Shvlawe dvdamnøtrì nø jórnònggwònrì dvpvt àngshí àngwvtrì bǿn dvzv́r lúnwe

Shvlawe dvdamnøtrì nø jórnònggwònrì dvpvt àngshí àngwvtrì bǿn dvzv́r lúnwe

Shóngshø̀ngwe shòlaqré vnvm vchangrì vdèò lvpvt tvrà svng kadøwa dvdam vtoshàì we íemá? Wedø vdèò lvpat tvrà sv̀ng vdèí kadø dvdamshì nø we tvràtaq kadø dvzaqshì wetaq cv̀nnø̀ we vdèò lvpat tvràrì gø vlíng vpo lúnwegø íe.

La nàtaq màshvlawe dvdamnøtrì wa zø̀ngnø lvpat tvrà svng vtoshìwe ínìnø we nàò lvpat tvrà gø wedø ni bø̀nlongwe svng síngshá dvzv́r wegø íe. Weratnø vdèò lvpat tvrà svng nø shvla vtang shvladø dvdamshì nø vtoshì lúnràwe svng nònggwòn zinø shvdǿm mvyǿwe gø íe.

Vdèò shagóng shiqshàn lv́m tvrà svng cvn dvgømwe vsv̀ngnø àngno shagóng shiqshàn we vjú svng vtoshì lún lú:ngòwe ínø̀ wedøni vdèò lvpat tvrà sv̀ng shvla dø dvdamshì nø vtoshì we vsv̀ng tiqgǿ dvpat nø chvpdvp taq gø shvlawe tvrà svng dílún tuqlún we vjúrì vtoshì lúnwe dang svng shvdǿm nø nònggwòn ziwe íe.

Vránø mèpvng vdè lvpat tvrà taq shvlawe tvrà dvpat shvlawe dvdamnøtrì vlwe nø vdèò lvpat tvrà kaqsvng bá:ngkà tá:nā lúnwe ínø̀ màshvlawe dvdamnøt rì mvdàm taq nø lvpat tvrà taq gø màshvlawe dangrì taqkèní dang àngpv̀n pv̀n taq vtøp dvzv́r sháò wegø íe. Vdèò lvpat tvrà dvpvt shvlawe dvdamnøt rì gv́lshì wenø vdèò lvpat tvrà taq nøt mvsø̀nrì svnggø shiqshàn dvzv́r lúnwe gø íe.

Vdèò lvpvt tvrà taq mv́n, dvdamwe tvràrì taqgø zìdang dvhángā we ínø̀ we shvlawe dvdamnøt mvsø̀nrì nø tiqlòng nvng tiqlòng nø vzø̀m longwe í shvlawe tvràrì sv̀ng tóngā lúnwe gø íe. Nà vdòng taq màshvlawe dvdamnøt rì vkǿn nø nøtbùmwe tvràrì vshøpwe ínìnø vdèò vgomv́rcì vdòng taq høqshaq wedø màshvla we dvdam nøtrì í møké lú:ngò wegø íe.

Weratnø shvlawe dvdamnøt rì svng kadø gv́lshì ràwe dang nvng singnø shóngshø̀ngwe shòlaqré vnvm vchangrì kaq svng nònggwòn zí mvyǿwe taq vdèò ni vrv̀m cúnshàì we lvpat tvrà taq vsv̀ngrì nvng vtoq vtiq shàì we dvgvp vhøshì we, heliyet mv̀rshv̀mrì gv́l shàì we nø vdèò vgo mv́rcì shiqshàn tvrà svnggø shvladø tubùmā ínø welòngnø nv̀mlat mvpvpv́ng dvtàng kèní shvlawe dvdamnøtrì íwe svng síngshá dvzv́r mvyǿwe gø íe.

Shòlaqré nøngmaqò lvpat taq tiqgǿ nv̀ng tiqgǿ gø tasv̀ng tubùm dvbangā kelv́m gø gvzàni vchak we íe. We tvrà taqkèní nøngmaq kaqsvng nøt mvsø̀n mòngzø̀l wenvng shvlawe dvdamnøt rì svng zíā lúnwe tiq tvrà gø íe. Wewa mvtaq lvpat taq jø̀ng jǿngni rà vchak we vsv̀ng tiqgǿ kaqsvng tiqni taq tiqboqcè tubùm dvbangā lúnwe ínìnø vdèò nøt mvsø̀nrì svng gø shiqshàn dvzv́rā lúnwe mvtaq nøngmaqò lvpat tvràrì taq dvdamshàì we tvnùmanggá rì svnggø jór lúnwe kù:ngàrì vtoshì lún dvzv́r we dang dvtit tvlewe mòngkà yayv́ng nvrng:òe.