Ni vrv̀m byo byo èvl

Ni vrv̀m byo byo èvl
Yani la taq nøngmaq cúnshàì we rvgaq shvnvng gùr gùr rì taq làngrérì mvngø̀r mvbyowe  dangrì yv́nglún shìe. Wedø mvngø̀r mvbyo we dangrì gø àngdang dang taqkèní yv́nglún shìwe gø íe. Paqzí dang nvng singwe, shagóng shiqshàn tvrà nvng singwe, wulaq tvràrì nvng vzø̀m vzvp tvrà rì dø íwe dang rì taqkèní mvngø̀r mvbyo we dangrì taq gvzàni yv̀nglún shìwegø íe. 
Làngrérìtaq àngmaqò dvdamshìwe tvnù manggárì vmvngnø tvrà vmv̀nwe taq mvngø̀r mvbyo we dangrì vhǿ:mò wegø íe. 
Vzànglvp lvpat taq kapà sv̀ng zv̀n dvtut wàlv́m wawe dvdamnøt rì vdòng taqni tvrà vmv̀mwe vsv̀ngrì gvzàni vl we sv̀ng gø yv́nglún shìwe íe. Ínìnø ni vrv̀m taq byo dø vl lún lv́m tvrà nø yakwe íe má wanø̀ røtlv́m vl longe. 
Ni vrv̀mò vdè lvpat taq byodø v́l lúnlv́m dvpat nø yakwe nø mǿí. Ni vrv̀mò vdè lvpat taq byo byocè v́l lúnlv́m dvpat nø vdèò nøt mvsø̀nrì sv̀ng shèrdø gv́lshì lv́m nø mvdø̀ng vchakwe gø íe.
Nv̀mlat dvtàng taqkèní nøt mvngø̀r lv́mdø íwe tvràrì vhǿmshì ralong dvgvp chàng welòng sv̀ng shvzǿm ràlonge.
Nøt mvsø̀n sv̀ng mvngø̀r mvbyo we tvrà sv̀ng bǿn dvzv́r wenø dòngnøt kèní ni bǿn dvzv́r we íe. Wedø nøt mvngø̀r lv́m tvràrì nø vdè kaqsv̀ng pà vjúgø zílúnwe mǿírat vdèò vgo mv́rcì taqkèní gurlv́m vchak wegø íe. Welòng tvle vdè shóngwámshìwe tiq dang dang mǿíni bv̀nlì tiqpv̀n pv̀n sv̀ng èwàò wenø vdè dvpat vjú zílún wegø íe. 
Mèpvng làngdø̀m vdèí wàlv́m kapàgø mv-vl longwe ínìgø vdè nøt sv̀ng shø̀mdø gv́lshì dángí nøt shvdøkshì we sv̀nggø wáràwe íe.
Yøp mvkáwe taqkèní gø vdènøt sv̀ng mvshiq mvshàn dø bǿn dvzv́r we írat yøp kádø yøp lv́mgø vchak we íe. 
Yøpwe tvrà nø vdè shagóng sv̀ng shvlá vtang nvrshìā we tvrà tiqlòng gø íratnø̀ yøp kádø yøpnø nvrshì we wáshì lv́m gø vchak we íe. 
Tiqni rvtø døp nøtshok nøt mvgø̀r lv́m tvràrì taqwa v́l vdubøwe yv́ng kèní welòng sv̀ng shvzǿā we mvwá shì we ínìnø vdè nøt mvsø̀n shagóng sv̀ng mvngø̀r mvbyo we bǿn dvzv́r wegø íe. 
Weratnø vdènøt mvsø̀n sv̀ng dvshérshì nø shagóng dvpvt mvnshìwe gø wá ràwe íe.
Nøt mvngø̀r lv́m vkǿn rawe rvtø̀rì taq shagóng dvshérshì we vtì zv́lshìwe wáshì lòng gø nøt mvsø̀n sv̀ng shvzǿm dvshérā lúnwe íe. 
Mvdø̀ng vchak we tiq tvrà nø Social media sv̀ng vjú vldø lángshá lv́m nø gvzani vchak we gø íe. Dèni bat taqnø Social media wawe sv̀ng mvlangwe vsvngni mv-vl we dángte íe. Wedø Social media taqkèní nøt mvngø̀r, mòng mvzø̀l lv́m tvràrì gø gvzàni vlwe gø íe. 
Wedø íratnø̀ vdè tiqgǿ taqkèní màshvla we tvràrì sv̀ng yølshì lúnlv́m gø gvzàni vchak wegø íe. Social media wawe nø vdè ò tiqlvpat mǿí walòng svng kadvgvp gø síngshá ràwe íe. Vdè tiqgóng nvng dvgá tiqgø kaqsv̀ng kadøgø shvbóngshì lv́m mv-vl nø vdè tvrà taq vdè ni shvlá vtang dvzaq shìlv́m gø vchak we íe.
Vdèò rv̀mnvng rv̀mchàngrì nv̀ng vzø̀m vzvp vtoq vtiqshì lv́m gø vná mvdaq long. Vdè taq bø̀nwe nøt mvngø̀r lv́m tvràrì sv̀ng rv̀mnvngrì kaq shǿn vtánshì we nø welòng sv̀ng shvzǿm lúnlv́m tvrà sv̀nggø tóng lúnwe gø íe. 
Vdè tiqgǿ wa èvl we taqkèní rv̀mnvngrì nv̀ng vzø̀m vzvp, vtoq vtipwe nø téwa nøt mvsø̀n mòngzø̀l lv́m tvrà svng lúnshì wegø íe. 
Vránø vdèò shagóng dvpvt ám-aq shvlárì ám-aq lv́mgø laqni vchakwe tiq tvrà gø íe. Ám-aq dvrè shvlá rì ám-aq we taqkèní gø vdèò nøt mvsø̀n sv̀ng shiqshàn dvzv́r lúnwe gø íe. Welòng nø shagóng dvpvt nv̀nggùn kùngà, shiqshàn dvpvt tubùmāwe mvtaq nøt mvsø̀n sv̀nggø ngø̀r byo dvzv́r lúnwe gø íe. 
Yadangrì shvngbe nø vdèò ni vrv̀m lvpat taq nøt mvsø̀n mòngzøl nø ngø̀r byo dvzv́r lúnwe tvràrì gø íe. Yarì shvngbe sv̀ng cv́n dvgøm lúnlv́m dvpvt nø yak we tvrà mǿí werat nøngmaq shvngbe ò ni vrv̀m lvpat rì sv̀ng mòngzø̀l dø cúnshì laqlúnì.