Lvpat tvrà  vmvn rawe kvt 

Lvpat tvrà  vmvn rawe kvt 
Vle bǿìwe rvtø̀rì taq vdèò lvpat tvrà nvng singnø̀ nøt dat nøt vtang lv́m dø íwe shìwvtrì í gùr èkwang kenø̀ chvpdvp rvtø̀ høq shaq pàdang svng zǿmshì lv́m nvng kapà svng zv̀n dvtut wá dvzaqshì lv́m walong svng dvdam mvsháshì we høqshaq írawe vl sháshìe. 
Wedø bø̀nwe nø vdè tiqgǿò lvpat taqwa bø̀nwe nø møí. Vsv̀ng kagǿ taq ínìgø kadang shì lvpat taq vdá mvgàm nø paqzí vshøpwe vsv̀ngrì taq ínìgø wedø lvpat tvrà vmv̀n we rvtø̀ lvngcha v́l sháò wegø íe. Kapà sv̀ng zǿmshì nø̀ ka tvrà sv̀ng dìlv́m wawe sv̀ng dvdam mvsháshì we høqshaq bǿn shá ò wegø íe. Vdè dvpat lvpat tvrà dang vrv̀m nø lvjøm mv-vl wanø dvdam shì lv́m høqshaq bø̀n we rvtø̀rì gø vl longe. 
Lvpat taq wedø bøn longwe rì shvngbe nø rvtø̀ yvnggùn, pv̀nyv̀n bø̀n we mǿí. Tiqrvtø̀ høqshaq wa ílonge. Wedø lvpat tvrà vmv̀n rawe rvtø̀rì taq síngshá shìrà we dangrì taq yalòng nø vdè dvpat mvhøt lv́m shìwvt møí wanø̀ nøt dvkáng shì ràlonge. 
Tvrà vmvng nø vdèwa èvl we rvtø̀ rì taq dvdam shì ràwe nø ngà taqkèní tiqpv̀n pv̀n sv̀ng vlé shìwe íemá wanø dvdamshì mvdaq. 
Vdè taq lvpat tvnù manggá mv-vl nø lvpat tvrà rìgø vmvngvm we ínìnø welòng sv̀ng vtoshì nøt dvzaq dvkángshì ràlonge. Vdè góng vdè sv̀ng gø mvmashì lv́m vchvk e. kadø íwe shìwvtrì taq  ínìgø àng mvtú wawe nø wedøni vl longwe ínø̀ we àng mvtúrì nø tiq rvtø̀ taqnø wedøni yv́nglún shì longwe wa íe. 
Vdèò dòng nøt mvsø̀n sv̀ng roqgvr lúnshìwe nø vdè wani ílonge. Kapà dangsvng ínìgø vdè dvpat wálún we vsv̀ng nø vdè góng vdè ni íe. Wedø lvpat tvrà vmvn lv́mdø íwe vhǿmshì ralong dvgvp vdè góng vdè mvrà shvri shìwe vsv̀ngrì nø dang vrv̀m rì sv̀ng màshvla dø yv̀ngwe vsv̀ngrì nø lvpat taq cǿm vnǿn lv́m vsv̀ngrì ni íe. 
Vdè góng sv̀ng øpkáng lúnshìwe vsv̀ng wawe gø vdè wani ílonge. Weratnø̀ vdè lvpat taq vhǿmshì rawe nøt vtiq lv́m tvràrì kaq sv̀ng gø vlíng vpo lúnràwe gø íe. Àngdang dang taq màshvla we lvpkèní èyv̀ng lú:ngò we rvtø̀ rì taq vdè tiqgǿ taqkèní wá mvlún shì, mvdángshì we tvrà rì sv̀ng wa nøt gø vyuq shashì we íe.
Wedø ílongwe rvtø̀ rì taq téwa ngàí pàgø wá mvlú:nò, pàwálv́m ngànø yadángte kù:ngà vnǿn lóngà má wawe røt kàrì vdèò dòng nøt taq vkǿn longwe íe. Werat wedø ílongwe rvtø̀ rì taq vdè èjangwe, vdè taqkèní wá èlú:nò we tvràrì sv̀ng wa dvdamshì nø̀ shìwvtrì kèní lutshì lúnràwe gø íe. Vdèí èwá lúnò we dangrì taq wa nøt løpshì só:rí we tvrà rì sv̀ng téwa shvla dø kadøwa wálún lv́m wawe dang kèní dvdam shì ràwe gø íe. 
Rvtø̀ rì sv̀ng vwadø dvzø lv́m tvle vjú vlwe bv̀nlì tiqpv̀n pv̀n taq dvzømshì wenø vdèò lvpat tvrà dvpat téwa vjú zílún wegø íe. 
Tiqkvt kvt vdè taq nøt kù:ngà vnǿn lv́mdø íwe dangrì vhǿmshì ralong dvgvp vle bøwe rvtø̀ rì taq vdè taqkèní kapà vléshì yv̀:ngì wawe tvrà rì sv̀ng wa vrá dvdam shá shàìe. Welòng nø vdè kaq sv̀ng téwa zá vtøp dvzv́r wegø íe. Shìwvt wawe nø vsv̀ng gǿ vrv̀m taq bung rawe pv̀ng íwe rat vdè tiqgǿ taqgø wedø bø̀n rawe rvtø̀ rì taq dvgá rvmnvng rv̀mchang rì nv̀ng shvlá vtang vtoq vtiqshì weí àngmaq yv́ng kèní paqzí lushì we gø shvlá vtang lvpat cúnshì tvrà tiq tvrà íe.