Shvmná nxt

Shvmná

Bashàrì kagø taq ínìgø shvmná mvgør, shvmná mvkiq we nøt vlì we wa íe. Ínì gø tiq gø nvng tiq gø taq vl we shvmná nøtrì mvngnø màbóng long. Yadø shvmná vsorwe nøtrì nø vsvng kaq vjú mvzi we svng shvngbeí síngsháì we íe. Shvmná mvgør nøt ratnø vsvng tiqgø kaq dang angpvn pvn taq vnøn dvzvŕ we íe.

Bvnlìrì taq gø màshvla dø vbam shì longe. Wewa mvtaq tiqdá vsvng rvmnvngrì svng gø nøt dvshá dvzvŕ òe. Tiqmaq taq shvmná vsor long kat már daq taq mvshèwe már vlíng longnø vsvng mvlúngkaí shvmná wawe svng mvshè weí gømla wáshá òe. Shvmná mvgør we taq tékanø vnàí táshìnø, neí yángshì we nvng nvnggøp kà kèní vtànò we vshat we ku yánglún shìe.

Vsvng tiqgø taq shvmná vsor long rvtø jò we nvng mvjò long svng dvdam mvshá lúngò. Èshønò we kàrì gø shvmná shaq ílong nø èwàò bvnlìrì gø shvmná bvnlì svng vpo dvzvŕ òe. Shvmná vsor we nøtnø tiqkat kvt rvtø angdong vdòng bøn nø tiqkvt kvt rvtø yanggúng bøn sháòe. Pàwálvm shvmná nøt svng vpo dvzvŕ we taq vsvng tiqgø kaq ang mvshóngshì we kà, mvnyamvm we kà, laqyà rì, yáng mvtàmvm we, dvshat we kàrì nvng vsè we kà rì taqkèní bøn dvzvŕ we íe. Vsvng tiqgø kaq wur zú shì we mvdàm kàí ang mvshóngshì dø èshønò we nø té zawe íe wae.

Yadø nøt mvsøn rìnø shaqré rì mvdàm vlù vlàngrì taq téwa bøn we svng gø yáng lúnshìe. Pàwálvm wani vlù vlàngrì taq nøt shvyang shìnø cipshìwe nøt, nøt tøpwe dang taq shaqrérì mvdàm yúmwe rat íe. Vsvng tiqgø taq shvmná vsor long rvtø svre nøt, shvraq nøtrì gø vmáng sháò we íe. Kadángte yáng vnvpwe tiqgø ínì gø shvmná mvgør we rvtø taq nø we vnvpwe mvrshømrì vmangvm me.

Tiqdá rvmnvng rìtaq kèní gø svrevm rawe íe. Chøm bángkà svngnø gvraqshì shvla we ínìgø shvmná nøt wawe bángkà svng gvraqlvm nø mvdaq wawe kà vl we døtiq dvchá we nøtrì ínì angdè svng mvhøt lvm vhøm dvzvŕ we gø íe. Wedø írat vpøìwe vnvmchvngrì gø ya shvmná nøt svng síngshá shìlvm vchyak we íe.

Angdè ò nøt mvsøn svng síngshá shìnø tønshì lúnwe tiqgø ínø wa tiqdá vsvngrìò shvmná mvgør we nøt svng gø síngsháā lúnwe ínø shvzøm lúnò we íe. Shvmná mvgør we nøt kèní lúnshìwe dvtut vjúrì wawe taq tasvng yáng mvtàmvm we, vzìng kewe, vshatwe nvng làngdøm tongrúng vdu we høq shaq bøn dvzvŕ we gø íe.

Angdè ò shvmná vsor we nøt kèní rvmnvngrì nvng vsvr mvnshì sháò nø mèpvng kaq mvgvm màshvla we vsvng tiqgø ku bøn dvzvŕ sháò we svnggø síngshá shìlvm shvdøm we íe. Yadangrì svng síngsháì we taqkèní angdèò nøt mvsøn rìsvng shvladø vdáng shàì nø angdèò lvpat yànggùng svng vnvp dø nøt mvsøn rì vrang shì laqlúnì wang dvtit tvle svngkà yayáng naròe.