Lvpat taq jórlún lv́m tvrà ò nv̀mlat hígám nø nøt mvsø̀n kèní íwe

Lvpat taq jórlún lv́m tvrà ò nv̀mlat hígám nø nøt mvsø̀n kèní íwe

Lvpat taq jórlún lv́m tvrà ò nv̀mlat hígám nø nøt mvsø̀n kèní íwe
Nøngmaq shvngbe nø lvpat taq jór mvyǿì we wa íshàe. Wulaq bv̀nlìrì taq jòr we vsv̀ng, nímzì paqzí tvràrì taq bø̀ngshv̀ngwe vsv̀ngrì bǿn mvyǿì we shvrúngnøt rì záng shàìe. Wedø vdè nvng vháng vsvr we lvpat zìdangrì kaqsvng tuq lún mvyǿì wenø nøngmaq vsvng shvngbe ò shvrúng we nøt mvsø̀nrì ni íe. 
Wedø íwe tvràrì taq jór nònggwòn vtoshì lún:ò vsv̀ngrì nø vsv̀ngrì ò shvrúngnøt tiqlòng ni íe. Wedang rì svng kadø wa jórlún we ímá wawe taq àngmaq tiqgǿ vrv̀m taq wedø jór mvyǿwe shvrúng nøt rì dòngnøt taq vshøp vkǿn we ínø̀ àngmaq tiqgǿ vrv̀m taq wedangrì svng jór lúnlv́m shø̀ngran yøpnv́ngrì vl we yv́ng kèní pv́ngshì wegø íe. 
Lvpat taq jór nònggwòn svng vtoshì lú:nò vsvngrì nø àngmaqò lvpat taq vhǿmshì we mvhøt lv́m shìwvtrì dvhø taq vle lúnò nø dvzaq dvkángshì we vsv̀ngrì ni íe. Vdèò dòngnøt mvsø̀n taq vkǿnwe shvrúng nøt rìsv̀ng chvpdvp bv̀nlì kèní gø ni vrv̀m, rvtø̀ vrv̀m dvzaq dvkángshì we vsv̀ng nø we àngmaqò lvpat tvnù manggá rìsv̀ng jór lúnwe ínø̀ kadø íwe kù:ngà vnǿn lv́m tvràrì nøt dat nøt vtang lv́m tvràrì vhǿ:mò we ínìgø nøt màdvcámshì shaqí dvzaqshì lú:nò we vsv̀ng rì ni íe. 
Nà, ngà nøngmaq shvngbe taq jór lúnlv́m vko vkángrì nø wedø ni rìn vrá vl we gø íe. Wedø ni mvril vrv̀m, rvtø̀ lvngcha vrv̀m taq jór nònggwòn wawe àngshì àngwvtrì sv̀ng gø vtoshì lú:nìe. Wedø jór nòggwòn rì wawe nø ànglvjø̀m rvnaqwe gø ínø̀ vdènø kadø íwe dang taq talent vl we nvng jór nòggwòn vlwe sv̀ng vdè tiqgǿ taqkèní rvcangshì lv́m vchak wegø íe.

Wedø vdè taqkèní rvcangshì bøwe bv̀nlì dvlàrì taqgø chvpdap dvzaq dvkángshì lúnlv́m gø rà vchak longe. 
Vdèò shvrúng nøt nvng jór nòggwòn wawe taq vdè lvpat taq kapà dang taq shvrúng nøt zangwe sv̀ng shvng shvng wa síngsháshì rà longe. 
Vdèí èwàò we kàpà dang taq ínìgø vcǿm mvzíshì nø wádvzaq shì dángte nø jór lúnlv́m vko vkángrì nø wedø ni vl longwe ínø̀ wedø nøt mvsø̀nrì kèní vdè kaq sv̀ng lvpat tvnù manggá jòr we wawe àngshí àngwvtrì svng vtoshì lún dvzv́r long wegø íe. 
Shóngshø̀ngwe shòlaqré vnvm vchangrì nøngmaq shvngbe taq jór lúnlv́m wawe lvpat tvnù manggárì nø wedøni tiqgǿ vrv̀m taq rìn vrá vlwe ínø̀ we nøt mvsø̀nrì taqkèní lvpat taq vdèò kù:ngàrì zángshàì nø dvzaq dvkáng shàì weí vdèó lvpat tvràrì svng shvla vtang vrang shì laqlúnì wang dvtit tvle shvngkà yayv́ng nvr:ngòe.

Add new comment

6 + 4 =