Nøt mvngø̀r, mòng mvzø̀l raweò àng mvtú

Nøt mvngø̀r, mòng mvzø̀l raweò àng mvtú

Ngàkaqsvng à:ngí mvwámshì bǿì má? Pv̀wálv́m àng ngàkaqsvng kàmvshø̀ bǿì má? Wawe àng mvtúrì svng nøngmaq tiqgǿ vrv̀m taq vtiqlv́m mvtúrì nøngmaq shvngbe taq v:lì wewa íe.

Mònggv̀n yachàng mvdàm cúnshàì we rvtø̀ taq vsv̀ngrì nvng vzø̀m vzvp vtoq vtip ìwe tvràrì taq nøt vtiqlv́m døíwe dangrì vhǿ:mì wewa íe. Vdènv̀ng tiqdø vrv́m we vsv̀ngrì vdèò dòngnøt taq kadvgvp gø zangwe vsvngrì taqkèní vdè kaqsvng tiqdang dang kèní vtøp dvzv́r rawekvt vdèò nøt mvsø̀n taq nøt mvngø̀r, mòng mvzø̀lwe dangrì vhǿmshì rawe íe.

Wedø írawe kvt vdè nø vdèwa vtiqshì nø røtkàrì taqkèní nøt shoklv́m tvràrì vl longe. Wedø vtiqlv́m tvràrì vkǿn long dvgvp nøt dvshàlv́m tvrà svnggø bǿn dvzv́r lú:ngò wegø íe. Nøt mvgø̀r lv́m tvrà svng bǿn dvzv́r lú:ngòe. Wekvt tvrà shutshì lv́m svng gø bǿn lúnò wegø íe.

Negative emotions wawe màshvlawe nøt mvsø̀nrì lvpkaq svng vlíng dvzv́r nø̀ Negative Energy wawe màshvlawe kù:ngà rì svng gø bǿn dvzv́r sháò wegø íe. Pàgø mǿ:íwe tvràrì yv́ngkèní bvnchvtrì dvbù:ngvtnòe. Jòwe, mvjò we tvràrì svng dvtøp mvsháshì we høqshaq bǿn dvzv́r lú:ngòe, dvsháza nøtrì, shóngnøtrì shvngbe svnggø shvmv́ng lúnò we íe.

Wedø vdè taqwa nvrø̀m dvbumshì lv́m tvràrì vkǿn rawe bǿnsháò we íe. Weratnø̀ wedangrì svng síngshá nø vsv̀ng tiqgǿ, rø̀mnvng tiqgǿ  vdè kaq vtoq vtiqwe tvrà vsháy longwe dvgvp dòngnøt taqwa dvbum shìlv́m mǿ:í cun dvtøp nø tvrà shvdøngshì lv́m mv̀ng vchvk wegø íe. Wedø írawe kvt

1 – àng, tiqdá vsv̀ngrì taq nøt mvngø̀r lv́m tiqpv̀n pv̀n vlwe íemá? Wawe dang svng nv̀mlat dvdamā ràlonge. Àngmaq tiqgǿ vrv̀m taqgø wedø nøt mvngø̀r, mòng mvzø̀l lv́m tvràrì v́l sháò wewa íe walòng svng síngsháā ràlonge. Téwa vdèò rvmjà rì taq gø wedø bǿn sháò wewa íratnø̀ wedangrì svng nøt shvyvngshì nø síngsháā lún ràwe íe.

2 – vdè lvpkèní shutshìwe íe má? Walòng svng gø dvdamshì ràlonge.vdè nvng mòngzø̀l dø vzø̀m vzvp, vtoq vtiqshìwe rvtø̀ nv̀ng yadø nøt mvngø̀r lv́m tvrà bung lungwe dvhø taq vde lvpkèní kadø íwe dangrì vléshì bøwe tvràrì svng dvdam síngsháshì ràlongwe íe. Àng mvshóngwám shìwe dangrì kapà wá vléshì bǿì má? Wawe dangrì svng dvdam dvtøpshì ràwe gø íe.

3 – vdè lvpkèní vléshì bøwe dangrì svng vdè taqkèní nímshì, mvrà chutshì lv́m vchak longe. Wedø vdèò shèrwe nøt mvsø̀n kèní nímshì, mvrà chutshì we ínìnø kagø ínìgø vdè kaqsvng mvrà chutā lv́mwa ílonge.

4 – vdè kaqsvng nøt vtiqshì we la íranì nø àngkaq svng rvtø̀ zí lv́m wáshì ràlongwe gø íe. Vdèò dangrì svng àngí cvn cvn síngshá lv́m vcháng dvzaqshì we wá mvrà wegø íe. Rvtø̀ lushì nø tiqdá vsv̀ng nøt zø̀mvm we dvgvp síngsháhøq vtàn lv́m wáshì ràwe íe.

5 – mvtú màdá cip lawe íranìnø welòng svng pànøt gø wáshì mvdaq nø yv́ngdàng, shvle dang wárà we íe. Vdè taqkèní àngwà dø vtoq vtip shìwe wárà wegø íe. Wedø vdè taqkèní àngkaq svng vtoq vtiqwe èwà lú:ngò kvt àngtaqkèní gø síngshá lú:ngò wegø íe.

6 – rvtø̀ mvme vléra we høqshaq ànglvp kèní vlíng rawe laqyà mvyv́ngshì we ínìnø vdè kaqsvng mvshóngwám shìvm we íe wanø vtoshì shvla wegø íe. Wedø ílongkvt kènínø vdè taqkèní gø àng kadø íbǿì we tvrà svng gùn dvtøp dá:ngí wedangrì taq àngnvng vdu vbóng dø vtoq vtip shìràwe gø íe.

Weratnø bvnchvt tiqlòng bung long dvgvp welòng svngwa dvdamshì nø nvrø̀m dvbumshì lv́mwa wáshì mvdaqwe svng shvdǿm wegø íe. Shvng shvng wa sháshì we rvtø̀ høqshaq gùn dvtøp ràlonge. Vdu vbóngwe zìdangrì taqkèní chávle dèda:mò nø nøt dvbumshì wenø vdèò nøt mvngø̀r, mòng mvzø̀l we tvrà svng tuq dvzv́r sháò wegø íe.

Vdèò nøt mvsø̀nrì ngø̀r byo lv́m tvrà dvpvt nø vdègóng vdè shóngshì nøt:í dvzaq dvkángshì wenø døngmvnwe mòngzø̀l lv́m tvrà svng tuqlún wegø íe.

By,

Gregory