Ongwe shvzøngkùng

Success in Marriage
Ongwe shvzøngkùng
          
Døngku shvzøngshì we kùng taq onge wawe nø àngdè shóngwámshì we rvmjàpè/ mè nvng shvzøngshì èlúnò weó vdángvm we mø:í. We àngdèò lvmboqpè/ mè nvng nøt vzømnø shvla vnvpwe tvrà taqkèní vtoq vtip dáng:í shvzøngshì we kùng welòng svngwa shvzøngkùng onge wanø shøn vdu longe.
          
Shøn mvyø we taq døngku tiqlòng svng shvzøng shìbø mèpvng døngku vdòng vlnvm vlbyolvm dvpat wanø pø, gvmsùng kadø vdá mvgàmlvm, zaqshøprì kadø vnvng lúnlvm wawe mònggvn zaqshøprì taqwa nøtløp shìnø døngku vdòng taq shóngnøt vzømwe dang vnøn we dangrì bøn sháòe.
          
Ínìnø vrá dvdamshì ràwe taq yadø mònggvn dvrèrì yaqwa rvtø zíshìnø yadøngkuò manggá íe má?
          
Døngku shvzøngkùng taqnø dvciq lvpat shóngshìwe kàciqrì ratshì bønø chvpdap taq íranìnø mònggvn zaqshøprì taqwa vlínwe bøn sháòe.
          
Wedø íratnø tiqgø nvng tiqgø dvhø gvlshì bøì we kàciqrì cvndvgøm lúnlvm dvpat shònígø taq døngjá vlwe íe. Yalòngnø tiqdvciq cvndøng ràwe kàciqrì ni íe. Mònggvn dvjàrì taq byowe tvrarì vlwe døni shìwvtrì vkøn rawe gø vhøm shìlonge. Wedø íralong dvgvp shóngnøt kàciqrì vrøl sháò we ínø kadvgvpgø welòng svng dømshánø cvndøng lvm síngshá ràwe íe.
          
Døngku tiqlòng taq we døngkupè/mè àngní dvhø sexual faithfulness wawe shagóng vzømwe dang taq svdiqdøng nø shèrwe nøt mvsøn gvlshìlvm nvng tasvng síngsháā weí nøt vtoā kélún lvm nø mvdøng vchyak we íe.
          
Vsvng gøvrvm taq tiqdang dang taqnø kùngā vnønwe vl_longe. Vléshì sháì wewa íe. Wedø íralong taqwa ciplá kelvm mø:í, tvsvng tubùm dvbang kenø roqgvr kélvm svng wáshì ràe.
          
Ongwe døngku shvzøngkùng ílúnlvmrat nø vrám vráwe shóngnøtí vzømwe nvng døngku dvpat rvtø zíshìwe kèní vrangshì ràwe svng shvdøm we íe.
          
Àngdèò lvmboq gø nvng nøttøng nøtdøng we taq shóngnø vzømwe nø ongwe døngku svng diwe tvrà íe. Døngku tilòng taq tasvng síngsháā kélúnlvm dvpat nø rvtø lushì, rvtø zíshì ràlonge. Tiqgøí dèdamò we dang nvng tiqgøí síngsháò we dang màbóngvmwe ínø wedangrì svng dvtøplvm síngsháā kélvm dvpat nø rvtø àngdongcè taq kadøgø mvbøndaq long. 
          
Ongwe døngku bønlúnlvm dvpat nø we døngku vdòng taq tasvng makewe mv-vl dø dang vrvm taq shvng shvng wa vchangshì, vrashì ràwe íe. 
          
Døngku tiqmaq taq àngdè nøt tiqlòng svngwa cvnweí døngku vrølnø vkangvmwerì gø gvzà yánglúnshìe. Døngku vdòng pø, gvmsùngrì dvzøòwe, svdiq mvdøngwerì nø àngdè tiqgøò nøt svngwa cvnshìwe ò àng mvtú rì íe.
          
Vránø døngku vdòng taq tvsvng vpø shvring kewe gø ongwe, shiqshàn we døngku svng bøn dvzvŕ we tvrà íe.
Weratnø døngku tiqlòng taq shóngnøtí tasvng vpø shvring kewe, shèrwe nøt mvsøn gvlshì we taqkèní dvzaqshì we ínìnø ongwe shvzøng døngku svng lúnshìwe íe wawe dvtit tvle svngkà yayáng naròe.