Lvpat taq yilshì ràwe dangrì

Lvpat taq yilshì ràwe dangrì

Vdèò lvpat taq kadvgvp gø dvzaqshì nø wámàdu we tiq tvrà nø tiq dá vsv̀ng kèní vdè kaqsvng yv́ng tv̀mvm radø mvwáshì lv́m nø vchvk we íe.

Vsv̀ng tiqmaq taq wedø íwe dangrì taq gvzà dvzaqshì nø wá shìwe laqyà v́l sháò we gø vl longe. Jøng jǿng taq wedø wáshì we laqyà vl we vsv̀ng tiqgǿ kaq svng kagǿ taqkèní ínìgø vpǿ nøt mvzángshì long.

Chvpdvp àng nvng mv́r høm vlwe rvtø̀ rìta wedø wáshì vdu rawe ínìgø dvgá tiqdang kèní nø àngkaqsvng kadø gø vpǿ nøt mvzáng shì longwe íe.  Dvshv́ngshì we laqyà nø vdè dvpat té vtangwe ngànshàpè íe. Vsv̀ngrì taqkèní mvshóng mvwámshì we tvrà svng tiqgóng nøt  kèní wáshì lòngnø vtangkèní mvhøt lv́m tvrà gø íe.

Vdè taq mv-vl we dangrì svng la vlradø, vsv̀ngrì nvng dvløt shvbóngshì we wáshì mvrà. Yadangrì nø dvshà mvhøt we tvrà svng bǿn dvzv́r we laqyà tiqlòng gø íe. Vsv̀ngrì taqkèní vdè tiqgǿ kaq svng vpǿ shvring lv́m wawe nø àngmaq taqkèní mvsat lú:ngò wewa íe. Tiqdá vsv̀ng kèní vdè kaqsvng kadø yv̀ng lv́m, kadø dvdut lv́m wawe nø àngmaqò nøt kèní wa vtàn lúngòe.

Vdè tiqgǿ nø kadángte vdá mvgàmwe nvng kadángte paqzí shawe dangrì vdèò nv̀nggøp kèní vtán mvrà. Vdèò dòngnøt mvsø̀nrì, laqyàrì taqkèní àngmaqí síngshá lú:ngòe. Vdè góng vdè cipshì we nø ìshøt tiqlong ni íe.

mv-vl we dangrì svng la vlradø wáshì we nøt laqyàrì taqkèní vdè taq vlwe toni ò nøt laqyà shvlárì gø vmv́ng sháò we íe. Dèni bat taq vsv̀ngrì nø social media kèní vdèò lvpat tvrà shvla we, vnvpwe dangrì svngwa tvnùngò nø vsv̀ngrì mv́r taq dvpèwe nvng dvshv́ng shìwe wáshìe. Wekvt tiqdang taq vsv̀ngrì tiqmaq dvpat nøtcv̀m nøtdat lv́m tvrà rì bǿn dvzv́r sháò we íe. Online taq yv̀ngshì we dangrì nvng vdèò lvpat rì shvbóng shì nø nøt mvsø̀n kùngà vnǿn we bǿn dvzv́r sháòe.

Yadangrì shvngbe nø vdè gó vdè dvshv́ngshì we nøt laqyàrì taqkèní pv́ngshì we dangrì gø íe. Weratnø vdègóng vdè shóngshì ràwe, vdèò chvpdvp lvpat svng vtoshì lúnràwe gø íe. Vdè tiqgǿ taqkèní shvlawe bv̀nlìrì svng èwàò we taqkèní tiqdá vsv̀ngrì ígø vdèkaq svng vpǿ shvring we svng vtoshì lúnlv́m ílonge.