Làngrérì ò kùngà

Làngrérì ò kùngà

Làngrérì ò nvngòn kùngàrì nø móngdàn tiqmóngdàn vrang we dang taq gvzàni vchyak we íe. Dèni bat taq làngrérì svng èyàngvtnò dvgvp àng mvdò dòrì wáshì weí dang vrvm bvnlìrì taq fvzøm dvzaqshì ráì we svng yánglún shìe.

Yadø mònggvn taq Covid 19 yóga zønlì vkønwe mònggvn dvjà taq èyàngvtnò dvgvp dvsháza, chutcháng bvnlìrì taq làngrérì shò shòwa dvzaqshì ráì we svnggø yánglún shìráì.

Yadø dvsháza bvnlìrì taq shò shò wa tubùm dvbangshì ráì we kùngàrì svng èyàngvtnò dvgvp gvzàni nøtshøm lvm dvbù lvm svng yánglún shì we íe. Zvndvtut gø we dø íwe bvnlìrì taq dvzaqshì lúnlvm dvpat gō nvngòn zí mvyøe. Yadøni dvtut wádvzaq shàì we ínìnø vdèmóng vdè rvgaq nø vháng vlún lvm wa ílonge. 

Wedø làngrérì ò mvdòrì svng téwa dvháng lúnlvm dvpat làngrérì taqkèní zømshìràwe tvrà 5 dang svng dvtit tvle lvm íe. 1. Jàng laqyà
Jànglaqyà shvlá lvm wawe nø vsvng tiqgø dvpat mvdøng vchyak we tiqlòng ni íe.

Jànglaqyà shvlawe vsvng tiqgø nø àngwa kùngà vlwe kámshìwe nøt mvsønrì zángshìe wae. Weratnø vsvng tiqgø taq jànglaqyà shvlá lvm nø gvzàni vchyak we íe. Wekvtwa vsvngí kám vlømvm rawe svng shvdøm mvyø we íe. 

2. Shò shò wa wáshìwe laqyà gvlshì ràwe. Yalònggø vsvng tiqgø zìdang vháng lvm dvpat vchyak we laqyà tiqlòng ni íe. Rúngdàng wawe vsvng tiqgø dvpat pàtiqpvn gø mvbøn long wawe kà vlwe døtiqdvchá jànglaqyà shvlá vlwe tiqlòng taq kèní wagø mvbøn long. Vsvng mvngpòng mvdòrì dvhø taq shò shò wa dvzøm dvzaqshì we shølshú bvnlìrì taq ripwe taqkèní gø vháng vlún lvm wawe shémo svng lúnshì we íe. Dèdamò we shønran yøpnvng taqwa rvtø dvdømòwe dø mø:í nø bøn mvyø we dangrì taq shvrúng nøt zángshì weí dvzaqshì ràwe svng shøn mvyø we íe.

3. Mvkrøm mvdøprì vl ràwe, yàlonggø dè tiqgø ò lvpat zìdang vháng lúnlvm tvrà taq vchyak we tiqdangni íe.

Yadø vháng mvnshì we mònggvn dvjà yalong taq internet bat íráì nø vdèò lvpat tvrà àngdè tóng dvzaq shàì we íe. Yadø màbóngwe tvràrì taq tiqdá vsvngrì ò shvlawe paqzí rìgø cvnshì ràlonge. Vsvngrì kadø dvzaqshì we, kadø bvnlì wawe øpkángwe tvràrì cvnshàì weí àngdë lvpat zìdang svnggø shvla dø vrangshì lún lúngìe. Ni vrvmò mònggvn dvjàrì, shvngkàrì svng tvpshì nø yel ràwe svng shvdøm we íe.

4. Dvsháza shóngnøt gvlshì ràwe, yalòngnø nøngmaq shvngbe rvcvngcèrì íshàwe døtiqdvchá gvray shóngnøt vdòng taq tubùm dvbang kéì we mvtaq yadø shóngnøt gvlshì wenø vdè kadø íwe tvrà taq èripwe ínìgø vsvngí kám vlømvmwe jejú svng vtoshì lúnlvm dvpat íe.

5. Mà shvlawe bvnlìrì taq svrenøt, shvraqnøt gvlshì shá ràwe, wedø màshvlawe bvnlìrì taq svrenøt shvraqnøt gvlshì nøwa wedang svng vyáshì lún lúngìe. Màshvlawe, vjú mvziwe dang vrvm svng vyáshì yelshì lúnlvm gø gvzàni vchyak we íe.

Shøn mvyø we taq màdvrádø mvpnøt zángshìwe, tiqdá vsvng kaq nyùmvmwe, mvrézanøt mv vlwe dangrì taq mvshóng wámshìlvm svng shvdøm we íe. Wedø mvgam màshvlawe bvnlì, jànglaqyàrì taq vyáshì nø dvzaq dvkángshì we tigø dvpat wa àngdèò lvpat tvrànø mòngzøldø vháng vlúnlvm íwe svng shvdøm we íe.

Vránø wedø shvlawe jànglaqyàrì, dvsháza bvnlìrì taqkèní vdè móng vdè rvgaq mòngzøl nø vháng lúnlvm dvpat móng lvmang bvnlìrì taq gø ripnø dvzaq shàì weí vdèmóng vdè dvcìrì ò vjú svng zílúnwe vlù vlàngrì bøn lúnlvm dvzaq shàì wang dvtit dvle nvngòn ziwe shvngkà yayáng naròe.