Shvmná vsorwe rvtø kadø shvzøm lvm ímá?

Shvmná vsorwe rvtø kadø shvzøm lvm ímá?

Nøngmaq taq shvmná mvgør ràwe rvtø kapà rì wásháìe má? Nøngmaq shvngbe nø shvmná mvgør lú:ngì kvt shvla we mà shvla we dvtøp mìwe mv-vl nø shvmná vsorwe nøtrì mèpvng wa cvn sháìe. We kvt vlé shàìe, wur zú shì sháìe. Welòng taq kèní nøt yùl lvmrì dvbungòe , nvrøm vsore, nøt tønshì lvm rì nvng vhøm dvzvŕe.

Wedø írakvt shvmná nøt svng shvzøm mø:íni we lòng svng tønlún lvm dvpat wáshvla we rì tiqdang cè dvtit tvle lvm íe. Kà shvbóng chøm vsvngrì dvhø tiq gø gø nvng shvmná dvbungshì rawe ínì nø we shvrà kèní vsvr we kaq tiqlangcè yelshì nø èvl. Shvmná nøt zømvm rvtø høq shaq èvl weí shvmná mvgør we nøt svng shvzøm lúnshì longe.

Tiqmaq taq íni vsvng kaq mà vtànò nø angdè nøt dòng taq wa shvmná vsorwe vsvngrì gø vl longe. Wedø bøn we nø tiqdá vsvng rat bøn we mø:íni angdè nø angdè nøt cvm nøt kènígø bøn sháò we íe. Wedø bønlong rvtø taq vgo mvdàm kèní vtì vchoqshì nø tì shølshì, mèpvng rvmnvng tiq gø gø svng nàchàngò, møíni nøt dvshérshì lúnlvm dvpat hang cømla yàngwe, gøncøp nø mvnshìwe rì wáshì we taqkèní gø angdèò shvmná nøt svng shvzøm lúnshì longe wae.

Yadangrì wa mvtaq angdèò shvmná mvgør we nøt svng shvzøm lúnshì lvm dvpat vjúrøt shìnø nøt shvdøk shìwe, zaqlèwàng diwe nvng bvnlì tiq pvn pvn taq dvzaq shìwe tvrà rì taqkèní gø angdè taq vkøn we, vsorwe shvmná mvgør nøt rìsvng shvzøm lúnshìe wawe dvtit tvle svngkà yayáng naròe.