Lèga røwe taqkèní vjú vmyat lúnshì we

Dèni bat taq kagø ínìgø kàru lèga bokrì èrøshìwe ínìnø vjú lúnshì we svng dvtit tvle lvm íe.

Vsvng tiqmaq ínø lèga røwe taqkèní vjú lúnshì we svng mvsíng sháò. Lèga røwe nø rvtø bĕ-e, zè zè wa íe wanø lánshìe. Ínìgø lèga røwe taq nøt lúmwe vsvng tiqgøò lvpat nø vsak tenø svrøng ralong dvgvp Alzimer wawe yóga svng vgám lúnò we svng shálún shìe.

Alzimer yóga wawe nø mvzøng nyansvng yúm dvzvŕ we yóga tiqlòng íe. Lèga gvzà rø we tiqgø taq nø yadø íwe yóga svng vgám lúnò we íe.

Lèga røwe tiqgø nø angò gomørcì svng pvngyàn bvnlì wá dvzár weó vbóng we ínø radio tashìwe, sømla hang vngvt yàngwe mvdàm téwa shvla we svng shálún shìe.

Lèga røwe taqkèní angdèò lvpat svng téwa síngshá lúnshì we mvtaq àngdèò tuqrawe mèpvng lvpat taq kadø bøn daqwe rìsvng gø dvdam røshì rawe íe.

Wedø íratnø angdèò angcø angcèrì nvng rvmnvng rvmchangrì kaq svng lèga røwe taq dvzaq shìlvm nvngòn ziwe íring we vjú vra rì lúnshì longwe svng shvdøm we íe.

Lèga røwe taqkèní rvgaq yachàng mvdàmø dang angpvn pvn rìnø àngdèò gùr gùr taq vlwe svng yánglún shì longe. Dvsháza we nøtrì zángshì ranø vsvng nvng vtoq vtip we dang rìtaq gø chùn chùn wacè wálún shìlong we íe.

Cvmrérì taq ínìgø lèga røwe taqkèní nøt sun dvdam werì wálún lúngòe. Tiqdá vsvngrì nvng shvbóngshì shálún lúngòe. Wedø íratnø cvmrérì taqø lèga røwe nø gvzà vchyak we íe.

Pazí zùngrì taq ínigø lega røwe vsvng nvng lega rø mvwá shìwe vsvngrì dvhø síngsháò we dang màbóng we svng yánglún shìe. Lega røwe taqkèní lvpat zìdang vháng lúnlvm tvrà svng tóngshì we gø íe.

Wedø tiq dvchá chøm døngku tiqlong taq íra nìgø bvnchvtrì pvran lúnònø mòngzøl we tvràrì svng téwa lálún shìwe íe.

Lega røweí angdè nø angdè vlíng vpo shì nø angdèí èwaò we shvla we dangrì svng téwa síngshá shira weí mònggvn rvgaq svng téwa síngshá lúnshì we íe.

Lèga røwe nø àngdè taq bønshá shìwe nøt shok nøt mvgør lvmrì taq kèní gø shvyúm lún we íe. Vgomørcì kaq shiqshàn dvzár we ínø dèdamò we dangrì taq vléshìwe mvl nø shvla lvpsvng tùbumã we gø íe.

Wedø íratnø cvmré, làngré, shaqrérì shvngbe rìò lvpat taq vpønø ringwe vjúzí lún wenø lèga røwe taq kèní lúnshìe. Yadø vjúzi we laqyà shvlá tiq lòng svng cvnshì màdu má? Shagóng shiqshàn lvm vchyak wedø tiq dvchá nøt mvsøn gomøŕcì shiqshàn lvm gø vchyak we mø:í má? Yadangrì svng dvdamìnø cvndø dvzaqshì lvm wáshàì wawe dvtit tvle svngkà yayáng naròe.