Lvpat taq vl sháshì ràwe

Lvpat taq vl sháshì ràwe
Lvpat taq yvklv́m shìwvtrì vl longe. Zá vtøplv́m tvràrì vhǿm shìlonge. Rvyù rvyúng lv́m tvràrì vl longe. Nøt dat nøt vtanglv́m dø íwe rvtø̀rì vl longe. Wedø íwe shìwvt rvmè vdòng taq tøn zánnø vle lúnlv́m nvng v́l sháshì lv́m vchak we íe. 
Vlíng vpo mvlún shìwe dvjàrì dvhø taq vl vdurawe kvt vdè taqkèní rvcvng shìlv́m tvrà vl longe. Vdè taqkèní nøt dvcv́m shìnø̀ vzing shìlv́m wá mvdaq long. Rvtø̀ lvngcha àng dvjàrì yvk longnø mvrø̀ rawe dvhø̀ taq ínìgø vdèò nøt mvsø̀n svng shvlá vtang gv́nshì lúnrà longe. 
Vdè lvpat svng mòngzø̀l dø vl lúnlv́m wawe nø vdè taqkèní kadø nøt mvsø̀n kùngà svng gv́l shìwe taq cv̀nlongwe íe. Dvgá tvràrì mvdàm vdè tiqgǿò lvpat tvrà dvpat téwa dvdamshì nø dvzaq dvkáng shì ràwe gø íe. Vdèò shagóng shiqshàn tvràrì taqgø svdiq vjáshì nø v́l shá ràlonge. 
Rvtø̀ lvngcha àng dvjàrì svng dvdamnø dvtøp shì shárà wegø íe. Vdè góng vdè síngshá shì ràlonge. Vle-vmwe dangrì svng chvpdap lvpat rvtø̀ àngni rì taq haqshaq dvdam shìlv́m wá màdu we svng síngshá shì ràlonge. Vdè lvpat tvrà svng zá vtøp dvzv́r we dangrì svng gur lúnrà longe. 
Vdè góng vdè lvpat svng shóngshì ràwe gø íe. Vdè ò lvpat taq lvpat tvnù manggá rì kagǿ taq ínìgø gv́lshì lv́m vchak we íe. Tiqdá vsv̀ngrì taqkèní shvyǿm rawe tvràrì svng tá nø nøt mvsø̀n kùngà vnǿn lv́m dø wáshì mvdaq. Vdè bǿn mvyǿwe dangrì svng vdè tiqgǿ taqkèní vrangshì ràwe gø íe. 
Lvpat taq mvbǿn daqwe dangrì svng nøtsun dvtøp shì shárà longe. Vdè tiqgóng dvpat kùngà vldø cúnshì shá ràwe gø íe. Vdè góng svng vdè taqkèní wa roqgvr shì ràlonge. 
Vdè góng svng vdè shóngshì we taqkèní vdèò lvpat tvràrì svng gø shvlá vtang vrangshì lv́m rà vchak we íe. Vdè tiqgǿ taqkèní pàdang taqgø jór lúnlv́m dvpat nvng vdè ò nøt mvsø̀nrì svng mòngzø̀l dø gv́lshì lúnlv́m dvpatrat vdè góng vdè v́l sháshì ràwe gø íe.