Nøtratshì ràwe dangrì taq vhú vhwaq wáshì mvdaqwe

Nøtratshì ràwe dangrì taq vhú vhwaq wáshì mvdaqwe

Lvpat tvrà wawe nø yvklv́m shìwvtrì vkǿn rawe ínìgø vle lúnshìe. Vdè tiqgø kayv́ng ètuqwe, kapà svng zv̀ndvtut wàlv́m íe walòng svng tøp tøpwa mvsháshì we vsv̀ng vhú vhwaq vl-we vsv̀ng nø lvpvt tvrà vmvng we ínø téwa yakwe gø íe. Nøngmaq ò lvpat tvràrì taq vzànglvp svng kadøwa zv̀ndvtut díràwe dangrì vhǿm sháìe.

Chvpdvp bv̀nlì kèní nvrshì vdue má, màdumá? Wawe, vdèò vrv́mwe rvmjà gǿ nvng zv̀n dvtutgø vrv́m vdumá, màdu we ímá? Wawe, lvpat tvrà vháng vlún lv́m dvpvt kapà svng wá vduwe ímá? Ngàí wà:ngò we bv̀nlìrì nø jòwe tvrà ímá, vléshìwe íe má? Wanø vtiq lv́m tvràrì svng dvdamshì ràlongwe gø íe.

Weratnø,

1 . Vdèò nøt mvsø̀n sv̀ng shvng shvng wa gv́lshì ràwe

We mèpvngwa wá vduwe dangrì svng zv̀ndvtut wá vdu wegø íe. Pvran vduwe bvnchvtrì svng pvran lv́m wáshì ràlonge. Nøt shok, nøt mvgø̀r lv́m tvràrì vkǿnwe rvtø taq nøt èrat bǿò we dangrì taq vléshì sháò wegø íe. Nøtrat lv́m wáshìwe dangrì taq vzv̀ng dvdamnø̀ nøtratshì ràwe íe.

2. yaklv́m shìwvtrì vkǿn longwe nø jorlv́m tvrà svng tvpníshì we íe

Vdèò lvpat tvrà taq yaklv́m shìwvtrì vkǿn rawe ínìnø wedangrì kèní téwa shvlawe tvrà svng tuqlv́m níshì rawe íe we rvtø sv̀ng gvzà màléke tuqlúnlv́m tvrà íwe svng síngshá shìràe. Vsháng nv̀m, gálòng sv̀ng tuqlún lv́m dvpvtnø døwe yaqdø̀ng svngni vle ràlonge walòng svng vná mvdaq.

3. Shimvtuq rawe mèpvng rvtø̀rì svng wa dvdamnø nøt dvbumshì we wá mvdaq

Vdèí chvpdvp èwàò we bv̀nlìrì shvngbe nø mèpv̀ng tuqrawe rvtø̀rì dvpvt shvlá lv́m dvpvt dvzaq shìwe íe walòng svng dǿmshá ràlonge. Pàwálv́m wani vdèí chvpdvp èwàò we bv̀nlìrì vrv̀mnø tuqrawe rvtø̀ dvpvt kadø bø̀nlongwe svng tvrà tóngā longwe íe.

Vlevmwe dangrì svng vrá vtáng mvlúnshì wedø shi mvtuq rawe rvtø̀rì svngwa dvdamshì nø nøt dvbumshì wewa gø wá mvrà we íe. Chvpdvp rvtø̀ taq vlíng vposhì lúnwe ínìnø mèpvng tuqrawe rvtø̀ taqgø wedøni vlíng vpowe svng tuqlúnlv́m wa íe.

4. kratcǿmwe tvrà tiqlòng svngwa dvpèwe wá mvdaq

Vdè lvpat taq kratcǿmwe tvrà tiqlòng svngwa dvpènø vwadø rvtø̀rì svng dvzø mvdaq wesvng singshá dvzv́r mvyǿwe íe. Vdèò lvpat tvrà svng kadøwa vháng vlúnlv́m íe walòng svng tvrà lá dvzaqshì lv́mnø vchvk mvdø̀ng tiqlòngni íe. We kratcømwe tvrà lòng taqkèní màng paqzí mvkrǿm mvdøprì lushì shárà we svng shvdǿmwe íe. Wedø mvkrǿm mvdøprì taq cvnnø̀ vdèò lvpat taq kadø wa dvzaqshì vduwe tvrà svng màng lashaì ràwe gø íe.

Wedø mǿ:í nìnø vdè lvpat taq tiqdang dang svngwa dvpè nø lvpat rvtø̀rì svng vhú vhwaq vwadø dvzø lv́mwa ílonge. Bvnchvt shìwvt tiqdang dang svngwa dvpè we laqyàrì svng gø língshì lún ràlonge.

Vdèò lvpat taq vdèò nøt mvsø̀nrì svng shvng shvngwa gv́lshì we taqkèní vdèí kapà wá vdue, kapà svng wá mvyǿe wawe tvràrì svng síngsháshì rawe gø íe. We tvràrì taqkèní vdèò lvpat tvràrì svng shvladø cúnshì lúnlv́m shvdǿmnø̀ nònggwòn ziwe dvtit tvle shvngkà yayv́ng nvr:ngòe.

By,

Gregory