Rvmjàrì nvng vzø̀m vzvpwe tvrà taq kàshǿn vyáshì ràwe dang

Rvmjàrì nvng vzø̀m vzvpwe tvrà taq kàshǿn vyáshì ràwe dang

Yadang rì nvng singnø svmarérì taqgø lvngàrérì taqgø vyáshì ràwe gø íe. Dènibat taqnø làngrérì mvlúngka taq bv̀nlìwàngrì taq bv̀nlì wavm we ínø̀ wedø bv̀nlì wàngrì kèní lorawe rvtø̀rì taq vdèchø̀m sv̀ng tùng mvlonø̀ rv̀mnvngrì nvng kà dvmv̀nwe wáshì wegø íe. Wedø tiqni rvtø̀ tvyø rìsvng tasv̀ng shø̀nkenø mòng shvtawe rì wáshì wegø íe.

Chø̀myo, gùchàng tiqmaq taq íranìnø night club rì taq nøt shvbyoshì só:rí we shvrà rì taqni rvmjàrì lashìnø vlwe gø íe. Wedø vsv̀ng byowe shvrà rì taqwa vl shóngshì we vsv̀ngrì nvng rvmjà lashì nø àngmaq nvng tiq lvpat døngku shvzøngshì lv́m dvdamshì we ínìnø shvlá wa dvdam dvtøp shì ràlongwe gø íe.

Vsvng tiqmaq taq íranìnø shø̀nggv̀n bv̀nlì wàngrì taqkèní rvmjàrì lashìnø vdè tiqgóng svnggø vpǿ shvringshì we vsv̀ngrì gø wedøni vl longe. Nøttǿng nøtdøng we dø v́l dvzaqshìe.

Shòlaqré tiqmaq taq íranìnø vdèò rvmjà vl we nvng nvng dvgá rì nvng gø mvyø̀:cèí vtoshì we gø vl we svng yv́ng lúnshìe. We dø laqyà vlwe vsv̀ngrì kaq tiqmaq taqkèní nø síngsháò we ínìgø dø màwácè yv̀ngnø shvleò we vsv̀ngrì gø tiqmaq taq vlwe íe. Làngrérì tiqmaq taq ínìnø àngmaq taq kadø íwe dangrì shvngbe svng shvng shvngwa shǿn vtán shìlongwe vsvngrì gø vl longe.

Tiqmaq taqnø wedø rvmjàrì dvhø̀ taq tiqgǿ nvng tiqgǿ nø zìdang màbóng kewe ínø̀ wedø zìdang màbóngwe dvhø taqni vmíng ānarì langwe dang taq gø vsháy kewe rì svng yv́ng lún shìe. Yadø íwe dvjàrì taq wedø rvmjà rì nø ngàngdøng we vzøm vzvp tvrà, ngø̀rbyowe døngku lvpatrì svng vrangshì lún lú:ngòe má?

Vsv̀ng tiqmaq taqnø døngku lvpat wawe svng gong bøwe mèpvng kaqnø nøt tǿngdø vl dvzaqshì lún bǿò we vsvngrì vl wedøni tiqmaq taq íranìnø dø̀ngku vdòng vzi vrùng walv́mrì nvng wa vkǿnwe tiqmaq svng gø yv́nglún shìe. We døíwe tvràrì shvngbe nø tasvng nøt mvsø̀nrì síngsháā kewe, kadø vtoā kewe tvrà taq cv̀nnø bǿn dvzv́r wegø íe.

Dø̀ngku lvpat svng gòngvm wekvt tiqgǿ nvng tiqgǿ nø tasv̀ng vpǿ shvring kenø síngsháā kelv́m, taqsv̀ng tubùm dvbangā kelv́m nø gvzàni vchak wegø íe.

Weratnø̀ wedø rvmjàrì dvhø̀ taq tiqgǿ nvng tiqgø nø shvbóng kenø vzelshì we tvràrì mvwáshì lv́m gvzà vchak wegø íe. Yadangrì shvngbe nø rvmjàrì ò lvpat, døngku lvpatrì taq tiqdvciq ngàngdøng nø ngø̀r byolv́m tvràrì dvpat cv̀ndøng lv́m vchak we tvràrì ni íe.