Nà bøn mèyø we tvnù manggárì svng bøn lúnlvm kadø dvzaqshì ràwe

Nà bøn mèyø we tvnù manggárì svng bøn lúnlvm kadø dvzaqshì ràwe

Angdèò tvnù mangárì svng jórlún, tuqlún lvm dvpat kàpàrì dvgø shì ràe walòng svng síngshá shìlvm mvdøng vchyak longe. Vsvng gø vrvm taq ang taqkèní kùngà lushì, cvnshì nø vpø shvring vrvm we vsvng tiqgø gø nø shvngbe taq vl wewa íe. Wedø íwe vsvngrì ò lvpat svng yàngì nø tiqni taq wedø bønlún høq wanø dvdam shàì we taqkèní dvzaq shàì we taq tiqmaq nø tvrà rvwe rvm kèní nvrshì vmnø tvnù mangárì svng tuq mvlúnò we gø gvzà vl longe. We dang nvng sing nø cvndøng lvm tvrà tiqmaq svng dvtit tvle lvm íe.

1. Angdè góng angdè sháshì ràwe, nøngmaq taq angdè nø kapà bvnlì dang dvzøm shìnø kapà dang taq zømdàng nø vchyake, kazìang taq vlwe svng síngshá shì ràe. Ngànø kàdø íwe vsvng tiqgø øngà emá walòng svng angdè góng angdè dvtøp shìnø dvdam sháshì ràlonge. Nàò vle vmì rvtø rítaq kapvnrì bøn bøì nø kadø íwe zìdang rìtaq vsvng kaq vjú ziwe bvnlì wádáng shì bøì nø kadang taq vléshì we kùngà vnøn we, angdèí dèdamò we bøn mèyø we dangrì nvng kadø vsvr emá walòng svng dvdam shá shì dvzvŕ we íe. Yalòng nø vle vmì we rvtø rìtaq kadø bønnø, vkvt kadø íráì, mèpvng Kaq kadø bøn mvyø we svng síngshá lúnlvm dvpat dvtøpā we íe.

2. Té vtang we tvnù mangárì ègvl shì, ínìgø cvm vtang we manggá danggvp kèní wá èpvngò. Wedø wáshì lvm tvnù mangá tvràrì vl bøì má walòng svng dvtøp shìlvm lvm nvmlat dvtàng vchyak we íe.

3. Angdè góng angdè kámshì we vl ràwe, angdè taq chvpdap bvnlì wáshì we kèní bvnlì mvkrøm mvdøprì mv vl we ínìgø angdè íwákam shì we kámnøt vl lvm gvzà ni vchyak longe. Yadangrì shvngbe angdè taq vl bøì má? Mv vl we ínìnø vl høq wáshì ràlonge. Wedø èwáshì we tiqrvtø taqni tiqlvp kaq chvpdap wávløt shì lvm gø vchyak we íe. Angdè góng angdè kámshì nøt vl lvm wawe taq gø vsvng tiqgø taq chá vle angdè góng angdè kámshì nøt gvlshì long nø màshvla lvp svng vpo dvzvŕ sháò we svng gø síngshá ràe.

4. Kadø walvm wawe tvlú dvgøshì we lvmàngrì gvl shìlvm, angdè bøn mvyø we tvnù mangárì svng tuqlún lvm dvpat nø ka tvrà, kadø lvmàngrì kèní wá dvzaq shì lvm wawe lvmang rì mvti mvni dvgø nø gvlshì dángí we tvrà taqni cvndøng nø wálún lvm vchyake. Kadø íwe bóy, lìpùngrì walvm ínì gø lvmang tìyø mv-vl shaq nø kadø gø mvbøn we dø tiq dvchá angdèò lvpat tvnù mangárì svng dìlvm gø we døni dvgøshì ràlonge.

5. Àngdè góng angdè pvn vshat kùngà èlu shì, àngdèò lvpat tvnù manggárì svng jórlún lvm dvpat nø rvtø vrvm taq angdè góng angdè pvn vshat we nøt dvshérshì weí kùngà àngshár rìlún shìwe íe.

 6. Rvmnvng shvlá èlashì, tiqni rvtø taq nàí dèdamò we dangrì, manggárì svng jórlún lvm dvpat nø welòng tvrà taq èdiwe dvgvp angdè nvng vtoq vtip shì lvm rvmnvng shvlárì gø lashì shárà longe. Angdè ò lvpat bvnlì tvràrì taq èdi we dvgvp kadø nø jòwe, mvjò we warì svng paqzí zí, nvngòn zíké lúnwe rvmjà shvlá rì vl vdu longe.

7. Angdèò zìdang svng dvhàng shìrà we, yadang taq nø angdè góng tiqlòng svng wa shøn mvyø mø:í, angdèò bøn mvyø we tvnù manggárì svng dìlvm dangtaq rà vchyak we kùngà rìsvng zìdang dvhángshì lvm svng shøn mvyø we íe. Angdè taq kapvn, kadang taq kùngà vnøn we rà vchyak we dangrì svng síngshá shì we mv-vl ínìnø dèdamò we zìdang svng bønlún lvm yak longe.

8. Lèga røwe taqkèní cvnshì lvm, vsvng tiqgø taq lèga, kàrurì rønø zitnøt, shánøtrì vshøp shìlvm gvzà vchyake. Lèga røe wawe taq angdè lvpat nvng singnø vjú zílún we lègarì pvnyàn rølvm svng shøn mvyø we íe. Lèga gvzà røwe tiqgø nø vsvngrì dvhø taq vgo tiqchàng mvzán lúnò gø íe wawe shønkà vl we íe.

9. Shagóng shiqshàn tvrà svng gø cvndøng shì ràwe, shagóng shiqshàn we gø pàtiqpvn nvng gø shvbóng mvlúnshì we jejú gømpaq tiqlòng íe wanø shøn lúnshìe. Angdè góng shiqshàn tvrà mv-vl we tiqgø dvpat kadángte dèdamö tvrà rì shvlanø dègøò we ínìgø jòr we dang taq vtoshì lúnlvm mv vl long. Dèdamò dángte rìnø vshøng màshøng ívme.

10. Tvlú dvgø shì shárà we, cvn cvn tvlú dvgøsgì sháò we tiqgø dvpat bvnlì svng gø cvn cvn dánglú we svng shvngbeí síngsháì we dø tiqdvchá angdèò tvnù mangárì svng jórlún lvm dvpat ràwe dangrì svng tvlú dvgø shì lúnwe taq cvnnø gø angdè bøn mvyø we dang svng cvn cvn jórlún lvm ílonge. We dø íratnø vpøì we vnvm vchangrì angdè bøn mvyø nø angdè lvpat ò tvnù mangárì svng jórlún lvm dvpat nø mvdàm kaq tábøshà we dangrì cvndøng nø dvzaq dvkángshì lvm mvdøng vchyak we íe.

Bøn mvyø we tvnù manggá zìdang tiqlòng svng nøt taq wa gvlnø chvpdap wáshì we mv-vl we tiqgø dvpat nø welòng nø kadvgvp gø yøpnvng shøngran taq wa ívme wanø nvngòn ziwe dvtit dvle shvngkà yayáng naròe.