Mòngzølwe tvrà

Mòngzølwe tvrà
   
Vsvng tiqgø ò lvpat taq gvlshì vdu we laqyà, mànggá 3 long vle. Werì taq 1. Mèpvng dvpat dvdamshì we
2. Mòngzøl we nvng nøt tøng nøtdøng we íe.

Yadang rì taqkèní mòngzøl we walòng svng shøn mvyø we íe.

Nøngmaq móngzøng cèrì shvngbe nø mòngzøl lvm walòng taq shóngshàì nø we tvrà taq rip lúnlvm dvzaq shàì we íe.

Pàwálvm yalòng svng shóng shàìe má? Kà shvbóng mòng mvzølwe chøm døngku, vrvm vrá we mvvl mvrìng, wamàrì taq kagø gø vl mvnvm long.

Nøt báwe, mòng mvzøl we, nvrøm vsorwe mvtaq shvnglut we tvrà mvvl we bøn dvzvŕ sháòe.

Wedø chøm døngku vdòng, móngdàn vdòng nvng vsvng mvngpòng mvdòrì dvhø màrvm màrá we, tasvng rvwìng we nvng tù vrèwe rì ratnø mòngzøl we tvrà mvvl we gø íe.
Mvdøng nø nøt mvsøn mòngzøl we tvrà mvvl ratnø téwa bøn dvzvŕ we íe. Nvmlat chøm døngku rì zìdang taqkèní vsvngrì tiqgø vrvm nø nøt mvsøn rì mòngzøl we svng lúnò we ínìnø we mvrìng, wamàrì nø mòngzøl lvmwa ílonge. Mother Teresa shønyàngì we dø tiq dvchá mòngzøl lòng svng chøm døngku taqkèní pvngshì ràe wae.

Àngdè shvnvng gùr gùr rì taq vzi vrùng wawerì vlwe dángte nø we shvrà taq mòngzøl lvm mvvl long.

Vsvngrì dvhø tasvng shvnip shvnvr kewe, lvpat rì shat kewe, dvki vrè we bvnlì rì gø gvzà ni mvhøt lvm svng bøn dvzvŕ sháòe.

Vsvng tiqgø nvng tiqgø nø tvsvng dvsháza shóngnøt walòng gvlshì mvlún dángte nø mòngzøl lvm mvvl long.

Weratnø vsvng tiqgø vrvm taq mòngzøl lòng vllvm wawe nø shvngbe mvdàm bvnlì døngjá vl longe. Welòng dvpat gø vjúrøt dvzaqshì ràe.

Cømsaq mòng zøllòng vtoshì lúnlvm dvpat wawe nø welòng kaq lúnlvm shvrúng nøt kadángte zángshì wawe mvdàmø cvnlong we gø íe.

Dvsháza shóngnøt walòng mvvl dángte nø mòngzøl lòng svng lúnshì lvm mvvl long wedøni dvsháza shóngnøt walòng taqkèní pà dang taqgø jórlún we íe.

Vsvng tiqgøò dòngnøt mv søn taq dvsháza shóngnøt walòng yúm rawe rvtø taq màshvla we nøtrì téwa nvngòn káng longe. Wedø màshvla we nøtrì íwa tasvng gvsat we ínìnø sømsaq mòngzøl welòng nvng téwa vsvr mvnshìvme.

Dèni bat nøngmaq vlì we vdè Myanmar móngdàn vdòng taq gø wedø nøtlaqyàrì í tasvng gvsat nø mvjàn rì dvbungò we gø àngyá mvzuq nøng gøm mvnshì ráì we svng síngshá rà bøì.
Àngdè tiqgø ò nøt kámshì lòng svngwa nøt dvzaq shàì nø shvrvm shvrá shìwe dang wá mvlúnì dángte nø wedønizàn dvtut vhøm lvm wa ílonge.

Weratnø nøngmaq shvngbe nø tasvng cipshìì we tvrà taq mvrà vroqā ke shálvm nvng dvsháza shóngnøt walòng svng shvngbe mvdàmø gvlshì lún lvm dvzaqshì ràlonge. Wedø ínøwa àngdèò chøm døngku vdòng mvtaq àngdèò wamà, rìngzìrì shvngbe nø cømsaq mòngzøl lòng taq cúnshì lúnlvm ílonge wawe dvtit tvle svngkà yayáng naròe.

#rvarawang

#youth

By: Gregory
 

Add new comment

4 + 1 =