Nàò rvtørì svng kadø lángshì lvm

Nàò rvtørì svng kadø lángshì lvm

Nàò lvpat rvtørì svng vwa dø bèvm nø vjú mv vl dø bøn dvzvŕ we rìsvng kadø wa pvran lvm wawe dvtit dvle mòngkà svng tashìlvm waì. 1. Nàtaq kèni ni vrvmò wárà we bvnlì shìpvn tiqlòng ègvlò. We shìpvn taq vldø chvk èwáò. Tiqniò bvnlì svng tiqni tangdáng wádèzaq shì. La dèniò bvnlì svng màdángwe vl ra nìnø nvpniò bvnlì shìpvn taq èzángò.

2. Nàtaq røyàng zida tiqlòng ègvlshì. Welòng taq bvnlì nvng singwe, rvmnvngrì nvng rvtø zíshì ràwe angni rìsvng mvsat nø mèzøngò. Welòng svng màpray dø ècvnò. We røyàng zida svng phone, computer rìtaq gø záng shìnø bvnlì rìsvng dètøpmò.

3. Wárà we bvnlì dvtírì svng nàruò, kadø wá mèyøe, kadø wá vdu we dangrì svng chvkwa dèdamò nø mèzøngò.

4. Bvnlì nvng singwe tvnù mangárì svng nàruò. Angdè ò bvnlì taq angdèò shánøt, zitnøtrì dvhángshì lvm dvpat cvnràwe dvrá rìnvng cvndøng tvràrì nàruò.

5. Angdèí dèdamò we bvnlì dangrì shvngbe svng wálúnlvm rvtøí mvluqpøn kerawe svng gø síngshá shìràe. Wedø íwe taq téwa vchyak we bvnlì svng rvsvng nø walvm, bvnlì rìsvng kalòng svng vzàng wàlvm nvng kalòng nø mèpvng wá vdu we svng dvtøp lvm.

6. Angdèò tiqni rvtø taq wávdu we bvnlìrì yøp rvtø, kat di we rvtø, lèga røwe rvtø, rvmnvngrì nvng vzøm vzap we rvtø rìnvng nvrshì we rvtø rìsvng chakwa shìpvn wáshì ràe.

7. Nàsvng nøt shok dvzvŕ we dangrì taqkèní èyvl shì. Nànvng mvsing we dangrì vjú mvzi we bvnlì rì, phone taq wa rvtø dvtøm shì we dø írì svng ènvrò.

8. Nàí dvdam mvlúnshì we rvtørì dvpat rvtø dègøò. Nà dírà we shvrà svng rvtø lu shì nø dègø shì.

9. Nà dvpat vchyakwe bvnlì taq nøt løpshì nø rvtø èzíò nø dèzømshì. Vjú mv vl we tvrà taq vlevm we rvtørì svng vrá tiq kat vtáng mv lúnshì we svng síngshá ràe.

10. Wá vdu we bvnlìrì dvpat cvndøng dvrárì egvl shì nø we dvrá vdòng taq chapdap èwào.

11. Tiqni nvng tiqniò bvnlìrì svng lèga taq nàruò nø dvtut wá vdu we bvnlìrì svng gø tvlú dègøò.

12. Nvrshì lvm rvtø ègvl shì, pàwálvm wani angdè góng shiqshàn lvm dvpat nvngòn kùngàrì vrá vwáng shìlvm dvpat gá høq nvrshì ràe. Shagóng nøt mvsønrì shiqshàn lvm dvpat gø mvnshì dang wáshì ràe. We dø ínø wa bevm we nvngòn kùngàrì vwáng shì lún nø bvnlì svng gø téwa dánglún longe.

13. Angdèò bvnlì svng yalòngnø ngà lvpat, shagóng dvkúm shøngwe bvnlì tiqlong íe wanøt kèní wáshì ràe. Nøt mèlúm we ínì gø mèpvng kaq nøt lúmlvm rvtø tiqlong svng caò dø wáshì we mø:í nø nvmlat rvtø taq kèní nøt shøm shøm wáshì lvm vchyake. Wedø ínøwa bvnlì dang taq jòr nø vhán lún lvm ílonge.

14. Vlíng vpo mvnshì we lvpat zìdang svng vto shì shárà we ínø vdu vbóng dø wáshì ràe. Tòniò cvn døng dvrá taq wa ècvn we dø mø:í nø vlíng mvnshì we lvpat zìdang nvng vdu vbóng dø wáshì shárà longe. We dang taqgø angdèò bvnlì nvng tok mvnø we dangrì svng rvcvng shìnø wáshì ràwe svng síngshá lvm paqzí dvkøm we dvtit tvle svngkà yayáng naròe.