Nøt laqyà 3 dang

Nøt laqyà 3 dang

Shóngshøngwe vnvmchvngrì vsvng tiqgøò lvpat taq yaklvm, mvhøt lvm shìwvtrì wawe nø jøng jøng ni vhøm sháshìwe ínø tiqmaqí welòng svng mvngan mvlúnò weí lvpatrì cøm vmangvm we gø gvzà yánglún shìe.

Tiqgø nvng tiqgøò lvpatrì pàwálvm zìdang vsvrvme má wani nøt mvsøn kùngàrì màbóngvmwe rat íe. Yadang taq vhømshì we shìwvtrì taq cvnwe mø:í nø àngdè kámshìwe nøt mvsøn tvnù manggárì màbóngwe rat íwe svng yánglún shìe.

1. Vhømshì rawe shìwvtrì dvhø gvlshì we kámnøt manggárì 2. Tigø nvng tiqgøò dvhø taq gvlshìwe nøt laqyàrì màbóngwe 3. Àngdè tiqgøò kámnøt tvnù manggárì íe

1. Yaklvm, mvhøt lvm shìwvtrì dvhø gvlshì ràwe nøt mvsøn wawe taq cúnshàì we lvpat taq yadø yaklvm shìwvtrìnø wedøni vkøn ralonge.wedø vhømshì ralong kvt àngdè tiqgø dvpat shvlawe tvrà íewalong svng vto shì lúnrà longe.

Pàwálvm wani nøngmaq lvpatrì taq wedø shìwvtrì svng jórlúnnø shvlawe lvpatrì svng tuqlúnì we rat íe. Ínìgø wedø shìwvtrì svng yvlshì we tiqgø dvpat nø jòrwe lvpatrì svng vtoshì lúnlvm mvvl long. Tiqdá vsvngrìí vhømò we shìwvtrì svng pvranā dvbangwe taq shvrúng nøt vlwe ínìgø àngdètaq vhømshì rawe shìwvtrì svng íranìnø mvngan lvm mvkam shìwe vsvngrì gvzàni yánglún shìe.

Nøtsun paqzí vdèrìínø vsvngí dvdamòwe tvràrì svngnø dvdam we mvwàò. Vsvngrìí wá mvneshì we, sun dvtøp mvlúnòwe dangrì taq jór lúmlvm tvrà svng dvzaq dvkángshì rìwa ílonge. Nøngmaq shvnvng gùr gùr rìtaq híwur dvciqwe, mvkøm mvzøpwe vsvngrì gvzà vlwe svng yánglún shìe. Ínìgø àngmaqnø nøt mà dvcvmshì shaqí shvlá vtang cúnshì, dvzaqshì we svng yàngìnø kùngà lushì shvlawe gø íe.

2. Nøngmaq dvhøtaq gvlshì ràwe nøt mvsønrì wawe taqnø nøngmaq shvngbe nø vsvng mvngpòng mvdòrì dvhø taq, àngrì àngyàngrì dvhø nvng vtoq vtip nø vlràwe vsvngrì íshàe. Weratnø àngdèí èlúnòwe rvtø cè vdòng taq we vsvngrì nvng shvladø vtoq vtip nø vzøm lvm làngrérì kaq nvngòn zí mvyøwe íe.

Tiqkvt kvt tasvng síngsháā vléshàì we taqkèní tasvng vzømwe tvràrì vrølvm nø vzøm vzap tvràrì gø gvyaqshì sháò wegø íe. Nøngmaq shvngbe nø bvnlì wawe dang taq shvngbe dvpat wáa èlúnò we ínìnø nøngmaq dvpat mòngzøllòng svng lúnlvm wa ílonge.

Yadang nvng singnø St. Mother Teresa ò lvpat bvnlì rìsvng yàngìnø cvnshì lúnlvm gø shvdøm we íe. Shvngømré vrvm kèní shvngøt dvtú we taqgø nøngmaq rvcángcèrì nø vsvng shvngbe dvpat dvsháza bvnlìrì taq dvzaq dvkángshì ràwe nvng wedø bvnlì taq dvzaqshì we vsvng tiqgønø kadø íwe rvtø taq ínìgø nøt shvlømwe, mòngzølwe jejú svng vtoshì lúnòe wanø shvngøt vjøn we gø íe.

3. Àngdè tiqgø taq gvlshì ràwenøt laqyàrì wawe taq nøngmaq shvnvng gùr gùr rìtaq gvzà mòngzølwe, jòrwe vsvng tiqmaq svng yáng lúnshìe. Àngmaq svng èyàngvtnò dvgvp àngmaqnø vsvngrì mvdàm shóngnøt gvlshì lúnòwe,mvkoknøt vlwe vsvngrì íwe svnggø yáng lúnshìe.

Vsvng tiqgø vháng vlúnlvm tvrà taq àngdè tiqgóng svng tiqdá vsvng, zìdang vhángwe vsvngrì nvng shvdúnshì, shvbóng shìlvm mø:í. Àngdè tiqgóng svngnø àngdè wa shvbóng shì ràe wae.

Shøn mvyø we taq àngdè mvdàm zìdang vhángvmwe vsvngrì nvng shvdúnshì shvbóngshf wenø àngdè svng nøt cvm nøtrì bøn dvzvŕ sháò we íratnø àngdè tiqgøò dèni lvpat nvng tuqrawe nvpniò lvpat svng kadø shvbóng shì ràwe, zìdangrì kadøwa shvla lvp svng vlíng vpo mvnshì we svng wa shvdúnshì ràwe svng shøn mvyø we íe.

Weratnø àngdè tiqgøò ni vrvm vhøm shì raweshìwvtrì svng àngdèí mvngan lún ràweíe. We kvt wa àngdè góng àngdè kámshì nøt zøngrawe taq jór nvngòn gø vtoshì lúnlvm ílonge.

Bvnlì vrvm taqgø vsvng shvngbe dvpat vjú zílúnwe tvrà taq rip weí àbgdè riqgóng kaq tiqdá vsvng nvng shvbóng shì wedø mø:ínø àngdè tiqgøò lvpat zìdang kadø vlíng vpo shìlvm wawe tvrà taq dvzaq dvkáng shàìwe ínìnø jøng jøngni mòngzølnø jòrwe lvpatrì svng vtoshì lúnlvm ílonge wawe dvtit tvle svngkà yayáng naròe.