lvpat tvrà taq gur ràwe tvrà rì

lvpat tvrà taq gur ràwe tvrà rì

nøngmaq vsv̀ngrì mvlúngka taq vdè góng vdè shvring shìnø vpǿ shì lv́m mvwá shàì. vdè góng vdè shvla we dang kèní yv́ngshì lv́m wawe mvdàm tiqdá vsv̀ngrì kaq téwa shvla we tvrà kèní yv́ng sháì wegø íe. vpǿ ìe, vdè ò lvpat tvrà taq mòngzø̀l dø byo byo cè v́l lúnlv́m dvpvt nø we dangrì svng yilshì ràlonge.

vsv̀ng tiqmaq taq vdè ò laqyà rì svng língshì màshvla we nø dvdam shìe. ínìgø rvtø̀ lushì nø dvzaq dvkángshì ràwe gø íe. lvpat tvrà taq kadø íwe dangrì svng yilshì ràlong we ímá?

vdè góng vdè mvrà shvri shì we laqyà mvwá shì lv́m vchvk longe. vsv̀ng wawe nø vlé shìwe mvrà nvng vsvr we vsvng wawe mv-vl long.

vdè góng vdè pà vjú gø mv-vl we vsv̀ng wanø̀ mvyv́ng shìlv́m, vdè ò lvpat tvrà manggá rì svng la tuq mvlún lóngò má? wanø vtiq nøt mv-vl lv́m, vdè góng vdè svng shvla we dang kèní vto lúnshì lv́m vchvk wegø íe.

lvpat taq dang vrv̀m nø shvlá vtang bǿn lún shvla we írvtnø̀ vsv̀ngrì taqkèní vzel shì rawe tvrà rì svng wa tánø̀ nøt vtiq lv́m tvrà mv-vl long.

àngmaqò kà rì svng tánø̀ kùngà vnǿn lv́m tvle vdè taqkèní kadángte høqshaq èwálúnòe walòng svng shvkse dvtan lv́m mang vchvk we íe.

vsv̀ng lvpat wawe nø dvløt gvzv̀m we tvrà rì vkǿn longnø̀ shìwvt rì vhǿm shì ralong dvgvp vdè taqkèní welòng svng tø̀n zán gvsat lúnlv́m vchvk we íe.

vdè lvpat tvrà dvpvt shøl shú shvlá wawe nø vdè góng vdè ni ílonge. wervtnø̀ vdè taq mv-vl we tvrà rì svng wa nøt vyuq nø̀ nøt dvsv́m shìlv́m tvrà mv-vl.

lvpat tvrà wawe taq vdè ò shvrúng we dang vrv̀m rì vtoshì lúnlv́m wawe nø mv-vl long. vdè taq kapàrì vl nø̀ tiqdá vsv̀ngrì taq mv-vl we nø̀ kapà rì íe walong svng dvdam dvtøp shì ràlonge.

lvpat tvrà svng byo byo cè v́l lúnlv́m wawe nø pø̀ gv̀msùng vl nø wa bø̀n we tvrà mǿí.

vdè ò lvpat tvrà svng byo byo cè èvl nø̀ vdè ò nøt cv̀mwe laqyà rì svng gur lv́m nvng vdè nø vjú mv-vl we vsv̀ng ǿnge wawe nøt mvgv́l shì lv́m nvng vsvng shvlá tiqgǿ bǿnlún høq dvzaq dvkángshì ràwe gø íe.

vle vmwe vdè ò lvpat tvrà rì taq vléshìvm we tvràrì kèní paqzí lushì, cvnshì nø̀ zàn dvtut dvzaq shì ràlonge. vdè ò shvnvng gur gur taq vdè kaqsvng tubùm dvbang shìwe, nøt mvsø̀n kùngà ziwe nvng tvrà shølā we vsv̀ngrì gvlshì ràwe gø íe.

vdè ò lvpat tvnù manggá taq zǿmshì nøt màdat dvzaq shì ràe. we tvrà svng tuqlv́m èdi we tvrà taq vdè taqkèní dèdamò dø mvbø̀n long dvgvp gø nøt dat, nøt dvcv́mshì lv́m tvrà mv-vl.

lvpat tvrà wawe taq vdè lvpat dvpvt mǿí nø̀ dvgá vsv̀ng tiqgǿ bø̀nlv́m jòr lv́m dvpvt wa dvzaqshì we gø wá mvdaq vsv̀ng lvpat wawe nø vdè dè ò lvpat wani íwe svng síngshá lv́m vchvk we íe.

vsv̀ngrì tiqgǿ vrv̀m nø vdè døni íe wanø̀ battut dvdam shìlv́m mv-vl, wervt vsv̀ngrì mvdàm wa vlǿm shìwe wagø wáshì mvdaq. vdè ò nøt mvsø̀n kùngà rì, zitnøt rvwvl nøt rì taqkèní lvpat tvrà svng jór lún høq dvzaq shì ràwe gø íe.

wedø jór lúnlv́m wawe gø rvtø̀ tiqlangcè vdòng taqni bø̀n lv́m svng wa dvdam shì lv́m mv-vl, rvtø̀ àngni, àngnǿng rì zíshì nø dvzaqshì ràlonge.

yadang rì svng cv́n dvgø̀m nø lvpat tvrà taq dèzaq shìwe tiqgǿ ò lvpat taqnø jø̀ng jǿngni jór nònggwòn svng vtoshì lúnlv́m íwe svng shvdǿm we íe.