Làngré nvng sing we

Nøngmaq cúnshàìwe Rvgaq yachàng mvdàmø vsvng pvn dvcìrì taq vlù vlàngcèrì téwa luqwe svng yánglún shìe.

Làngrérìò bvnlì døngjá rìnø rìngzì wamà rvgaq ínìgø, àngdèò dvcìrì dvhø taq ínìgø, shvngømré vdòng taq ínìgø gvzà vchyak we íe.

Wedø íwe tvràrì nvng singnø Svrabín koqkámpè Francis taq kèní vleá:mì we 2018 nøng October shvlá taq mònggvn móngdàn vrvm kèní svrado gvsarì nvng zìlàngrérì nvng singwe àngké gomidirì nvng mvngushì nø vrashì we lìpùng tiqlòng wàbøà we íe.

Welòng angké Gomvdi zùppung taq Myanmar móngdàn kèní gø Cardinal Charles Bo nvng svrado Francis Daw Tang gvsa ku vbá bøì we svng shálún shìe. Welòng zupùng taqkèní Svrabín koqkámpè Francisí (Christus vivit) wawe zìlàngré nvng singwe lìga bok svng dvkang bøa. Welòng lìga nø làngrérì gø vrvmí rø vdu we liga bok shvlá tiqlòng gø íe.

Wedø írat nø welòng liga bok taqkèní làngrérì nvng singwe nvngòn ziwe kàrì svng dvtit tvle lvm íe.

We lìgabok taq pvlàcè nvngòn ziwe"Kàngpè yesu nø cúnshìpè íe" wawe taqkèní pvngshì we svng yáng lúnshìe.

Yalòng nø dìnge, Kàngpè yesu nø nøngmaq gø vrvmò nøt mvsøn taq rvtø vrvm vl we íe. Làngrérì taq nøt dvshàlvm, nøt mvshøm lvm, svrelvm, jór nvngòn mvlúnì rvtørì taq làngrérì svng nøt mvsøn nvngòn zìe, shønran shvlárì ziwe íe.

Kàngpè yesu nø nøngmaq làngrérì nøt mvsøn vdòng taq kadvgvp gø vl-we ínø làngrérì svng nvngòn ziwe íe. Làngré wawe nø vhángwe zìdangrì svng dvdàm røn:òe, mònggvn zìdang nvng vdu vbóng dø bvnlì wálún:òe, zìdang dvháng lúnòe.

Shèrnø vnvpwe nøt mvsønrì taqkèní síngsháò we, dvsháza we nøt mvsønrì, cipshì sháòwe nøt mvsøn tasvng síngsháò we nøt mvsønrì, tasvng mvrà vroqke sháòwe, Yesu shóngshìwe laqyàrì taqkèní cúnshì sháòwe rvtø íe.

Làngré bat taq døngmvnwe tvràrì, kámnøt tvràrì, mòngzøl we tvràrìnø làngré lvpvtò vnvpwe rvtø íe. Làngré lvpvt nø angdèò lvpvt svng dvcøp lvjangshìwe rvtø gø íe. Wedø írat àngdèò lvpvt taq tvnù mangárì vhángdø gvlshì ràe, tiqdá vsvng nvng vdu vbóng dø vtoq vtip sháràe màshvla we angpvn pvn gvzámshì rawe taqkèní nøt shvdøng shvngángshìnø shvlá vtang dvzaqshì ràwe íe.làngré lvpvt nø Gvrayí ziwe jejú gømpaq tiqlòng gøíe.

Wedø íratnø vnvpwe làngré lvpvt svng vdè dvpvt wa mø:ínø vsvng shvngbeò lvpvt dvpat gø vjúzidø lángshì sháràwe svng síngshá ràwe íe. Vsvngtiqò lvpvt shagóngnø tiqni mvdàm tiqni témanshì we taq angdèò nøtmvsøn jàng laqyàrì gø shvladø vlíng vpo shìràe.

Làngrérìò nvngòn kùngàrì vlwe taqkèní mònggvn svng mòngzøl dø dvhàng ìwe dø tiq dvchá Gvrayò móngdàn dvpat gø vlù vlàngrì dvpat gø láng dvzaq shàì wanø zupùng taq Svrabín koqkám taqkèní nvngòn zíbøà we íe.

Welòng zupùng taq làngrérìò bvnchvtrì svng gø dangònø vrashì bøì we íe. Làngrérìò bvnchvtrì wawe taq mònggvn taq vlìwe làngré tiqmaq nø mvjàn gvsat we shvràrì taq vl vdu nø tvpnø shvnip shvnarwe vhømòe, màshvla we mvdòrì poqòe, nvm á:mòwe we vhø:mòe, vshuq waòwerì vhø:mò we svng nøt yòlìe wae.

Wewa mvtaq kámnøt tvràrì nvng singnø vdèò chyøm cúnwángrì taq vl mvlónò, shvnip shvnarwe vhømòe, gønshaq zíshì ràwe høqshaq vhø:mòe, tiqmaq taq shvnip shvnarwe vdòng dvgá rvsvngshì lvm tvràrì mvlwe vdòng mvgam màshvla we bvnlìrì wá vdue, vru rapvn á:maq pvnrì láng we nvmá:m vdu we gø gvzà vle.

Wedø íwe màshvla we bvnlìrì taq kèní angmaqò lvpat rì cøm gvyaqshì nø jàng laqyàrì tìnwe taqkèní batshì màram we vlù vlàngcèrìò lvpat tungrúng dvzvŕ we rìgø gvzà vle. Wewa mvtaq kámnøt tvrà nvng singnø, shvnip shvnarweí yaklvm bvnchvtrì vkøn we vdòng taq cúnshì we làngrérìò lvpat rìsvng dvdam nø tùbum dvbang shì lvm rìsvng mvngushì nø vrashì we svng shálún shìe.