Síng rál nøt vháng lún lvm dang

Wisdom wawe síngrál nøt taq lìga paqzí, mvkrøm mvdøp, dvcì gùnwe síngshá nøt nvng jejú kømpaqrì vbáe wae. Síngrál nøt wawe nø cvmré shoqò we ni kèní vbá rawe mø:í. Síngrál nøt vl pvm dvpat cvm lvpat taq kèní àngdèò kùr kùr rømnvng rømchvng rì taq kèní cvnshì we, paqzí zùngrì taqkèní cvnshì we, àngpè àngmè chøm raqrìò shvngøt vjøn we taq kèní cvnshì we í vto shàì wewa íe. Nøt sun paqzí vdè Socrate shøn yàngì we nø síngrál nø paqzí vle wawe nø nàtaq kèní mèsíng sháò we dangrì svng cvnshì nø eshá lúnò we svng vlòe wae. Mèsíngò we svng mèsháò we dang Mèsíngò we svng mèsháòwe wawe taq àngdèí mèsíng sháòwe dangrì taq shángòe èlánshì we í necøngniq èwàò we í kratsøm we dang svng bøn dvzvŕ sháòe. Tiq kat kat nøngmaq vdòng taq shølshú wáshì we vgorì taqø gø àng maqí mvsíng mvrálò we dangrì taq síngsháò dø wáshìnø, cvnshúrì gø we døni shvlae wa lánshì we taq cvnì we í zìdang vháng vdu dángte vháng mvlúnø vnøn sháò we íe. Nøngmaq dvcìrì taq záng sháì we nøt taq vdè móng vdè rvgaq taq jà, lùngsíngrì vlwe ínø pø láá:m lvm yøle. Paqzí mèsha we ínìgø pø gvmsùng vlwe ínìnø dvgùng vle. Tiqdá vsvngí vpø:vm rae wawe nøt taq kèní aqzí lá dvzaqshì lvm dang taq nvngòn yúmwe yángshìe. Wedø íwe taq àngdèò paqzí dang cvnshì we dangrì nvng síngshá mvyø we shvrúng nøntrì vnøn sháshì we íe. Welòng taq kèní àngdèí mèsháò we dangrì svng téwa mvsíng sháshì we lvp svng vpo dvzvŕ we íe. Èsháò we dang svng mèsíngò we dang Wawe nø àngdè taq vlwe paqzírì taq kèní àngdè svng vjúzi we bvnlìrì taq lángshì mvsháì we íe. Kà shvbóng nøng maq gùr gùr svmarérì taq á:m-aq lvm pvnrì køt-vm we, nvm pu nvmban kat vmwe nvng daq lang wawe paqzí dangrì taq gvzà mvdaq nø wásháò we ínì gø pøgvmsung lún lvm høq shaq wulaq bvnlì ku wa-vm we dangrì taq nvngòn yúmwe yángshìe. Dèni bat taq nøng rvzì móng rvgaqø vlì we dvcìrì taq vpø vtang íráì we nø dat nvmpøn mvlángìnø kat-vm tvmø taq kèní lún shìwe á:m-aq lvm pvnrì íe. We lòng svng kadø wa kvtømø nvmá:m lvm wawe svng síngshá ràá:mì we íe. Síng rál nøt wawe taq shvla we síng rál nøt nvng mà shvla we síng rál nø wanø vní pvn vl we svng yáng lúnshìe. Shvla we síng rál nøt nø Gvray nvng sing we ínø mà shvla we síng rál nøt nø ngànshàpè nvng sing we íe wae. Wedø írat nø shvla we zitnøt rál nøt vl we nø Gvrayò jejú gømpaq tiq lòng gø íe wawe taq kèní tvtit tvle shìwe shvngkà yayáng naròe.

Aa