Rvtø svng jà, lùngsíng pø zaqshøprì mvdàm vpø shvring shì laqsháì

Rvtø svng jà, lùngsíng pø zaqshøprì mvdàm vpø shvring shì laqsháì. Rvtø svng vdu vbóngdø, jò dø èlángò we ínìnø døng jøng ni jòr nø zìdang vháng lvm wa íe. Rvtø svng màpø mà shvringì we ínìnø vwadø dvcømì we ínìnø nøng maq lvpat rìnø vsvng dvcìrì dvhø taq mèpvng lapsvng ngámshì lvm wa ílúnìe. Yani la IT bat wawe bat taq rvtø svng téwa vpø shvring nø lángshì rà á:mì. Tiqni taq nari 24 dàm wa vl we ínø we lòng svng nøng maqí nø rvtø gvzà vle wa lán shàìe. Vjú mv vl dø vwa wa dø rvtø svng dvbé sháìe.

Jøng jøng taq nø tiqni vdòng bvnlì washì nø lángshà ìwe rvtø nø narì 12 dàm dángte wa tiqni vdòng taq nøng maq dvpat vl we íe.

Døng jøngni rvtø svng vpø shvring we vsvng tiqgø dvpat nari 12 dàm wawe nø gvzà mvluq mvpøn kéò we svng yánglún shìe. Rvtø svng vpø shvring mvsháò we vsvng tiqgø dvpat íni rvtø tiqni tiqni vle mvnshì nø vsak tiqnøng mvdàm tiqnøng témvnshì nø vlevm we ínìgø ang dvpat pà vjúgø mv vl lvpat zìdang cøm vnøn we taq wa ívme.

Wedø wáshì vsvng nø lóngdøng dø todø wa ínø vlíng vpo we mv vl long. Nøngmaq mvlúng kanø bàng tay nvng kupò kvlang dvløt we mvshøl svng tá vrá shaq íshàe. We mvshøl taq kup-í bang tay svng pàwá jòr we ímá? Bàng tay nø angò kùngà svng mvlángò nø yøpwe í rvtø dvbéò rat nø cøm vdu we íe.

We lòng mvshøl dø tiq dvchá nøngmaq lvpat taø gø ngànø kùngà vle, pø gvmsùng vdá:nge, dvgùng vl nge wanø rvtø svng vjú vl dø mvlángì we ínìnø rvtø svng vjú vl dø mvn mvn lángò we vsvngrì taqkèní vle kélvm wa ílonge.

Kadángte dvshàì nø paqzí mvsháì we ínìgø rvtø svng vpø shvringì nø vjú vl dø lángì we taq dvzaq dvkáng shàì we ínìnø jøng jøng ni jòr we svng lúnshì lvm wa íe. Yadangrì nø nøngmaq gùr gùr taq yàngì we taq kèní gø rvtø svng vpø shvring we vsvng nvng rvtø svng màpø mà shvringò we vsvngrì dvhø zìdang kadø vsar we svng yánglún shìe.

Vdá mvgàme, dvshàe, jòrwe, cøme wawe nø angdè tiqgøò laqyà nvng singwe íe. Tiqmaq taq angcì angkàrìò ban taqkèní zaqshøprì nvng vdá mvgàm nø tiqmaq taq nø angdè góng angdè dvzaq dvkángshì we taqkèní vdá mvgàm nø zìdang vháng lúnò we vsvngrì gø gvzà vl we íe. We rì taqkèní cvnshì nø paqzí lu shì shvla we íe.

Mvdàm kaq tábøshà we nø mònggvn rvgaq mvdàmø rvtø vpø ringnø lángshì ràwe dang nvng sing we íe. Wedø tiq dvchá muqlàng móngdànò zaqshøp lúnlvm dvpat gø rvtø vl ke Gvray svng rvtø zíshì nø dvzaqshì weí vshøp shìlvm vchyake.

Vko vkángrì vl rawe rvtø taq we vko vkángrì svng zøm shàì nø dvzaq dvkángshì ràwe íe. Nøngmaq gø vrvm nø kani karvtø taq lvpat béá:mì we svng mvshá shàì. Wedø írat tvlú dvgø shì ràwe ínø minutes, seconds vrvm svng vpø shvring nø lángshì shálvm shvdøm we íe.

Nøngmaq mvlúng ka vsvngrì taq nvmcè laqí wawe kàsvng gvzà láng sháìe. Rvtø gvzà shì vle nvmcè wàlvm laqí wanø rvtø dvbé sháìe. Yadø wáshì we nø pvlàcè dang taq gø shagóng dvpat gø vjú mv vl we svng shøn mvyø we íe. Yadø íwe nøt mvsøn svng língshì lvm svng shvdøm we íe.

Wedø írat nø shóng shøng we zìlangré vnvm vchangrìe rvtø gvzà shì vle tán nvmcè walvm laqí wawe nøt mvsøn rìsvng gur lvmwa ì. Lvgùn we taqkèní lúnshì we pàgø mv vl wanø darì shaqré rìí shønwe kà shvngbe ítá vrá shaq íe. Dèni bat nøng maq ban taq nø IT bat íráì we ó téwa rvtø svng yernø bvnlì wá dvzaq shì ràá:mì. Nvmcè rúnglvm rvtø mø:í á:mì. Lvpat zìdang vháng lúnlvm dang svng wá dvzaq shàì.

Rvtø ínø nøngmaq svng mèsaì ang nø ang mvn mvn benø vle vme wedø tiq dvchá rvtø nvng tiqrá mvn mvn bvnli wa paqzí lá dvzaq shàì nø rvtø svng vjú vl dø láng laqlúnì wang nø dvtit tvle svngkà yayáng naròe.