Ngà tvp kewe vnígøò mvshøl.

Ngà tvp kewe vnígøò mvshøl.

Dàrì mvrìng tiqmvrìng yvng ngà tvp,ngàlá kenø shv-vm shv-aq shìwe vnígø vle. Tiqyaq taqnø màdvdvm shìwe nvmbøng mvrù gvba wará ìnø, angní zúnshìwe kùngshí vpò bøì dvgvp tìvdòng rvmtaq vjá a:mì mèpvng, angní nø, dvshá yvngí wà tìlvng nø zùnlòng tiqyvng svng tuq bøìwe íe. We zùnlòng yvngnø nvmsì pvnrì, càrì, nvmpù nvmbànrì, vbà nvmbøn gvza shvlà nø, gvza vlboy we rvgvq tiq sharà gø íe. Weyvng angní nø vmlvm aqlvm mv-vl rvt nvmsì angpvn pvn svng vm nø vlke, tiqnì taqnø gvza vnvp we muqlvng dvzvr tiqgø dvtvn shìlúngì nø, nàní svng ngàí pà dvbvng ngà ràmá? Nàní kapvn eshòng shìmá? wanø røtnò ke, tiqgø ínø lvwan dø kùngshí tiqlòng shònge wa røtò nìnø, zangwa kùngshí tiqlòng tuqráì wae. Dvgá tiqgø svng gø nàkapvn shóngshìe má wanø røtnò ke nvmwacè dvdvmò nø nongngwà tigò èzíngà wanø røtnò ke nòngngwà tiqgò zangwa tuqráì wae.

Wekvt Kùngshí røt shìwe gøí, pàwalvm nànø nòngngwà le røtshì má? Chøm lolvm medvdvmò má? Wanø shønò ke Nòngngwà røtshì gøí nø íe, nganø ngàtvp kenø shv-vm shvaq shìwe bvnlì svng nvl shì lvm íe. Yàyvng nø tvmø dvmá dvzaq shìnø shv-vm shvaq shìlvm gvza vdùwe shvra íe. Wedø írvt ngànø yàyvng góngshà dvpvt laqmù, tvmø dvmá dvzaq shìnø vllvm ie wàe. Nòngngwà røtshì gønø we zìnlòng yvng tvmø dvmá dvzaq shìnø vdá mvgvm weí, mòngzøl nø vlboy a:mì wàe. Wávdù we dang: Gvràyí zìwe angrvtø, vkoq vkvng, jà gvmsúng, shvmán jèjú rì svng vpøò sórí, vjú vldø lvng leqlúnì. Vkoq vkvng nø vní baq mvtuq tiqbaq wa lúnshìwe íe, wae. Shvgùn Zàywà 77: 14 Nà nø dvdv̄m vtiqlv́m bv̀nlì èwàò pè Gvray èíe. Nà shaq kùngà èjòr we nø, Nàí vsvng dvcìrì dvhø̀ø̄ dètan bǿà, wanø mòngka yvng yánglún shìe.