Shóngnøt wawe

Shóngnøt wawe

Vsvng tiqgøò lvpat cúnshì lvm dvpat á:m-aq ràwe ínø wedø ni pvlàcè cúnshì lúnlvm dvpat gø shóngnøt rà vchyak we íe. Nøngmaq lvpat taq shóngnøt walòng svng lvjøm àngpvn pvn í síngshá lúnì wegø íe. Tiqmaqí nø shóngnøt walòng svng lvjøm tán mvlúnshì wae.

Wedø bønwe nø vsvng tiqgø nvng tiqgøòshóngnøtsvng vtoshì lúnò we tvrà màbóng we rat bønwe íe. Tiqmaqí lvjøm vtànò wenø shóngnøt wawenø ka-e wanø vrá tiqmaqí ranìnø shóngnøt wawe nø kíe wae. Vsvng tiqgø ò lvpat taq tiqkvtcènø we shóngnøt walòng svng vhøm shàì we wa íe.

Cúnshàì we lvpat nø shóngnøt ratwa cúnshàì we ínø nøngmaq gø vrvm nø shóngnøt nvng vsvrì we mø:í. Shvngbenø shóngnøt welòng taq cúnshì lún lv, vtoshì mvyø wewa íshàe. We shóngnøt svng 3dang kèní síngshá lúnìe.

Werìnø dvsháza shóngnøt, (tiqdá vsvngkaq dvsháza nøt gvlshìwe shóng nøt), rvnvng shóngnøt ( vsvngrì, rvmnvng rvmchangrì nvng vzømwe tvrà svng shóngshì we shóngnøt), nvng láshì mvyø we shóngnøt ( tiqpvn pvn taq láshì mvyø we nøtí bung rawe shóngnøt) wanø yánglún shìe.

Yadø shóngnøt wawe nø vsvng tiqgøò nøt svng àngpvb pvn ku vlíng vpo dvzvŕ we ínø kømzøpwe shóngnøt svng gø zílúnwe íe. Vsvng tiqgø wawe taq àng vdè shóngwámshì vsvngrì nø wedøni vl longe. Àng nvng shóngshì lúnwe rvmjà mvvl we ínìgø àngtaqshóngnøtnø wedøni zángshìe wae.

Wedø shóngnøt svng lèga, dvzáng vru svra rì taqkèní gø lvjøm àngpvn pvn pønò nø vruò we svng gø yánglún shìe. Shóngnøt wawe taqkèní vsvngrì kaq mòngzøl lvm, shiqshàn we, byowe, nøtshøm nøtløm ww svng zílún we døni tiqkvt kvt nvrøm vsor lvm, nøt yùl lvm, nøt dvshà lvm nvng rvyù rvyúngwe rì gø bøn dvzvŕ sháòe.

Nøng maq taq tiqkvt kvt bvnchvtrì shìwvtrì nvng vhømshì ralong dvgvp shóngnøt welòng nvng vsvr vmwe bøn sháòe. Shóngnøt rat mvhøt lvm vhømò we vsvngrì nøngmaq shvnvng gùr gùr taq gvzà yánglúnì wedø tiqdvchá we shóngnøt ratnø shvlawe àngshí àngwvtrì vtoshì lúnì we svng gø shvngbeí síngshá lúnìe.

Mvdàmkaq tálúnshì bøì we shóngnøt 3 dang svng nøtmaqí síngshá ràlonge. Shóngnøt wawe taq dvsháza mvkoknøt zángshìwe nø kùngà zaq vtang íe wae. Wedø dvsháza mvkoknøt mvzángshìwe shóngnøtí nø mvhøt lvm svng bøn dvzvŕ sháòe wae.

Weratnø vnvm vchangrì shvngbe taq tasvng dvsháza mvkoknøt zángshìwe yáng kèní shvngbenø shóngnøt vzømwe lvpat taq cúnshì lúnlvm dvzaq shàì, ngámshìwe tut svng mèpvng tìyø taq vrá dvtit tvle lvm íe.