Shømlømwe chø̀m

Shømlømwe chø̀m

Tiqkvt kvt nøngmaq tiqgǿ vrv̀m nø vdèò chø̀m taq v́l mvne shìranø vzing kerawe rvtø̀ rì vl longe. Téwa yadø bø̀nwe nø làngré mvril rì taq íe. Chøm yv́ng èvl we nø nøtshok e, àngpè àngmè maq í vbø̄n kerawe kàrì tá mvne shàì, chø̀m yv́ng kèní dvgá shvràrì shvngbe nø nøt shø̀m lv́m tvràrì lúnshìe, shvng shvng wa v́l lúnìe wanø dvdam shì sháìe. 

Yadø íwe nøt nøngmaq shvngbe taq zangshì sháìe. Nøngmaq nø àngpè àngmè chø̀m taq v́l lú:nì we àng dvpǿ lòng svng dvdam nø shvring mvsháì wegø íe. 
Vdè chø̀m kèní nà svrvm we rvtø̀ yarì shvngbe nø nøt tǿnshì lv́m tvràrì bǿn dvzv́r lú:ngòe. Vdèò lvpat bv̀nlì wàngrì taq ètuqvm we rvtø̀, wángzàrì dvhø̀ taq v́l nàduvm we rvtø̀ vdè chø̀m taq èvl we rvtø̀rì nø vtang kèní mòngzø̀l nø byoe wawe nøtrì zángshì longe. Mvjòr rawe rvtø̀ taq yøprá taq yvnshì lv́m vkáng mvlúnshì, shagóng mvshiq mvshàn vhǿmshì rawe rvtø̀ vdè kaqsvng dvzøm lv́m vsvng mv-vl, vdè ám-vq mvyǿ we pv̀nrì dvgǿā we vsv̀ngrì mv-vl. Wedø íwe rìtaq vrúm vsvr we tvrà svng mvshóng shìwe nøt rì zángshì longe. 

Chø̀m lo lv́m tvrà svng mvrøt shìnø vdè chø̀m svng mvrøt nø shønran shì longe. Vdè chø̀m kèní ám-vq dvrè rì svng dvdam shì longe. Vdè tiqgǿ wa írawe rvtø̀ rì taq vdèò chø̀m vsv̀ngrì nvng ámjàm svng dvdam shì longwe íe.vdè chø̀m kèní vrúm vsvr svng mètuq dvr we vsvng tiqgǿ ò nøt mvsø̀n taq yadø íwe tvrà rì gø màhǿmò. Chvpdvp lvpat taq vhǿm shìralong dvgvp vtang shaq nøt dvyól shìlv́m tvràrì ni ílonge. 

Kadvgvp gø v́l mvne:ngshø̀ng wanø dvdamshì dvrwe vdèò chø̀m kùlwàng svng vdè nø zaqlè tiqgǿ dø ívdu vmwe rvtø̀ rì tuq shálúngòe. Rvtø̀ vrv̀m v́l lúnwe vkángrì mvlún shìvm we bǿn sháòe. rvtø̀ cvnwacè wa bv̀nlì ratnø̀ mǿí ni dang àngpv̀n pv̀n rat lo vdu rawe bønvm wegø íshálú:ngòe. Weratnø chvpdvp rvtø̀ taq vdèò chø̀m taq v́l lú:nì we nvng àngpè àngmè maq nvng v́l lú:nì we vko vkángrì svng shvring nø vpǿ shálv́m wáshàì. 
Rvtø̀ vlevmwe mèpvng wa mvrøt shìrawe ínìgø yøpnv́ng shø̀ngran døwa ívm we rvtø̀rì ívme. Vkang ràwe rvtø̀rì tuqlongwe gø íe. 

Vdèò lvpat tvrà taq nøt tǿnshì lv́m tvrà rì kèní shvng shvng wa v́l mvyǿ we ínìnø vdèchø̀m svng shóng shàì, àngpè àngmè maqsvng shóng shàì nø àng maqò jejúrì svng síngshá vpǿ shálv́m wàì. Vsv̀ng lvpat wawe nø àngpè àngmè maq nvng tiqdø èvl we rvtø̀ mvdàm vdèò rvmjà nvng èvl we rvtø̀ nø téwa luqwe gø íe. Werat vdè àngpè àngmè maq nvng èvl we rvtø̀cè taq àngmaq svng vpǿ shálv́m nvng àngmaq svng shv-vm sha-aq lv́m, oqà wá shálv́m vchvk we íe. We longnø àngmaq mv-vlvm we tiqni taq nøt tǿnshì lv́m mv-vl long. Vdè tiqgǿ we àngpè àngmè wawe lvpat svng ètuqvm we tiqni taq vdèò àngcǿ àngcè rì svng yv̀ngnø nøt tǿnshì lv́m lvpat mvbø̀n lv́m dvgǿ shàì. 

Lvpat taq nøt tǿnshì lv́m tvrà mv-vl nø cúnshì lúnlv́m dvpat nø vdèò mvdàm taq jejú vl vsvngrì kaq oqà wáshá lv́mgø vchvk we íe.

#youth