Rvtø lushì ràwe

Rvtø lushìrae wawe nø cúnshàìwe lvpat taq tiqni nvng tiqni dang àngpvn pvn taq kèní yaklvm bvnchvtrì vhømsháìe, dèdamò dø mvbøn long we, sømvnønwe àngpvn pvn vkøn we vdòng taq vl vdu rawe rvtørì nøng maq gø vrvm taq vhømshì lvm wa íe. Vhømshìwe tiq gø nvng tiq gøò bvnchvtrì nø màbóngwe ínìgø nøt shok nøt mvgør lvm nø dvchá wa íe. Wedø bvnchvtrì vkøn rawe rvtø taq nøt rat shìnø vdú vna waòdø mø:ínø nøt shvyangshì we taq kèní rvtø lushìnø pvran shálvm svng shøn mvyø we íe. Vnvm vchangrìò lvpat taq dèdamò we vdèò tvnù mangárì mvbøn long nø yaklvm bvnchvtrì àngpvn pvn vkøn lònge wewa mvtaq vdèò lvpat svng zàn dvtut kadø wa cúnshì lvm dvdàm mvrønìwe rvtørì nvng jà gvmsùng dang nvng sing nø nøt dvt lvm, nøt cvm lvmrì vhømshì ralong dvgvp wedø bvnchvtrì svng mvngan lún lvm tiq rvtø lushìnø dvdam vjøn lvm vchyake. We rvtø nø rvtø àng dong mø:í ni yangúng gøísháòe. Vdètaq vkøn rawe bvnchvtrì rat nø nøt vtang nø kùngà mànøn lvm vdèí èzømòwe tvnù mangárì mvlàng lvm gvzà vchyakwe ínø nøt shvyangshì wetaq kèní dvdam nø nvngòn kùngà lushì lvm gvzà vchyak we íe. Nøngmaq gø vrvm nø ni vràm jàmna taq vdè mvr vdè yàngshìsháìwe dø tiq dvchá vdè lvpat svng gø dvdamnø yángshì weí kadø íwe dang taq kùngà vnønwe, shutshìwe rìsvng yángshì nø dvtøpshì nø shvla dø dvcøpshì lvm shvdøm we íe. Vdèò lvpat svng vlíng vposhìlvm mø:íni yakwe bvnchvt tiq lòng lòng svng mvngàn lvm dèdam bøòwe ínìnø rvtø lushìnø dvcøpshì ràwe dangrì svng síngshá ràwe íe. Wedø íratnø dang àngpvn pvn taq nøt yang nøt tønshàì we taqkèní vdè lvpat svng shvlá vtang vháng dø cúnshì laqlúnì wanø dvshá dvzitwe dvtit tvle svngkà yayáng naròe.