Shiqshvn nø zetwe Cvmrérì ílúnlvm dvpvt dvzøm mvkoq lvm dang.

Shiqshvn nø zetwe Cvmrérì ílúnlvm dvpvt dvzøm mvkoq lvm dang.

Nøngmaqó Cvmrérì svng cvmwe rvtø taq mòngzøl shìqshvn dø gvlì we ínìnø mèpvng télò:ngì rvtø taq vhøng vlún we brat svng lúnlvm wa íe. Wervt mòngzøl nø zetwe Cvmrérì ílúnlvm Kàdø ku dvzøm ràwe dang svng nøngmaq angpè angmèmaqí shárà we íe. We Cvmrérì svng tiqlvngcè Mòngzøl bòylvm dvpvt mvínø angmaqò nøt mvsøn nvrøm høq mòngzøl bòylvm dang svng dvcøp lún shìnø téwa ka dvgvp gø cømsaq mòngzøl we lúnlvm ílò:ngì. Nøngmaqò Cvmrérì shønggàn yvng gvsøp we svng yáng mvtvm we wá mvdaq. Pàlvm wani shønggàn yvng kalang nø mvn shìwe, shøng lvlàng nø mvn shìwe rìgø cvmrérì dvpvt shvla we íe.

    Yadø shønggan yvng shøng, shìn, nvmbàn angshøngrì rvt Cvmrérìò nøt rot lvm vlwe íe. Wedø shønggàn yvng mvn shìwe taq kèní vsvng rìnvng vrvm vrá sháshìwe cvmré gønø college, detgvdū tuqlvm yòlnø màshvla we vm aqlvm dang taq vyá sháò we svng yvnglún shìwe íe. Wervt nø cvmrérì shønggàn yvng rvmnvng rvmchvng rìnvng gvsøp nø mvn shìwe laqyà vlwe ínìnø té shvla we íe. Hang sømlà Game gvza naqdø gvsøp wenø Cvmrérì svng nøt bòy dvzvr we íe. Wedø ínìgø Phone, TV, Computer Sacreem rìnvng gvza naqdø rvtø dvbéò rìnø nøt ana dvpvt màshvla we íe. Paqzí vdè rìí shønò we taq Phone, TV, Computer Sacreem rì mvdvm nø gvsøp lvm pvn gvsøp we rì mvdvm rvmnvng rvmchvng, lega røwe, shvngømré bvnlì taq té dvzaq shìwe dang rìnø Cvmrérì svng té nøt bòy dvzvr we svng shálún we íe. Dørøm vm pà ámwe rvtø taq ínìgø, dørøm yuplvm rvtø taq ínìgø, oqà wàwe kà shønshá we laqyà vl lvm shvngøt ràe. Vrá nø vdè yvng vlwe dvre rì dvpvt oqà wà shàwe nøt zang sháshì høq dvtú ràe. Tín tiqpvn nø Cvmrérì chøm bvnlì wá dvzvr we svng angmaq mvshóng shì. Wedø ínìgø, Chøm bvnlì shini shibøn rì waò we ínìnø, døngkù vsvng shvngbè nvng tiqdø ø:ngàè wanø dvdvm nøt shàlvm vle. Wervt nø tiqchøm vsvng rìnvng tiqdø bvnlì dvzøm shìwe nø cvmrérìí yatwe bvnchvtrì vhøm daqò kè nøt tønshì shá lò:ngòe.

     Cvmrérìò nvnggùn dvkáng shìlvm té vháng lvm dvpvt vdè nø vdèò góng svng vløm shìshà lvm chøm bvnlì rìtaq kèní shvla mvchà wá dvzvr ràe. Vrá nø dvzøm dvbvm shàwe laqyàrì vllvm gø shvngøt dvtú ràe. Tiqdá vsvng rìkaq svng dvbvm sha wenø nøntshøm nøtbyò lvm lúnshì we írvt dvbvm shàwe nøt vdá lvm cvmrérì svng shvngøt dvtú ràe. Nøngmaq lvpvt taq nøt byò lvm wa vlwe mví, yatwe rvtø taq nøttøn shìshà lvm nvnggùn zì ràe. We da:ngì Nøtshøm nøtbyò we Cvmrérì ílvm dvpvt Angpè angmè maq gø nøt byò byò vlshà lvm gvza vchvk we íe. Cvmrérì nø shaqré rìí, waò we dang svng yà:ngò nø Cvnshì shàwe íe. Wervt nø Cvmrérì nvng tiqdø kà dvmvn we rvtø taq mvrshvm lvng lvng gá we dvtvn nø vtoqvtip lvm vchvk we íe. Vrá cvmrérìí shøn we kà svng gø nøt shvyvng Shìnø gvza vchvk wedø Kàtá àràe. We mèpvng angmaq vl rvt nø nøt gvza byò we svng gø dvtá ràe. Nøngmaq Angpè angmè maqnø cvmrérìí shùtnò we rvtø taq dvrøq we ínìgø cvmrérìí shvla we bvnli wàò ke Shvla we bvnlì tiqpvn pvn wàò we rvtø rìtaq shvlae wanø shvkun shvring we kà shøn lvm svng nø vná shì shàwe íe.

    Wervt nø cvmrérì svng angmaq nøtshøm nøtbyò dvbù we høq shvkunò nvnggùn zìwe kømpaq rì zíòwe yarì nø gvza shvla we íe. Yadø wàòwe tvrà dang nø cvmrérì dvpvt angmaq nvnggùn lūshì we tiq dang gø íà:me. Wedø shùtnò we tvrà dang svng yà:ngò nø mèpvng taq shvding shvráì shìnø té shvla dø vlshà we nøt vllvm høq shvngøt ràe. Vrá mèpvng mvshut dø shvdøng shìdaq we ínìnø, angsvng gvza jòámì we íe, wanø shvkún we kà shønlvm vná mvdaq we íe.

    Cvmrérì taq yatwe bvnchvt tiqpvn pvn vldaq ìkè, vdè nø vdèò góng svng vløm shìwe dang kaq rvtø vrvm shvngøt ràe. Wedø ínì wa mvkúm mvdup lúnshì nø kadø yat we bvnchvt rìsvng vhøm daqwe ínìgø yòlcè kàciq rat doqdan lúnlvm íe. Wervt nø Nøngmaqò Cvmrérì kaqsvng Shiqshvn nø zetwe pàqzí shàwe Cvmrérì ílvm dvpvt dvzøm mvkoq lvm dang svng mvdvm taq dvtú bø:ngà we tvrà rìsvng Cvnshì leqlúnì wang dvmvn we íe.

Kàdvlíng Paul Hpu Ye Dwe.