Shóngnøt kení Vzøm lvm.

Shóngnøt kení Vzøm lvm.

Gvtsing tiqsing yvng "dvgì nvmòe” wanø legà vrùò kà svng Cvmré tiqgøí yvng bǿà rvt wesing yvng gòng á:mì nø sing angkàng pè svng røtòe. Dvgi tiqgò kadángtè ènvmò má? wa røtnòe. Sing angkàng pèí " tiqgò svng dòlar (50) mvdvm kení nvmòe”, wa vlòe. Cvmré gøí yvngò ke angyvng nø dòlar (37) dòlar wa vle. Ínì dvgìrì svng yvng mvlún shì má? wanø vkvng røt shìe. Sing angkàng pèí gø vhø shì sórí lúnshìe wanø dvgì svng goò weí zvngwa dvgì cè (5) go kení (4) go vngàm lòngì tiqgò nø mepvng yvng vngăm ráì we svng yvng bǿà . Cvmré gøí we mepvng ngámshìwe dvgì gosvng kūgo nø kàdø íe wanø røtnòe.Sing angkàng pèí wego nø cvm kení hí dvciq we íe. Ang tiq lvpvt wedø wa ílù:ngè wa svrawùng pèí shønòe. We mepvng cvmré gøí yago svng kàdvng tèí nvmò nìmá? wa dvbù nø røtnòe.We hí dvciq we gosvng nø manvm ngò... nà eshòng nìnø awadø zílvm íe elùn shì vlòe.

Cvmré gønø nøt mvbyo we mvrshvmí sing angkàng pèsvng yàngò nø "ngà awadø nø mvlù shøng” dvgá dvgi rì vpø døni anggø ang dvpø vle. Akvt ngà yvng vl we (37) dollar svng nàtoshì ngàmshì we svng tiqshvlá vdòng taq (5) dollar zí lvm laqí wae. Angkàngí dvgì gosvng gùmsòng zí mvrà, ãdvgì gonø dvgá dvgìrì dø kalvng mvsháò, mvnshìgø mvsháò wã shønò ke Cvmré gønø dømvwá vl a:mì. We mepvng cvmré gønø dvgì angkàngpè lvpsvng pòshì nø "ngàgø dvgá vsvng rìdø mvnshì mvlúnò, kalvng gø mvlúnò, wedø írvt yãdvgì gocè svng dvbvng mvkoq lvm vsvng ràe” wae, wervt angkàng pènø nøt mvbyo á:mì. Yà dvgì cèrì shvngbè yà cvmrécè dø nøt dvdvm sháò we angkàng rì nvng laq vl vtū dà wanø Vjúrøt dvbvngòe. Shóngnøt mvdøngí vsvng vrvm nvng vrvmshì shárae. Vdèò bvnlì svng nøtlúm nø dvzaq shìrae. Dvsháng shìwe nøt laq mà-vl. Nøt shòshò wa vsvng svng dvbvng laq lúnì. Wedø írvt Vchvt wenø vdè svng kàgøí ká:mè, kàgøí ngàsvng shònge, kàgøí ngà svng vpø sháòe má, vzømè má? Wakà nø vchvke. Rvmnvng shvlá nø vsvng shángbèí vdè svng gwør nø vhøm Shì rà we rvtø taq vdè shvnvng yvng vlrá we gø nø rvmnvng shvlá íe. Shóngnøt mvdøng nø shólé wàe. Wervt shvngbè svng shóngnøt mvdøngí vzøm laqlúnì.