Rvtø svng pàwá pvran pvjáng shìràe má?

Rvtø svng pàwá pvran pvjáng shìràe má?
Rvtø wawenø ringwe pø gvmsùngrì døni íe. Bevm kvt vrá vtáng mvlún shì. Ínìgø we rvtø svng nàí dvgøshì nø pvran pvjáng weí èláng:ò we ínìnø nà wámèyø we bvnlìrì dvpat rvtøí luqpønwe élún daqòe.
Rvtø svng pvran pvjáng we èwàò we ínìnø naò rvtørì vwadō cømvmwe mvvl we mvtaq nà dvpat rvtøí luqpønwe élún daqòe.
Wedø rvtø svng shvring nø pvran we laqyà nø vsvk tevmnø svrøng ra rvtørì høqshaq vjú zílún we svng shvdøm we íe.
Vránø bvnlì svng jòrlvm mvjòr lvm wawe svng gø shvbønā lúnwe íe. Rvtø svng pvran pvjáng lúnwe vsvng tiqgø nø àng kadø íwe vsvng íe walòng svng chvpdap dvtanā lúnòe wae.
Yadø rvtø svng pvran pvjáng shìlvm walòngnø yùl yùlcè wálúnshì we nø mø:í. Yvklvm shìwvtrì nø gvzàni vkøn longe. We shìwvtrì nø 
1. Rvmnvng rvmchangrì, àngdèò rvmnvng rvmchangrì taqkèní àngdè svng vtiqshì ranø go rakvt àngdèí rvtø zímèlúnò we ínìgø àngmaq mèpvng cvnvmnø èlora kvtwa àngdèò bvnlì svng pøq pøqnvn wawe laqyàrì gvlshì sháìe. Yadø wáshì we laqyànø shvlawe nø mø:í, pàwálvm wani welòngnø bvnlìrì svng wá vléshì sháòe.
2. Dvdamshì we nøt maggá mvvl we, TV, hang cømla yàngwe taqwa rvtø dvzøò nø vlsháò wedø íwe vsvngrì kaq shøn mvyø we íe. Wedø hang cømla rìnø vsvng tiqgøò nøt svng dvtut dvtut yáng mvyø dvzvŕ dø nøt svng tvpvmò we íe.

3. Vjú mvvl dø rvtø svng dvbéò we, zùng lèga, dvgá bvnlìrì ínìgø rvtø dvbéò nø wawe, pà vjú mvvl we dangrì taq rvtø dvtømshì nø vchyak we rvtø svng tuqrakvt wa pøq pøqnvn wáshì wenø rvtø svng pvran pvjáng mvsháshì we íe..
 
Cvndøng ràwe tvràrì

Nàí wáràwe bvnlìrì svng lèga taq vru nø mècøngò, we bvnlìrì svng rvtø kadángte lushì ràlong we svng nàruò, vta we rvtø, nvrshì rvtø rìtaq kapà wàlvm wawe shìpvn èwàò. TV hang cømla yàngwe, Internet lang we rvtørì tiq lvbán vdòng rvtø kadángte zíshì lvm wawe svng dètøpmò.

Wedø dègø bøò we bvnlìrì døngjøng vdáng vmì má? Vdángvm kvt we shìpvn taqkèní èlùò.

Wedø dègø bøò we bvnlìrì svng vchyak gvlnø dánghøq èwàò. Wedø wáshì we nø rvmnvngrì nvng vzømwe dang taq tiqzìdangku vtiqshì ràlongwe ínìgø nà dvpat rvtørì téwa vjú vldø lángshìvm we íratnø nàtaq nøtshømlvm vtoshì èlún lú:ngòe.

Tiqkvt kvt bvnlì wawe taq rvtø àngdongcè vdòng taq bvnlìrì 2-3 pvng dánglún shìwe gø vlsháshìe. We kvt welòng svng nøt dvshøm shàìnøt nvrshì rvtø svng rvtø yanggúng lushì sháìe. Bvnlì vrvm svng vsvng wawe nø ni vrvm wavm ràe wanø we rvtø svng wa càì wedø gø wáshì mvdaq, bøndaq nìnø lúnshìwe rvtø vdòng taq we rvtø rìsvng vwadø dvcømlvm tvle vjú vlwe tvrà yaq lángshì shálvm svng shvdøm we dvtit tvle svngkà yayáng naròe.