Lvpat sv̀ng vcǿm zíshì mvyǿwe nøtrì dvshérshì ràwe

Lvpat sv̀ng vcǿm zíshì mvyǿwe nøtrì dvshérshì ràwe

Nøngmaq tiqgǿ vrv̀mò nøt mvsø̀n kùngàrì nø tiqgǿ nvng tiqgǿ nø màbóngwe gø íe. Wedøni shvlawe dvdamnøt rì zángshì we tvrà taq gø vsháy longe. Mvhøtlv́m tvràrì svng tønzán we dangrì taqgø màbóngwe íe.

Vsvng tiqgǿ dvpvt pàgø mǿ:í wawe bvnchvtrì nø dvgá tiqgǿ dvpvt naqciqriqwe mvhøtlv́m shìwvtrì ku vlíng sháò wegø íe. Vsvng tiqgǿ dvpvt yùl yùlcèí vle lú:nòwe bvnchvtrì nø dvgá tiqgǿ dvpvt vtangshaq rvzaqwe yaklv́m shìwvtrì kugø bǿnsháò we íe.

Vsvng tiqmaq taq 10 nǿng dángte jórlú:nò we bv̀nlì tiqlòng tiqni rvtø̀ taq màdvdamshì dvrwe tvrà kèní nǿnvm we ínìgø nv̀mlat kèní pv́ngshì lv́m kùngà lushì lú:òwe vsv̀ngrì vl longwe ínìgø tiqmaq taq nø nøt vtangvm we bǿn dvzv́r sháò e.

Vsvng tiqmaq íranìnø vdèò shóngshìwe rvmjà nvng vkang vduvm we rvtø̀ taq rvtø̀ àngdòngcè wa nøt yòr we ínø̀ tiqmaq taq íranìnø rvtø̀ yvnggúng nøt zá, nøt yòrwe bǿn sháò wegø íe.

Weratnø vsv̀ng tiqgǿ vdè gong vdè shvtshì lv́m høqshaq bø̀n longwe kvt we shvtshìvm we vsvng kaq svng mvrà shvri lv́m mv-vl. Wedø shvtshì lv́mhøq shaq bø̀nwe bvnchvtrì nø vsvng tiqgǿ dvpvt lutshì lv́m tvrà lá mvlú:nò we høqshaq bǿnsháò we ínìgø tiqmaq dvpvt íranì nø welòng nø pàgø mǿ:í we bvnchvt íāò we svng síngshá ràlonge.

Wedø bvnchvt tiqlòng svng kazìdang høqshaq vdè nøt mvsø̀n kèní tøn zánlv́m, mvngan lún lv́m walòng nø vdè góng vdè taqni cv̀n longwe gø íe. Vdè shóngshì we àngnvm àngchangrì, rv̀mnvngrì kaqsv̀ng shóng shìnøt í àngmaq kaqsvng kupgvr lv́m, tubùm dvbangā lv́m nvng vpǿ shvring lv́m nø gvzàni vchak we íe. Àngmaqò dòngnøt kèní vchángshì rawe kàrì svng shvlawa táā lún ràlonge.

Vdè góng vdè svnggø we dø shagóng shvtshì lv́m høqshaq bungrawe dvdamnøt rì svng vgám gvsat lúnlv́m dvpvt vdè góng vdè shóngshì ràwe íe.