Shølshú tiqgø taqkèní mòngzøl we àng mvdò tiqlòng bønlún, mvnlún we dang

Shølshú tiqgø taqkèní mòngzøl we àng mvdò tiqlòng bønlún, mvnlún we dang

Vsvng mvdò tiqlòng wawe nø bvnlìrì dang vrvm dvpat vchyak we íe. Bvnlì wàng tiqlòng ò shaqnø we àng mvdò ò wá dvzaqshì we kùngà taq shvnvrshì we ni íe.

Vsvng tiq mvdò wawe nø vsvng tiqgø ò kùngà kèní mvzán íwe ròráshaq kùngàí vzøm nø bvnlì wawe íe. Weratnø we àng mvdò taq vzøm we vsvngrì tiqgø vrvm nø tiqnøt tiq mvyùng wáshì lvmnø mvdøng vchyak we tvrà íe. Welòngnø àng mvdò ò jór nvngòn gø íwe mvtaq we mvdò svng shølwe shølshú vgo gø taqkèní gø bvnlì dvlàrì svng pvran pvjáng we taq rvwvlnøt, zitnøt rì vllvm gø vchyak tiqlòng niíe.

Àngdè nø vsvng mvdò tiqlòng ò shølshú shvrà taq rip vduwe íe má? La àngdè nø shølshú wawe bvnlì døngjá svng rí vdu rawe ínìnø tiqdá vsvngrì kaq síngsháā we nøt, vsvngrì kaq rvwìngwe nøt laqyàrì svng yvlshì lúnlvm mvdøng vchyak longe. Wewa mvtaq bvnlì døngjá svng kámshìwe nøt nvng àngdèò rvmjàrì, cvnshúrì svng rìn vráwe, vdu vbóngwe tvrà taqkèní vzøm vzap lvm wáshì ràlonge. Àngdèò mvdò gøwrwang vdòng taq vlwe vsvngrì shvngbe svng mòngzøl we shømløm lòng svng mvn dvzaqshì ràwe íe. We dang taq

1. Wálún we kùngà taq cvnnø lún vkángrì zíā we, àngdè ò lvmpvng cvnshúrì dvhø tiqgø nvng tiqgø taq vlwe àngmaqò talent mvdàmø tubùmā nø àngmaq svng shvring äwe nvng paqzí, mvkrøm nvdøprì svng vháng vlún lvm vko vkángrì mvnā we wáā ràwe íe. Wedø ínøwa tvsvng vpø shvring kelong we mvtaq bvnlì taq gø nøt lømwe svng bøn dvzvŕ lúngò we íe.

2. Nàò bvnlì wàng svng mòngzøl nø, vnvp byodø bvnlì wàngcèrì dvpat mvnā ràwe nvng bvnlì rvtø svng gø mànvr nvr wá dvzvŕ we dø mø:í nø yuqyà dø gvlā ràwe íe. Yalòng taqkèní àngmaqò nøt mvsøn, shagóng kùngà svng banā we gø íe.

3. Tiqnøt tiq mvyùng wáshì we, yadang taq gø bvnlì wàngcèrì tiqgø nvng tiqgø nø dang àngpvn pvn taq mábóng nø vsháy we vl longe. Tiqgø í síngsháò we nvng tiqgø ò síng rvl nøtrì kadøgø vbónglvm mvvl long. Wedø màbóng we tvràrì svng dvkøm nø bvnlì taq mvngushì dvzvŕ we taqkèní tiqgø nvng tiqgø nø tvsvng tubùm dvbangā kélún we tvrà shøl kewe í we bvnlì svng téwa jórlún lúngòe.

4. Mvkrøm nvdøprì, síngrál nøt, rvwvlnøtrì tasvng tvle kewe, vwánā kewe wáràe. Àngdè tiqgø ò nøt shong wedø, yuqyà dø wa wá mvyø wedø mø:í nø bvnlì wàngcèrìò shóngwámshì we tvrà yuqyà lvm tvràrì svng gø paqzí dvkøm dvzvŕ nø cvnā lvm gø vchyak we íe. Yalòng nø tasvng rvwing we nøt kaq shvmáng lúnwe tvrà tiqlòng gø ílonge.

5. Vlé shì bøwe mvrà rì kaq svng cvn cvn mvrà shvrì vyáshì ràwe, vsvngrì tiqgø vrvm taq vlé shìwe mvrà nø vl we wa íe. Dang vrvm taq kømzøpe wawe nø kayáng gø mvvl long. Wedø íwe rat vléshì longwe tiqgø kaq cvn cvn mvrà shvri we, shvraq dvchaq we mvwà lvm vyáshì ràe. Mèpvng kaq màlé shìlvm dvpat màng shvdøm nø nvngòn zí vdu we íe.

6. Vjú mvziwe lìpùngrì, mvngushì nø vwadø rvtø dvbéwe tvràrì svng mvwà lvm vyáshì ràe. Pàwálvm wani vsvng mvngushì we lìpùng wawe nø vjú tiqpvn pvn lúnlvm dvpat dvdamshì nø wá ràwe ínø wedø vjú zílún wegø mvvl, bvnlì wàngcèrì kaq vzing ké dvzvŕ we zvpùngrì we kvt we kvt wáshì we taqkèní gø we vsvngrì bvnlì taq nøt tang, nøt dat dvzvŕ sháò we írat shvlá wa dvtøp, dvgøshì dángí wa lvchøm zangnø vjú vldø wá vduwe íe. Weratnø shølshú vgo bvnlì taq ripwe vsvng tiqgø nø bvnlì wàng vdòng taq tiqsvng mvtang bvnlì shicèrì svng mvti mvni wáshì lvm mø:í, we bvnlì wàngcèrì kaq tvrà dvtanā we, pvran pvjáng we dang taq shvla dø wálún lvm mang vchyak we íe. Bvnlì tiqlòng taq jórlún we nø we bvnlì svng øpshøl we vgo rì taqgø dvgùng vlwe írat bvnlì shølshú shvrà rìtaq ripnø dvzømshì we tiqgø vrvmnø mvdàm kaq tálún bøshà we dangrì svng gø cvnnø dvzaq shàì we ínìnø mòngzøl nø byowe bvnlì wàngrì svng vrang lúnlvm ílonge wawe dvtit tvle svngkà yayáng naròe.
#youth