Lvpat mvrùmè taq kratcǿn rawe rvtø̀

Lvpat mvrùmè taq kratcǿn rawe rvtø̀

Vsv̀ng lvpat wawe nø kadvgvp gø mvdóng døwa nø mǿí. Lvpat taq vdè shóngwámshì we jór lúnlv́m tvràrì vlwe døni nøt dat nøt vtanglv́m dø íwe tvràrì gø vl-longe.

Ínìgø vdèò lvpat svng dvløt shø̀ngjung bóy tiqlòng døni dvdutshìwe vsv̀ngrì dvpat nø wedø kratcǿm rawe rvtø̀ taq vrá kungshì nø vrá dvzaqshì ràwe dang shvdǿmnø nònggwòn ziwe gø íe. Shǿn mvyǿwe nø wedø dvløt shøngjung bóy taq vloqvmwe rvtø̀ taq vrá tiqkvt mvku:ngshì we vsv̀ng nø we shø̀ngjung bóy taq cǿm lv́m wa ílonge.

Vdèí mèdèdam bǿòwe yaklv́m shìwvtrì vkǿn rawe kvt wervtø̀ rì taq nøt màdvcv́m shìshaqí zv̀n dvtut dvzaqshì lúnlv́m nonggwòn zinø shvdǿmwe gø íe.

Kà wawe nø jadø ni vpǿe wawe dø tiqdvchá vdèí èshø̀:nò we kà taq cv̀nnø vdè lvpat taqgø wedøni cv̀n longe.

Vsv̀ng tiqmaq taq íranìnø vdèò lvpat tvnù manggárì shvladø gv́lshì we tvrà taqni àngmaq vdè ò ni vrv̀m lvpat tvrà taq kadø íwe bvnchvtrì vhǿ:mò we ínì gø we àngmaqò yøpnv́ng lvpat tvnù manggá svng zǿm shvngángshì werat tiqni rvtø̀ taqnø jór nònggwòn svng vtoshì lú:nò we gø íe.

Vdèò lvpat tvrà taq yakwe shìwvtrì taq svre nøt zang we vsv̀ngrì nø chvpdvp vdèò lvpat tvrà taqgø yvkwe shìwvtrì taqkèní àngmaqò lvpatrì svng vnǿn dvzv́r sháò wegø íe.

Weratnø vdèò lvpat taq kù:ngà vnǿnlv́m tvràrì vhǿ:mshì ralong rvtø̀ vrv̀m nø vdèò lvpat tvnù manggárì, shønran yøpnv́ng rì svng vnǿn dvzv́rwe mǿí vdèò lvpat tvrà taq jórlún lv́m dvpat nø vdèò nøt mvsøn, kù:ngà shaqrì taq cv̀nlongwe svng shvdǿm we íe.

Vdèò lvpat tiqboq tiq rvtø̀ cè taq vnǿn longwe, vloqvm we taqkèní vdèò lvpat tvrà yv̀nggùng svng zá vtøp dvzv́r we mǿí.

Wedø vdè lvpat taq yvklv́m àngpv̀n pv̀n sv̀ng vle lún wenø vdè lvpat tvrà sv̀ng paqzí mvkrǿm mvdøprì zílúnā wegø íe.

Lvpat taq vdè góng vdè kámnøt nvng dvdamnøt wawe dvlàrì gø gv́lshì ràwe íe. Vdèò lvpat taq vdè í lún ràwe manggárì dang svng dvdamshì nø nònggwòn lushì lúnlv́m gø vchvk longe. Vdèò dòngnøt mvsø̀nrì kèní shvrúngnøt rì nø vdèò lvpat tvnù manggá rìsv̀ng jór lúnwe kù:ngà rì sv̀ng gø vrangā lúnwe gø íe.

Add new comment

1 + 13 =