Shòlaqré tiqgǿò lvpat taq shá vduwe dangrì mèshá bǿò wervt nøt vtiq lv́m tvràrì

Shòlaqré tiqgǿò lvpat taq shá vduwe dangrì mèshá bǿò wervt nøt vtiq lv́m tvràrì

làngré lvpat taq paqzí zùng èdáng bǿò nø mùnghuqpè, mè ívm we kvt pø̀ gv̀msùng lúnlv́m dvpvt bv̀nlì tiqlòng mvdàm tiqlòng wá dvzaq shàìe. ínìgø vdè nøtshø̀m lúm lv́m høq pø̀ gv̀msùngrì mvlúnì. 
wedø rvtø̀ àngnǿngrì nøq longwe kvt welòng lvpat tvrà svng síngshá mvbat ílonge. welòngnø vsv̀ng tiqgǿò síngrv́l nøt nvng rvwvl nøt rì ni íe. welòng nø mvdø̀ng tiqlòng ni ílonge. vdèò lvpat taq mvdø̀ng nø kapà íe walòng svng mèsháshì dángte nø kapà svng mvdø̀ng wàlv́m íe walòng gø síngshá lv́m mv-vl long. vdè lvpat taaq kapà svng mvdø̀ng wá vdue walòng  svng síngsháshì bøwe mèpvng taq we tvrà svng mvdø̀ng wá dèzaqshì we nø jór nònggwòn wawew bángkà svng vtánā lún longe. 
mònggv̀n taq paqzí vdè mvgàm tiqpè íwe Bill Gates nø Microsoft bv̀nlì taqkèní bø̀ngshvngnø jórnònggwòn svng vtoshì lúnòe. Mark Zuckerberg nø Facebook taqkèní jór nònggwòn svng vtoshì lún bǿà. wedangrì svng yà:ngì nø nøngmaq taqkèní gø bv̀nlì tiqdang dang kèní jór nònggwòn rì vtoshì lún shvla we dang síngshá lúnìe. nøngmaq taq vdè taqkèní kapà svng mvdø̀ng wá vdue walòng svng shv̀n shv̀n wa mvsíng shá shàì. nøngmaq dvpat mvdø̀ng rà vchak we tvràrì mvsíng shá shàì. 
wervtnø bv̀nlì tiqpv̀n pv̀n taq nøngmaq nø mvdø̀ng wáshì nø dvzaqshì lv́m laqni vchvk wegø íe. vdè tiqgǿò síngrv́l nøt, rvwvl nøt taqcv̀n nø tiqdang dang taq shówa dvzaqshì lv́m vchvk we íe. vdè tiqgǿ taqkèní pø̀, gv̀msùng mèpvng svng mvcv̀n nø we pø̀, gv̀msùngrì mv̀ng vdè mèpvng la cv̀n radø dvzaqshì ràlonge. 
vránø vsv̀ngrì nvng vzø̀m vzvpwe, vtoq vtipwe tvrà rì taq vdè taqkèní mvsíngsháshì we dangrì gvzà vle walòng svnggø vtoshì lún rà longe. vsv̀ngrì nvng gvdu vbóngdø vzø̀m vzvp, vtoq vtip lv́m gø gvzàni vchvk longe. shòlaq lvpat taq vsv̀ng shvngbe nø ngà døni íe, ngàí yv̀ngò dø àngmaqí gø wedøni yv̀ng lú:ngòe wawe nøt kèní vsv̀ngrì kaq vlíng vpo dvzv́r lv́m wawe nøt mvsø̀nrì nø vlé shìwe tvrà tiq tvrà ni ílonge. 
vsv̀ngrìò lvpat nø tiqgǿ nvng tiqgǿò lvpatrì nø màbóng long. vsv̀ng tiqmaqnø bv̀nlì wàngrì taq vyv́ng yaqdø̀ng dvzaqshì we vsv̀ngrì vl longwe dø tiqmaqnø vdè èvl we lvpat zìdang taqni nøt lø̀m lø̀mcè vl we vsv̀ngrì gø vl longe. tiqmaq taqnø nvpni wawe vdèò lvpat tvrà dvpat tøp tøpwa nøt shvriqshì nø dvgǿ dvzaqshì we vsv̀ngrì vl longwe dø tiqmaq íranì nø vhú vhwaq rvtø dvbéò we vsv̀ngrì gø vl longe. 
vdèò lvpat tvrà rvtø̀ rì svng vwa dø dvzø lv́m tvle nø vdèò lvpat svng vnvpdø cúnshì lúnlv́m dvpat tvrà tongshì we nø shvlá vtang ílonge. vsv̀ngrì kaq vlíng vpo lv́m dvpat dvzaqshì lv́m tvle vdèò chø̀m vsv̀ngrì nvng vdèò lvpat tvrà mòngzø̀l dø vl lún lv́m dvpvt vdèò lvpat tvrà kaqsvng nøt shvriqshì nø dvzaqshì we nø mvdø̀ng ílonge. 
weratnø vdèò bat vsvk 40 nǿng mvril tuqrawe kvt kapà rì wá èdáng bǿà wawe nvng vsvk 20 nǿng mvril taq vdèò lvpat tvrà kaq svng kadø bǿn dvzv́r mvyǿe wawe dangrì svng síngshá shìlv́m shvdǿm nø nònggwòn ziwe