Làngré rìò zitnøt rálnøt paqzí svng dvhàngì

Làngré rìò zitnøt rálnøt paqzí svng dvhàngì

Làngré rìnø chøm døngku, móngdàn nvng vsvng mvngpòng mvdòrì ò vzàng lvp dvpat vløm rà íe. Weratnø àngmaq svng dang vrvm taq vháng vlún lvm tvrà tóngā ràlonge. Móngdàn tiqmóngdàn ò vzàng lvp lvpat svng téwa vháng vlún dø roqgvrā lúnlvm nø làngré rìò bvnlì døngjá tiqlòng ni ílonge.

Móngdàn tiqmóngdàn vháng lúnlvm wawe nø we móng vdòng vlwe vsvngrì gø vrvm nø bvnlì kømzøp dø wálún we lún vkángrì lúnlvm ràlonge. Làngré rìtaq bvnlì lúnwe vko vkángrì, tasvng dvløt shøngjungwe taqkèní, paqzí dangrì taq, mvnwe dang taq téwa vháng lún lúngò nø àngmaq kaq nvngòn ziwe gø íe.

Dèni bat taq móngdàn tiqmóngdàn nø àngdèò móngdàn lvpat àngshvr dvpat vháng lúnlvm dvzaq dvkángshìe, we taq móng pø zaqshøprì taq mvdøng ripwe, wulaq tvrà taq mvdøng ripwe nvng paqzí dang yaq mvdøng gvlshì nø riqwe dangrì taq vlíng vpo mvn shì ráì. Móng pø zaqshøprì taq mvdøng ripwe nø tìnnø vmáng sháò we ínìgø vsvng nvngòn taq mvdøng gvlshì nø riqwe móngdàn nø ngàngdønge wae.

We vsvngrì taqkèní àng dvtàng tàng vháng dø wálúnò we mvtaq mvnwe paqzí tvrà rìtaq gø nvngòn kùngàrì vtán lúnò we íe. Wedø ínø wa móngdàn tiqmóngdàn dvpat vháng we zìdang svng tvrà shølā lún longe. Weratnø wedangrì dvpat cvndøng lvm tvrà 12 dang svng gø shvdøm we taq

1. Kùngà lúnshì we vm-aq pvnrì vm-aq sháwe làngré rì bøn lún lvm

2. Shiqshàn lvm dang taq cvndøng we, mvshì nø gønshøp we làngré rì bønlún lvm

3. Àngpè àngmè, shvngøt shú svra rìò shvngøt vjøn we dang taq cvndøng we làngré rì bøn lún ràwe

4. Vrù rapvn vm-aq we dang mvwá shì, vyá shì we

5. Làngré rì gø vrvm nø bvnlì wá mvyø we, shvrúng nøt vl we nvng paqzí dang yelnø dvzaq dvkángshì sháò we làngré rì bø lún lvm

6. Nøng maq shvnvng gùr gùr taq paqzí lashì shvla we mvnshì lúnwe taq shagóng shiqshàn lvm dang lúnshì we shvrà vl lvm

7. Zitnøt rálnøt rì bat zìdang taq cvnnø zílún we vl lvm

8. Tuqrawe dvcì cèrì, àngcø àngcè rì taqgø we dø vko vkángrì svng mvnā lún ràwe

9. Bvnlì wawe vsvngrì, gattøm rìtaq cvnnø paqzí zílún, tubùm dvbangā lúnwe móngøp vsúyaq vl ràwe.

10. Zìdang vháng we paqzí zùng rì, College, University rì pvngyàn poqā lún ràwe.

11. Làngré rìò mvnlún we paqzí dangrì taq vpø shvringā we, dvløt shøngjung bóy rì wáā lún ràwe.

12. Gat tøm rìnvng shvngkà rì téwa gwaqdø wáā lún ràwe dang rì íe. Wedø àngdè móng àngdè rvgaq wulaq bvnlìrì taq zitnøt rálnøt vl we vsvngrì luq lúnlvm dvpat wedø íwe bvnlì shvrà rì taa vsvngrì kaq lánglún, rip dvzvŕ we nø mvdøng rà vchyak we íe wawe dvtit tvle svngkà yayáng naròe.