq wa jórlún we svng gø vto shì lún we svng síngshá dvzvŕ we íe.

Dènìò làngré nø nvpniò shølshú vgo wawe kà vlwe dø tiqdvchá vsvng tiqgø nø cvmré kèní vsak telong nvng nvng shánøt, zitnøt, síngnøt, rálnørì vshøp shìnø cvnshì we dang taq dvzaqshì we tiqgøò lvpat nø téwa lvjøm vl nø vpø ring longe. Shølshú wáshì gø taq paqzí vl nø rvwvl nøt vl nø wa cvnshúrì gø téwa mòngzøl dø vháng lúnlvm ílonge.

Shølshú wáshì we tiqgø taq vl vdu we nøt mvsønrì nø vsvngrì dvhø vzi vrùng wawe svng nøt màjáng shìnø bang mvnøcè shvzøm sháò we, vlíng vpo lvm dang svng vtoshì sháò we, tiqdá vsvngrì kaq nøt vtoā lúnò we, tvrà shølā we, tvrà shvlá svng tuqlún lvm nvngòn zí sháòwe, bvnlì døngjá rìsvng vtonø kámshì we dangrì taq kám vløm vrvmwe íe.

Vránø shølshú tiqgø taq vzàn lvp tuqrawe rvtø svng gø shønran we zitnøt vl lvm gvzàni vchyak we íe. Bat zìdang nvng vdu vbóng dø dvgø sháò we, vlíng mvnshì we rvtø làngcha rìdvhø taq kapà dangrì nø zømdang nø wá vdu we, móng lvmang, tóng layàrì dvhø vdu vbóng dø wáshì shálvm gø mvdøng vchyak we íe.

Vdè Myanmar móngdàn vdòng taq gø batzìdang svng yèlnø gvzàni mvhøt lvm vhømì we gø íe. Yadø íwe vdòng taq shølshúrì taqkèní gø vlù vlàngrì svng tvrà shvlá dvtanā lúnlvm gvzàni dvzaqshì ràwe íe. Làngrérì ò vpøwe rvtø rìsvng game gvcøp we, vjú mv vl dø internet phone rì taq wa rvtø dvbéshì dø mø:í lvm, vjú vl we lègarì rønø paqzí lashì, cvnshì lún lvm dangrì taq dvdamā nø dvgøā lvm gø vchyak we svng yánglún shìe.

Wedø íratnø jøng jøngni kámvm vrvm we shølshú shvlárì vl lvm gvzàni vchyak we dø tiqdvchá vlù vlàngrì gø we shølshú rìò tvrà shølwe taq cvnshú shvlárì ílúnlvm dvzaqshì ràwe íe. Wedø ínø wa mèpvng kaq raqpúm tvle shìlvm shølshúrì gø we døni vlømrà bønlún lvm wa ílonge.

Dèni batò làngrérì taq vdè móng vdè rvgaq dvpat móng lvmang, wulaq bvnlìrì, paqzí dang, svngpvn vtoq vtip we dangrì nvng shiqshvn dang dø íwe rì kadang taq té nvngòn yúmwe svng síngsháì we taq dvzaqshì nø zìdang dvhàng lvm dvdam shì rà we íe. Shølshú shvrà taq ripwe kàgø ínì gø cvm lvpat kèní téráì vsvng wa ínø vléshì sháò vsvngrì wa íe.

Wedø vzàng kaq vléshì bøwe rìsvng paqzí lushì nø shvdøng shì ràwe íe. Làngrérì taq tuq rawe vko vkáng rì svng tapshì nø wákàm shìwe nøt mvsønrì vl lvm wa vchyak we íe. Kadø íwe bvnlì døngjá rì taq dvzømshì vdu we ínì gø shóngnøt, rvwvl nøt kèní èwàò nø dèzaq shì we ínìnø tini rvtø taq nø shvla we angshí angwvt rì vto shì lún lvm wa íe. Vdè móng, vdè rvgaq, vdè dvcì rì dvpat vjú zílún we làngrérì bønlún lvm dvzaq shàì wangø dvtit tvle svngkà yayáng naròe.