Pèmè maqò shóngnøt.

Pèmè maqò shóngnøt.

Dènì nø nvrøm dùng taq pèmè maqò shóngnøt wawe kàgo taq kèní dvtit dvlè lvm íe. Pèmè tiqgø nø Angcø angcè rìsvng dang vrvm

taq kèní shóngnøt rì zílúnò wedø tiq dvchá tiq kvtkvt nø shóngnøt rì dvtvn mvlún shìwe rvtø rìtaq pèmè maq nvng angcø angcè rìò

dvhø taq nøt vsháí nø shóngnøt rì vmàng we tvrà rìsvng shaqrìígø vhøm bøshà we íe. Pèmè maqí shòngwe shóngnøt svng cvmrérì

ígø sing shálvm vchvk we íe. Dvdvm sháràe. Kømzøp we tiqgø mvínì gø gvza nøtyvng nøntcìp shìnø mvra rìsvng shutnàe, shvdiq

døng weí màling màpò we shóngnøt gvba taq kèní dvzøm mvkoq we íe.

Pèmè maq yadø dvdvm we gø vle. Cvmrérì nø Pèmè shøngnøt svng dvdvm sháò má? Vkvt dø (စည်းကမ်း) wawe dvrá rìsvng angmaqí

mvshòng we ínìgø vsvng tiqgø nø dvrá စည်းကမ်း vdùng taq vlshá lvm gvza vchvk we íe. Dvrá wawe nø vsvng tiqgøò lvpvt vháng lvm

nvng vsvng rì dvhø taq nøt tøng nø shvla we dang taq sún shì dvzvr we tvrà gø íe. Wedø mvínìnø kapvn wàlvm gø mvsháò vhó vhoq

vl lù:ngè. Angpè angmè maq svng bat tvng vtù we dang bønshà daqe. Shóngnøt mvdøng kèní bønwe dvrá dang nø mvrà chutnà we

tiqgø nvng tiqgø vtù lvm mv-vl, dvdvm sháshì nø lvpvt svng shvle lvm vchvk we íe.

Pèmè maqí vkvt dø wàò we cvmrérì svng shò:ngò rvt íe wawe svng angmaqí sing sháò má?

Pèmè maqí cvmré rìsvng yatlvm vhøm dvzvr we tiqgø gø mv-vl. Yatwe shìwat taq kèní lutlún dvzvr mvyø we rì wa íe. Kadang tè tatwe

ínøgø tiqdø dvzaq shìnø shvle lúnlvm rvtø vrvm taq dvzaq shìlvm nøt zvng we íe. Cvmrérìí dvdvmò we tiqpvn, pèmè níí dvdvmò we

tiqpvn ídaq we rvtø rìtaq krvtsøm vlshà daqe. Angcø angcè rì dvpvt gùngwe gvmsòng lúnlvm rvtø gvza vle høq dvzaq shìrvt, pèmè

maqnø cvmré rìsvng (Focus) rvtø zí mvlúnò we gø vl shàe. Tiq chøm vsvng ámaq lúnlvm, vllvm, gúng gwá lúnlvm dvpvt gvza dvzaq

shìrvt íe. We kvt wa kømzøp daqe, nøntcvm mvrà dø vllún shì lù:nge. Cvmwe rvtø taq kèní télù:ngì høq cvnshì lvm vchvk we íe. Wedø

mvínìnø tín mèpvng gvza yatlú:ngì dvgvp wa nøttøn shìlvm vl daq ke sing shá daqòe. We dvgvp nø mvrøng shì pvng krvt bøì we íe.

We dvgvp nø pèmè shøngnøt svng téwa sing eshá daqòe.

Angcø angcè rì krvtsøm we rvtø taq pèmè maqò shóngnøt nø màmvng we èshá nøng má?

Kà shvdún - Bòlúng gvsop we bóy tiqboy taq vdèí gvza shò:ngì we tiq mvdò íe. Gódap we pè nvng dvgá gvsop we gø' vrvm nø gvza

bøne, dvgá mvdò vrvm svng dá:ngòe, wedø bøn we mvdo rìsvng vsvng gø' vrvmí shò:ngìe. Wedø ínìgø we mvdø nø mèpvng taq

súm wa súm lú:ngì nø nvnggùn zí mvkàm shì we dang shóng gø mvshòng bøì we íe. Pèmè maq nø wedø mví. Vháng we rvtø krvtsúm

we rvtø rìtaq ínìgø angmaqò shóngnøt nø màmvngvm wawe svng sing shá ràe. We rvtnø vdè lvpvt svng shóngshì ràe, tatwe, byò we

rvtø rìtaq Pèmè maq nvng tiqdø vl ràe. Angcø angcè rì byò we rvtø rìnø pèmè maq nvng tiqdø vlwe rvtø rì íe. Vdèò lvpvt svng

shóngshì ràwe svng cvnshì lúnò dø tiq dvchá angcø angcè rìsvng gø wedø shóngnøt zvng lvm dvpvt pèmè maqò shóngnøt taq

kèní dvlú dvgø ànø mònggàn taq nøntshøm nøtbyò dø vllún lvm dvpvt dvtú we íe.