shansher we angsvng kaq vpx we dang

Catholic shvngømré taq Shan Sher we Vsvng ri,angmaq i langòwe dvrèri kaq vpø nø shvgun we i Gvray kaq tiqdvtvng vjúrøt dvpvng lvm long svng vløm Shi sóri angmaq i langyanga we dvrèri kaq vpø we tvra vle. Eni SHANSher we vsvngri ò vna:ngri nvng angmaq cunshi we lvpat taq Lang yvnga we dvrèri kaq vpø we dàng nø vdùmá?Mongká taq gø vbáma?wa nø dvdvm lvm, røt lvm v-lé. (Nøngmaqò angpè mè,angci kvngri shia:m mepvng angmaqò dvgvmri Svng vpønø shvman jèjú ishøt lùshà íe.Angmaqi lvngrà we dvrèri,angmaqò shømlàri svng gø Mvnbong taq zà:ngí nø shvladvngwace gvl sháiè. Wedø tiqdvchà SHANSher we Vsvngriò mvbøt, mvtin,màgvyàqshì Jórnònggún dvtvñò we angmaqò vnangri,angmaqi lvngyvngāri svnggø shvngømre keni shvladvngwa vpønø gvlshi we ie.) SHANSher we vsvngri kaq shvgun we í, Gvray yvngkeni ishøt zi we dāng mongká taqgø,SHANSher riò mvshøl taqgø yvnglún Shi we ie. SHANSher we vsvngri tiqmaq nø Angmaq góng vna:ng mvbøp mvtin, dàlvm lvmik kømla jórnònggún ri angpvnpvn dvtvnò we svng yvnglún shíè. Tiqmaqnø angmaqi lvngyànga we dvrèri taqkeni dàlvm lvmik kømlari, dèni deyaqhøq dvtvnó we svnggø yvnglún Shiwe ie. Wervt nø SHANSher we vsvngri kaq vpø we tvra,angmaq i lvngyvngā we dvré ri svng vpø we dang nø mongká taq vrú dø tiqdvchà gvzà vdú we dang ie. 2Hkawhkam Laila 13;20-21.taq 20.wekvt Elisha Shia:mi nø angmaqi ang svng kø:mòe.nøngni nøngrvm Zànggá rvtø taq Moab Vsvng tølvmshú mvdòrì nø mongdán vdòng svng gòng nø tølvma:tnòe.21.tiq ni rvtø taq Vsvng tiqgø kø:mò ke Kū,tølvmshúrì tiq mvdò di ráì we svng yvngbøà.wervt angmaqí vnàng welòng Elisha dvgvm yvng svng rvp dvgup bøà kvt,vnàng lòng nø Elisha shārø mvdvm vnāá:mì kvt Vsvng we pè nø zūn Lú:ngì nø zvng rip lòngì waè. Dvzvr legà 19:11-12 taq,wekvt Gvrayí Polo wur kèní,angwà wàò mvdvmø té jórnònggùn bvnlì wàò nø;12.Polo yvng kéní ngúng shøq paqzit,møíni juqnvm ,za ri kaq svng vsa:ngí lvng bøò nínø,záyvng dvlí dvjvng banvm nø,vcáng mvgvmri gø lúshivm høq wàòe.wa nø vrù we ie. Dvzvr légà 5:15-16 taq, 15.Wedvngte ni shvri:ngò yvng kéní,Piter dvchut nvmchàng di mvnvm ang bàngzìí dvbvng,zarì kagø màgø svng la dvkøqa:tnò dø,tvrà nvmdøng hwáng svng baqò nø chà nvng pvlu taq vyà:lò høq wàòe.16.wemvdvmø Yerusalem gùrhøm mvringri kèní Vsvng loksok gø,zā Vsvng nvng mvmvng vcá:ngí dvkiò we vsvngri shølò nø køm ráì.We kvt angmaq shvngbe bāná:mì. Wa nø vrù we svng gø yvnglún shìè. Yàrì mongká ciqrì taq Gvray i nø,angò sherwe vsvngriò Shàgòng,vna:ngrì taq kèní ,angmaqí Lvngyángà we dvrèri kèní nøngmaq kaq záyàng dvban we dàlvm ishøt ezíì we svng yvnglún shìe. SHANSher we vsvng Januarius kaq Vsvng mvga:m ríé shatnò dvgvp ang mepvng cvnwe vsvngríé pvling taq zà:ng yvngāwe angshvwi angkélōng nø angboqboq shvwi Angshvr dø zóngwe i dàlvm kømla dvtvnnò we svng angò lvpat mvshøl bok taq mvsing yvngà we svng shálún shíè. Vléa:mi AD 2015 nxng march 21 nìtaq Svrabyin Koqkvm Francis nø SHANSher we Januarius ang shvwi gvlò we Naples mvring taq vlwe Svradó zòng kaq dínø Angshvwi svng pànvmò nø shvgúnò chvng shvwi angkè lòngnø welvngí ní zónglóng ìnø lvmik kømla dvtvnò we svng yvng lún shíwe íe. SHANSher we vsvngrí, Mongganø angmaq cunshí we lvpat taq Sher we nønt,laqyà,kvmnønt ní zúnshínø vlyangí we SHANSher Vsvng rì kaq Gvrayí nø mvbøt mvtin, magvyàq shidø shagóng vnàng kéní dālvm jórnónggún kúngā,lvmik kømlarí dvtvnònø ishøt zíwe da:ng svng dvdvm nø pvlace kvmnønt nónggún lùshì lvm shvngømré kéní Shvngvt dvdú we tvrà íe. SHANSher we vsvng ri kaq vpø nø shvríng we tvrà nø Gvray jórnónggún svng shvyøm we gø møì,shømlà svng noq we gø møì,kangpè yesú í røtnim dvpvng we dāng màløm shí we gø møí,yà dāng svng shvngømré kéní mvdøng mvdàq dvkvm nø Shvngvt we vle. Yàlóng SHANSher we vsvng kaq vpø nø shvring shi lóng nø Gvrayò jór dvkúng téwà sha:nglvm dvpvt nvng Gvrayò rvsvng cérì gøvrvm mvdvmø angò ishøt jéjú ból we shvrà ilvm, téwá kvmnønt ní vtó shí lún lvm dvpvt ie. Vpø íwe pè mè nvmchvng maq SHANSher we vsvng rí í muqlvng mongdán gónglúnò dø rvsvngcerí gø vra:mi gø gónglún lvm,shvbúng shvmvt shìlvm,dvciq lvpat pvlace nónggún lùshí lúnlvm dvkvm we dāng íe.