Shòlaqrérì nvng rvtø svng kadø dvtøpnø lángshì lvm wawe

Shòlaqrérì nvng rvtø svng kadø dvtøpnø lángshì lvm wawe

Vsvng tiqgø lvpat tvrà taq shvla we bvnlì rì svng wálúnlvm wawe nø shòlaqré mvril taqni íe. We mvril nø shòlaqré rì wawe bøng svng táshì we nvng kù:ngà zøngwe í padang taqgø wálú:nò we rvtø íe.

Vsvng tiqgø ò lvpat nø àng vsvk mvril rì nvng vrangshì nø cúnshì ràwe gø íe. Lvpat taq dvpø shvdún mvlúnshì we vpø vtang pvn taq rvtø walòng gø tiqzàng kèní vbá we svng shvngbe í síngshá shaqni íe.

Wedø vsng lvpat rìtaq tiqgø nvng tiqgø ò lvpat tvràrì gø màbóngnø vsháy we íe. Tiqmaq taqnø cúnshì we lvpat tvrà taqø ìshøt lú:nò nø vdá mvgàm we nvng tiqmaq taq íranìnø dvshà mvhøt lvm shìwvtrì wa vhøm ò we vsvngrì gø vshøt we íe. Wedø lvpat shìwvtrì svng dáng lún jórlún lvm wawe nø nøt mvsøn kùngà tiqlòng kèní wa wádáng shì we gø íe.

Dèni bat shòlaqré rì taq lèga kàru paqzí mvpvng svng nø gø vrvm cvnshì, shvngøtshì shaqwa íbøì. Weyvng kèní vrá tiq dvtang røshì, cvnshì mvyø we tiqgø dvpat ínìgø kàru, lèga zárì, gvzà vl bøì we svng yánglún shìe. Wedø cvnshì lúnwe shvràrì gvzà vlwe ínìgø shòlaqrérì mvlú:ngka taq vwadø rvtø dvbéò nø vhú vhwaq vl we svng yvnglún shìe.  Làngré lvpat svng vwa dø dvzøò we vsvngrì gvzà vle. Shaqré rìí kadvgvp gø mvrà shvri we vhø:mì we svng síngsháì nø dvzaqshì lúnlvm shvdøm we íe.

Àngpè àngmè maqínø àngcø àngcèrì vrvm kaq kadø laqbøn dvr wawe manggá dvlàrì dvdamā wewa ílonge. Àngdè cèrì svng vsvng cèrì dø bøn dvzvŕ mvyø we í àngmaq svng tvnùng nø dvtú we wáshì longwe svng shòlaqrérì taqkèní pàti mvlanwe wásháìe. Àngdèò lvpat tvrà nø vdu vbóng vnvp dø cúnshì lúnlvm dvzaq shì ràwe svng nvnggùn zinø shvdøm we íe.

Lvpat zìdangrì, vsvngrì ò paqzí jàng laqyà rì vlíng nø vháng mvnshì ráì bat taq shòlaqré rì tiqmaqnø byo byocè wa vlnø rvtø shvleò werì gø yánglún shìe. Àngpè àngmè maqò shvngøt dvtú we lvmpvngø wa lvpat svng yùl yùlcè í vlnø pàtiqpvn taqgø nøtløp shìwe mvvl mèpvng dvpat mà dvgø shìwe vsvng nø tiqni tiq rvtø taq yakwe shìwvtrì vhøm lvm íwe svng shvdøm we íe.

Tiqmaq taqnø kadang shì dvzaq dvkángshì we ínìgø àngboq boq cøm vnønwe vhø:mò we ínìgø tiqmaq taq nø wedø íwe tvrà svng wá mvkamshìwe í yelshì wegø vl longe. Kadø ínìgø lvpat tvrà svng edi dvgvp nø padang taq ínìgø nøt màdat dvzaqshì lvm nø shòlaqré rìò bvnlì døngjá tiqlòng niíe.
 
Dèni bat taqnø àngdè dí mvyø we lvpat tvrà rìsvng rvcvngshì lúnwe vko vkángrì gø téwa shvla we batsvng tuqráì we rat àng vdè tiqgø kèní dvzaq shìlvm wani vchyak ráì wegø íe. Wedø lvpat tvrà rvcvngshìe wawe taqgø kayvng màyvng svng vbvmshì wedø mø:í nø àngdèí wá èlúnòwe  tiq tvrà svng shówa wá dvzaq shì nø jór nvnggùn lushì shálvm gø vchyak we íe.

Àngdèò lvpat tvrà, tvnù mvnggá svng tuqlúnlvm dvpat nø shòlaq bat taqkèní dvzaqshì, tvrà tongshì ràwe íe. Vwadø rvtø svng dvdøm lvm laq mvwá shàì. Àngdè ò dvdamshì we tvnù mànggá vrvm svngnø chapdvp bvnlì kèní wáshì ràwe wa ílonge. Àngdè vsvk vbat telong dvgvp kadø íwe vsvng tiqgø bøn mvyøe walòng nø àngdèò shòlaqré bat taq kadø dvzaqshì ráì wawe mvtú taqni cvnlong we íratnø shòlaqré bat taqkèní shvlawe tvrà vrvm taq tuqlúnlvm dvzaqshì rawe wedang dvtit tvle svngkà yayáng naròe.