Nøt mvgør we

Nøt mvgør we

Vpøì we zìlàngré vnvm vchangrì nøt shok nøt mvgør we nø gø vrvm taq vlwe ínø welòng svng vgám we tvrà taq dang angpvn pvn taq kèní dvzaq shàì we wa íe. Angdèò ni vrvm bvnlì wàngrì taq nøt vtiq lvm, tiqgø nvng tiqgø tvsvng vtoq vtip we dangrì taq bvnchvtrì vlwe, pø gvmsùng dang taq nøt dvshà lvm, shagóng shiqshàn lvm dang taq nøt cvnlvm, bvnlì døngjá rì taq kèní nøt dvbum shàì we angpvn pvn vkøn we vhøm mìe.

Dènila vkøn we yóga zønlì rat nø nøt dvshà lvm vhømì we mvtaq dang angpvn pvn taq vnøn ráì we svng gø vhøm mìe. Wewa mvtaq vsvngrì tiqmaq taq dvki vrè werì nvng mvnyamvm we taqkèní nøt zàlvm rì vhømò we gø yánglún shìwe íe. Dèni bat vsvngrì zìdang vrvm taq stress wawe nø mvgør lvm lòngnø gø vrvm mvdàm vkøn we svng yánglún shìe. Welòng taqkèní nøt cvm lvm, shvmná vsorwe rì bøn dvzvŕòe. Welòng taq kèní angdè lvpat taq nøt shøm nø nøt byowe dangrì yúm dvzvŕ we mvtaq shagóng shiqshàn lvm dang taq gø vnøn dvzvŕ we íe. Làngdøm taq angdèò lvpat vsvk høq shaq vréshì sháò we íratnø yalòng svng shvyúm shì lúnwe dang tiqtungcè dvtit tvle lvm íe.

1. Angdèò døngku vsvngrì íwe angpè, angmè, angnvm angchangrì kaq svng møíni angdè kám vløm shìwe rvmnvngrì kaq angdè nøt mvsøn taq vlwe nøt dvshà lvm rì svng nàchàngò nø shøn vtànò weí paqzí lushì shvla we íe.

2. Angdè tiqgø wa èvl we rvtørì taq nøt shønran yøpnvng rìtaq wa dvdamnø rvtø dvbé shìwe dø møí nø angdè nøt lúmwe bvnlì rì taq dvzøm dvzaqshì ràwe.

3. Angdè góng angdè shóngshì nø lúnshìwe zìdang svng vtoshì lúnlvm, angdè taq vkøn rawe nøt shok nøt mvgør nøt svng yàngnø síngsháò we vsvngrì møíni cì svra rìtaq dvtàngshì nø dvmvn lvmrì wáshì ràwe svng shvdøm we íe.

Zìlàngré tiqgø taq angdè nøt svng dvcøp shvnángshì lúnlvm dvpat vsvng tiqgø taq vl vduwe nøt mvsøn nvng sing we paqzí rì gø cvnshì vdu we íe. Rvcvngcè rì taq gø angdè góng angdè nøt svng mòngzøldø vrangshì lúnlvm dvpat nø gvray kaq kám vløm we kámnøt kèní angdè lvpat svng apshì nø vjúrøt shì we taqkèní gø angdèò nøt mvsøn svng shvla dø dvcøp shì lúwe svng shvdøm we dvtit tvle svngkà yayáng naròe.