Lv:ngàré àngcèrì vdáwe Angpè,mèrì shvdiqshì rawe dang

Lv:ngàré àngcèrì vdáwe Angpè,mèrì shvdiqshì rawe dang

Lvngàshvrécèrì svng dvkòm mvkoq dvtélvm svngnø dvdvm shì dángtè yùlwe mví. Gún dvtøp shìwe dø tiqdvchá
lvngàrécèrì nø svmàrécèrì mvdvm zòngláng shìwe, zòng cvnbóy krvtwe, nø, mvløt, nvng dvgá vrùra pvnri aqwe,
chvng vnán dà:márì lúnshìwe nvng sit dat jaq yógà bønwe témvlòng dang íe, wae.

Lvngàshvréò nønt mvcøn vhánglvm vshøm dang vle wanø paqzí vdèrìí shønò wesvng yánglún shìe.

1/ - Shøq pvng shìwe kèní - 6 nøng rvtø mvrim cvmrérì svng kagø'íté lónmóò nø Kagø' yáng kèní técvn
shìemá?

Angcè nø angmèri kaqté nønt wá shìwe íe. We mvrim rvtø nø angmè taq kèní vchvk mvdøng nø shúngnønt
taq kèní dvzøm mvkok lvm ràvchvk we íe. Angmèí dvzøm mvkok we dang nø angcè dvpvt nønt mvsøn
shiqshvn mòngzøl we angcè tiqgø ívme.

Angmèò shønwe kà, laqyarì nø angcèrìò kà shønwe, laqyarì ívme. Angmè yvngkèní vtoshì lúnlvmrì nø yarì
wa íe.

2/ - 6 nøng kèní 14 nøng - mvrim angcè svng kagø'íté lónmóòmá?

Vdèò angcè nø lvngàshvrécè tiqgø ímàn shìráì rvt a:ngí shá mvyø' werì svng cvnshì mvyø' ráì. Angmè svng
nøntwá shìwe ínigø Angpè kaq svng té nøntwá shì bø'ì we íe.
Angpèò kà, laqyarì nvng góng gwáò we dang svng mvdøm mvshá shìwe dø cvnshi lú:ngì we íe.

We mvrim taqnø lvngàshvrécèò vyèvchín mvdaq we dang svng shvgún shvring lvm nvng mvrézà shálvm,
mvshvla we dang svng màwalvm, vgámlvm angpè nø laqya shvlá nvng vldvtvn lvm vchvk mvdøng íe.
We rvtø rìsvng mèpvng taq lúnshilvm mví, Wervt bvnli taqwa dvzaq shìwe angpè maq dvdvm rae.

3/ - 14 nøng kèní 18 nøng mvrim rìsvng nø Kagø'yáng té nøntwá shìemá?

Angpèò kà, laqyarì mvdvm vdèò shvnvng gwrwang taq vlwe rvmnvng lvngrérìò laqyarì nvng waò we dang
rìsvng nøntlúm nø cvnshì bøe. (Kàshvdún) mvnshìwe rvmnangrì, tiqdø vlwe møtshú lvngli, mvkún lvngli,
svrarì, jushin svra rìsvng døngkūrvp mvdvm kám nø vlø'mshì yòlwe íe.

Wervtø taq angpè ni angmèí nø gvza nønt shvyvng shìnø gún dvtøp rae. Gvza vtù vgám mvdaq, nøntkøm
we lúnlvm dvpvt vra shìràe. Vdèò angcè nvng vráshì we rvmnangrì kaqsvng gø egùnò nø vgám rawe íninø
dvshaqí rvtø màlé ke vgám ràe. Vdèò angcè svng døngmvn dø tvrà shvlá shøl dvbvng we rvmnangrì
kaqsvng dvgòngzí shvring shvgún ràe. Dvgá dvbvng røtshì ràdaq ninø dvbvng gø røtshì ràe.

Angcè nvngàré vdáwe àngpè àngmèrìí cvmrérìò vsvk àng mvrim rvtø vrvm taq shvdiqshì lúnlvm, shiqshvn
mòngzøl nø zitnønt rálnønt vlnø vháng vlún we àngcè nvngàré shvdangrì svng dvkòm mvkok dvté lúnlvm
dvpvt dvtit dvle kà íe, mòngkà ètábø'shàwe shvngbèí mòngzøl shiqshvn we jèjú svng vtolelún nøng
shvngbe svng oqà.