Lvpat taq jórlún lv́m dvpvt

Lvpat taq jórlún lv́m dvpvt

Lvpat taq jórlún lv́m dvpvt
Lvpat taq jór nònggwòn vtoshì lúnwe vsv̀ngrì wawe nø vsv̀ng tiq mvzuqcè dvpvt mǿí. Nà ngà nøngmaq shvngbe dvpvt dvgǿā shaq íwe lvpat manggá tiqlòng ni íe. Jór nònggwòn wawe nø pø̀ gv̀msùngrì í wvnshì shvla we tiqpv̀n gø mǿí. Jór nònggwòn lún mvyǿwe vsv̀ngrì shvngbe nø dvzaq dvkángshì we shaq kèní wa vtoshì lúnwe gø íe. 
Zìdang vhángwe zìdang sv̀ng tuq lúnwe vsv̀ngrì nø bv̀nlì sv̀ng wá kamshì we nvng toni ò lvpat zìdang kèní léshì lv́m dvzaq shìwe vsv̀ngrì taq kèní wedø téwa shvla we zìdang sv̀ng vtoshì lú:nò wegø íe. 
Wedø tòniò lvpat zìdang taq kèní tiq dvtang wawe lvpat zìdang sv̀ng yel mvkam shìwe vsv̀ng tiqgǿ dvpvt nø kratcǿmwe zìdang sv̀ng tuq dvzv́r sháò wegø íe. Vsv̀ng tiqgǿ ò lvpat taq wedø cǿm vnǿn we tvràrì vhǿmshì rawe dvgvp gvzà nøt dat nøt vtang lv́m dø nøtcv̀m rawe ínìgø welòng taqkèní paqzí lushì nø̀ dvtut dvzaq dvkángshì lv́m nvng téwa shvlawe mvkrǿm mvdøprì lushì lúnlv́m nø mvdø̀ng vchck wegø íe. We dø íwe tvràrì taqkèní cvnshì lúnwe dangrì nø vdè ò lvpat tvrà dvpvt shvla dø vjú zílún we paqzí mvkrǿm mvdøprì ni ílonge. 
Vránø jór nònggwòn vto shì lúnò vsv̀ngrì nvng lvpat kratcǿm we vsv̀ngrì dvhø̀ taq pà dang taq vsháy vme má wani vdè ò lvpat tvnù manggá wawe svng yv̀nggùn cvnnø̀ dvzaq shìwe vsv̀ngrì nvng we tvrà taq vhú vhwaq wáshì we vsv̀ngrì dvhø̀ taq vjú vtoshì lúnwe dang vsháyvm we gø íe. Vdè ò lvpat tvnù manggá tvrà sv̀ng kadvgvp gø zǿmshì nø̀ dvzaq dvkángshì we vsv̀ng tiqgǿ dvpat nø tiqni rvtø̀ taq we lvpat tvnù manggá wawe nø vtán long we wa íe. 
Lvpat taq vdè ò tvnù manggá svng jór mvyǿ we vsv̀ngrì tiqmaq sv̀ng èyv̀ngvtnò dvgvp àng tiqmaq nø àngmaq ò lvpat jór lúnlv́m tvrà svng shvrúng nøt vlwe ínìgø nøtrat shìlv́m, nøt løpshìnø̀ dvzaqshì lv́m tvràrì taq vnǿnwe yv́ngkèní vdè ò lvpat tvnù manggá svng gø jór mvlún we vsv̀ngrì gø gvzàni vl longwe íe. 
Vdèò lvpat tvnù manggá sv̀ng jórlún tuqlún lv́m dvpvt nø vdè tiqgǿ taqkèní wani dvzaq dvkángshì ràwe gø íe. Vsv̀ngrì dvhø̀ jór lúnwe wulaq àngkàngrì nø vsv̀ngrì dvpvt vjú vlwe bv̀nlì tvràrì sv̀ng nv̀mlat wáāwe ínø̀ wedø vjúrì taq cv̀nnø̀ mèpvng kaq àngmaq ò lvpat wulaq bv̀nlìrì shvngbe gø vsvngrì taqkèní kám vlǿmvm lúnwe nvng ngàngdøng we jór nònggwòngrì vtoshì lú:nò wegø íe. 
Weratnø̀ lvpat taq shvlá vtang nvng ngàngdøng we lvpat jór nònggwònrì vtoshì lúnlv́m dvpat nø vsv̀ngrì mvdàm gø shvla dø vjú zílún lv́m dvzaqshì ràwe nvng shvlá vtang dvzaq dvkáng shì lúnlv́m nø vchvk mvdø̀ng ni ílonge. Vdèò lvpat tvnù manggárì svng gø ngàngdøng dø gv́lshì lv́mgø vchvk longe. Lvpat tvnù manggárì vtoshì lúnwe dang taq tiqgǿ nvng tiqgǿ vsháy kewe ò àng mvtú nø we vdèò lvpat tvnù manggá svng tuqlún lv́m dvpat shvrúngnøt kèní dvzaq dvkáng shìwe nøt mvsø̀n kù:ngà taq cvnnø vjú vtoshì lúnwe dangrì taqgø vsháy vmwe gø íe.

Add new comment

19 + 0 =