Pvngkrat we tvrà

Pvngkrat we tvrà

Rvtø gvzà vle nvmcè wáshàì wawe kànø rvtø svng màpøì wanø èshønwe lvjøm nvng vbónge wae. Tiqlòng lòng svng ècaò we nø vtang shaq nøt mvyanglvm bøn dvzvŕ we ínø zùpung rvtø pvngkrat we, mvsatshì rvtø taqkèní pvngkrat dø tuqrawe dø íwe bvnlìrì taq shvlawe manggá svng mvtuq lúnì wegø íe.

Wedø rvtø svng màpøì we taqkèní tiqgø nvng tiqgøò dvhø taqgø tasvng màpø kéì we tvrà kaqsvng bøn dvzvŕ sháò we gø íe. Ca ràwe rvtø vl vdue má, màdu má? Nøt vrá kàciq ratràwe bvnlì dø íwe rì dvpat nø rvtø lushì nø ca ràwe ínø tiqkvt kvt bvnlì svng gø pvngkrat dvzvŕ sháòwe mvtaq taqsvng vzøm we tvrà svnggø vnøn dvzvŕ sháò we íe.

Weratnø rvtø svng tvlú pvran lúnlvm vchyak we íe. Àngdèò á:maq rvtø, èdiwe tvràrì shvngbe taq rvtø yúm vtang kadángte lushìlvm íe, vdue walòng svng tvlú dvdamshì ràwe íe. Àng rvtø chyak taq wálún lvm dvgøshì ràe. Pvngkrat lvm tvràrì svng dvdamshì nø bvnlì svng dvtømshì we wáshì mvdaq.

Àngdè taq rvtørì gvzàni vlwe ínìgø àngdè taqkèní rvtø zíshì mvlúnì we dangrì vlsháò we íratnø kapà dang taq ínìgø rvtø mvn mvn nvng àng rvtø chyak taq wálún lvm dvgø shì ràwe íe. Chøm kèní àngdè tiq shvrà rà, bvnlì tiqpvn pvn dvpat èdi we taq yúm vtang vzàngkaq 15 mins dángte rvtø lushì ràwe íe. Welòng nø àngdè dvpat mvhøt lvm rìsvng vgámā lúnwe gø ínø dvgøshì lúnwe rvtø svng gø zílún we rat íe.

Bvnlì tiqlòng lòng svng èwàvtnò dvgvp pvngshì rvtø nvng dvdángwe rvtø svng chyakwa mvsatnø gvlshì ràe. Welòng dvpat vzang lvpkaq dvgøshì lvm svng shøn mvyø we íe. Nvmcè, tiqlangcè wawe dvtømshì nøt svng gvlshì mvdaq. Wedø wáshì wenø bvnlì tiqlòng lòng svng dvdáng lúnwe vpø we rvtø svng dvcømshì we gø íe.

Dvdam mvrønshì, tvlú nøtsun mvlúnshì we shìwvtrì dvpat kadvgvp gø tvlú dvgøshì we nøt laqyàrì gø gvlshì rà longe. Rvtø svng vpø shvring shìe wawe nø nøt laqyà taq cvnwe gø íe. Yalòng cènø mvràna íe wawe nøt taqkèní laqyà tiqlòng bøn dvzvŕ sháòe.

Rvtø walong svng vpø shvring sháìnø kadvgvp gø pvn vshatwe nøt gvlshàì we nø lvpat taq jórlún lvm gømla tiqlòng niíe. Yadø dvpø shvdún mvlúnshìwe rvtø svng vpø shvring shálvm nø àngdè tiqgóng taq laqyà tiqlòngku wáshàì we yángkèní we laqyà svng tiqdá vsvng kaqgø dvtangā lúnì we ínìnø nøngmaq lvpat taq àngrvtøò dvpø zìbèrì svng vtoshì lúnlvm wa íe wanø nvngòn ziwe dvtit tvle svngkà yayáng naròe.