Nøt cvmnø nøt vtangwe vkøn Ra kvt kadø tønshì ràwe

Nøt cvmnø nøt vtangwe vkøn Ra kvt kadø tønshì ràwe Shóngshøng we

zìlàngré vnvmchvngrì angdè lvpat svng kadø wa dvcøp vrangshì ràwe íe má? Sún, wáng, nvmsì cún súngshú tiqgø nø angí kvtbøò we shøng, nvmsìrì télún, angshí angwvt rì zílúnlvm dvpat rvtø yanggúng vsúng dvzaqshì ràlonge. Pvløng pvlangrì nvng dvjáng zønli angpvn pvn rìkèní vgámnø vsúng dvzaqshì ràwe dø tiqdvchá ni vsvng tiqgøò lvpat taq gø angdèò lvpat shvla dø cúnshì lúnlvm dvpat nø shvla we lvpat tvrà svng rvcvng shàì nø lvpat bvnlìrì taq dvzaqshì ràwe wa íe.

Wedø angdèò lvpat tvràrì rvcvng shàì nø cvndøng dvzaq shì we taq jòwe, vléshìwe rì taq cvnnø lvpat zìdang jòrwe svng vto shì lún we taq gø vsvrvm we íe. Krvtcøm lvm vhømshì we rvtø taq nøt cvm lvm, yòllvm rìgø vhømshì longe. Yadø nøt datlvm vhømshì rawe nø angdè tiqgøò lvpat taq shøn mvtømshì høqshaq luqwe svng yánglún shìe.

Yadangrì taq kèní angdè lvpat taq pàtiqpvn svng gø nøt lømlvm mv-vl nø nøt dat lvm svng wa bøn dvzvŕ sháò we íe. Wedø bøn ràwe rvtø taq angdèò nøt mvsøn svng dvshat shìnø kùnngà lushì shá lvm shvdøm we íe. Angdè nøt mvsønrì nø nøt cvmlvm, nøt datlvm rìwa vkøn rawe ínìnø angdèí èwàò we bvnlì vrvm taq gø we døni vnøn dvzvŕ lúngòwe ínø we rvtø taq angdè góng angdè lvpat nø angdè nvng wa singwe írat yalòng svng kadøwa mvngàn lúnlvm wawe tvrà svng tóng dvzaq shì lvm vchyak longe.

Wedø bøn ràwe rvtø taq mòngzøl we shvrà svng di nø nøt shoklvm dangrì angdèò gomvrsì kèní èlùò dàngí bvnchvtrì tiqsvng mvtang kadøwa pvranlvm walòng svng dvdam shì shvla we íe. Vsvng tiqgø gø rat nø nà shvmná vsorwe ínìnø we shvrà, taq tùng èdinø mvrà vroqā we taqkèní gø angdèò shvmná nøt svng shvzøm lúnshì longe.

Angdèò nøt shømnø mòngzøl we taqkèní wa pàgø wádáng shìwe svng síngshá dvzvŕ we íe. Wewa mvtaq angdè nøshok nø nøt dat lvm vhømshì ralong dvgvp angdè shvnvng gùr gùr taq vlwe kùngngà vnøn vsvngrì kaq tubum dvbangshì we bvnlì rìtaq dvzømshì we taqkèní gø angdè nøt mvsønrì ngørngun lvm lúnshìwe gø vl longe. Vránø yadø nøt cvmnø nøtdat lvm long taqkèní angdèò shagóng shiqshàn lvm dang svng gø gvyaqshì sháò we íratnø yadangrì svng síngshá shìweí nøt dvshat shìlvm svng shvdøm we dvtit tvle svngkà yayáng naròe.