Shølshú vsvngrì ò zitnøt paqzí

Shølshú vsvngrì ò zitnøt paqzí

Shølshú vsvngrì wawe nø kadø íwe vsvngrì íemá? Shølshú wawe taq shvla we bvnlì svng øpshølwe shølshú vsvngrì nvng mà shvlawe bvnlì svng øpshøl we bvnlì shølshú vsvngrì wanø vlwe svng yánglún shìe. Yarì shvngbe nø tvnùn mànggá tiqlòng svng tuqlún lvm dvpat bvnlì wawe vsvngrì wani íe.

Mònggvn taq bøngshvng we shølshú vgorì ò lvpat mvshøl rì svng èyàngvtnò dvgvp màbóngwe talent kùngà rì vlwe svng yadø yánglún shìe.

1. Shóngshøngwezìlàngré vnvmchvngrì shagóng shiqshàn tvrà svng tiqkvt kvt nøngmaqí pàti mvlan nø vnáì we wásháìe. Shølshú vgo bvnlì zømwe tiqgø dvpat nø shagóng shiqshàn tvrà vllvm nø mvdøng vchyak we tiqdang taq vbá longe. Shagóng shiqshàn we tiqgø dvpat wa àngdè wá mvyø we bvnlì vrvm dvng wálúnshì longwe mvtaq shvrúng nøt nvng kù:ngàrì gø wedøni cvnlong we íe.

Weratnø vsvng tiqgø dvpat àngdèò bvnlì, tvnù mànggá svng diwe tvrà taq shagóng shiqshàn lvmnø vchyak mvdøng tiqlòng íwe svng shøn mvyø we íe.

2. Zitnøt, rvlnøt vlràwe 
Vsvng tiqgø taq zitnøt, rvlnøt vllvm wawe nø vsvng tiqgø lvpat tvrà vháng vlún lvm dvpat mvvl mvdaq we tiqlòng niíe. Wedø zitnøt rvlnøt rì vsvngrì mvdàm téwa vshøpshì lú:nò we tiqgø nø wedøni vsvng mvdàm lvpat zìdang vháng mvnshì vme.
  
Shølshú tiqgø dvpat nø vsvngrì, cvnshúrì mvdàm téwa zitnøt rvlnøt vlrà we ínø àngdèò lvpat tvrà taq paqzí mvkrøm nvdøprì vshøpshì lúnlvm gø gvzàni vchyak we íe.

Téwa móng øpshølwe shølshú vgorì taq móng lvmang nvng singwe paqzí mvkrøm nvdøprì vlrà we dø lvpat tvrà àng zìdang taq cvnnø pvnyàn cvnshì lú:n ràwe gø íe.

3. Kámnøt vl rà we
Shølshú tiqgø taq ngàngdøng we kámnøt taq zømshì ràe. Chapdvp bvnlì kèní gø zøm dvzaqshì lúnwe bvnlì mvdàm kámnøt zángshì ràlonge. Wedø àngdè gvlshì we kámnøt tvrà svng gø jòwe, mvjòwe dvngrì dvtøp shì nø cvndvgøm lvm gø vchyak we íe.
 
Àngdèò síngrál nøt taqkèní shvlawe mà shvlawe svng cun dvtøp lúnrà longe. Shølshú tiqgø wawe nø àngdèò tvnù mànggá tvrà taq kámshì nøt í vzàng kaq kù:ngà dvzaqshì shaqí tvrà shølā ràlonge. Mònggvn taq wedø shølshú vgorì í tvrà shøl vléò weí kratcøm we vsvng mvngpòng mvdòrì gvzà vlwe svng dømshá ràlonge.
 
Weratnø shølshú tiqgø taq dømmvn we kámnøt tvrà vdòng jòwe tvrà mvdàm kèní tvrà shøl lúnlvm gvzàni vchyak we íe.

4. Nøt mvsøn kùngà vlrà we
Vsvng tiqgø dvpat nøt mvsøn kùngà wawe nø gønshaq ni íe. Vsvng tiqgø nvng tiqgø nø nøt mvsøn kùngà taq cvnnø zìdangrì gø wedøni vsháy vme. Shèrwe nøt mvsøn í døngmvn dø tvrà shølwe, dvsháza shóngnøt gvlshì we vdòng taq dvzaqshì lúnrà longe.

Nøt mvsøn kùngà wawe nø àngwa bøn longwe nø mø:í àngdè tiqgóng nøt mvsøn shvngbe vlíng vpo shìnø dvzaq shìshaq í vrang shìràwe tiqdang ni íe. Welòng svng chvpdap bvnlì taq gø láng shì ràwe íe.

5. Jàng laqyà shvlá wáshì ràwe
Jàng laqyà shvlá mvwáshì we vsvng tiqgø nø kadøgø shølshú vgo shvrà taq vllvm màdu long. Shøshú vgo taq ripwe vsvng tiqgø nø cvnshúrì mvdàm téwa jàng laqyà shvlá dvtanā nø tvrà shøl ràlonge. 

Mà shvlawe jàng laqyà wawe nø tiqkvt zángshì bøwe kvt àngrø wáshìdø caqshìvm nø vzing we bønsháò wae. Weratnø màshvla we jàng laqyà rì svng battut wá màléshì lvm nø shøshú tiqgø dvpat vchyak we laqyà tiqlòng ni íe. Vsvng shvngbe í kám vmnø vlømvm vrvm we tiqgø taq wa shvla we shølshú vgo wanø shøn lúnshìe wawe dvtit tvle svngkà yayáng naròe. Ngámshì we tut svng tutrawe tìyø taq vrá tashì lvm wàì.